លោក Inoue Kazunori មកដឹកនាំឡើងវិញ U15 ជំនួសលោក Lee Taehoon

កីឡាជាតិ

ជាតិ

លោក Inoue Kazunori មកដឹកនាំឡើងវិញ U15 ជំនួសលោក Lee Taehoon

27, Feb 2019 , 6:39 pm

រូបភាព

លោក Inoue Kazunori អតីតគ្រូបង្វឹកក្រុមសាលាបាល់ទាត់ជាតិបាទី U18 និងជម្រើសជាតិ U19

ដោយ:

លោក Inoue Kazunori ត្រូវបានតែងតាំងឲ្យធ្វើជាគ្រូបង្វឹកក្រុមយុវជនសាលាបាល់ទាត់ជាតិបាទីអាយុក្រោម១៥ឆ្នាំ(U15) ជំនួសលោក Lee Taehoon ដែលបានចប់កិច្ចសន្យាកាលពីចុងឆ្នាំ២០១៨។ នេះជាការចូលរួមលើកទី២របស់គ្រូបង្វឹកជនជាតិជប៉ុនរូបនេះ ពោលគឺលោកធ្លាប់ដឹកនាំយុវជននៅទីនេះម្តងរួចមកហើយ។

គ្រូបង្វឹកដែលជួយឲ្យក្រុមជម្រើសជាតិអាយុក្រោម១៦ឆ្នាំកម្ពុជាឡើងទៅវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ AFF U16 Championship កាលពីអំឡុងឆ្នាំ២០១៦ លោក Inoue Kazunori ត្រូវបានតែងតាំងឲ្យធ្វើជាគ្រូបង្វឹកក្រុមយុវជនសាលាបាល់ទាត់ជាតិបាទីអាយុក្រោម១៥ឆ្នាំ។ ការតែងតាំងនេះ គឺដើម្បីជំនួសលោក Lee Taehoon ដែលបានផុតសុពលភាពកិច្ចសន្យាជាមួយសហព័ន្ធកីឡាបាល់ទាត់កម្ពុជាកាលពីចុងឆ្នាំ២០១៨។

លោក Inoue Kazunori ក៏ត្រូវបានសហព័ន្ធតែងតាំងឲ្យធ្វើជាគ្រូបង្វឹកក្រុមជម្រើសជាតិអាយុក្រោម១៥ឆ្នាំកម្ពុជាផងដែរ។ គ្រូបង្វឹកជនជាតិជប៉ុនរូបនេះ ធ្លាប់ដឹកនាំក្រុមយុវជនបាទី និងយុវជនជម្រើសជាតិកម្ពុជាម្តងរួចមកហើយ។ ក្នុងអំឡុងចំណាយពេល២ឆ្នាំចន្លោះពីឆ្នាំ២០១៦-២០១៨រួមរស់នៅកម្ពុជា គ្រូបង្វឹករូបនេះ បានជួយឲ្យក្រុមកីឡាករជម្រើសជាតិអាយុក្រោម១៦ឆ្នាំកម្ពុជាទទួលបានចំណាត់ថ្នាក់លេខ៤ប្រចាំព្រឹត្តិការណ៍ AFF U16 Championship 2016។

បន្ថែមលើនេះ លោកបានដឹកនាំក្រុម U18 ចូលក្នុងការប្រកួតដណ្តើមពានរង្វាន់ AFF U18 Championship 2017 នៅមីយ៉ាន់ម៉ា និងដឹកនាំក្រុម U19 ចូលរួមក្នុងវគ្គជម្រុះ AFC U19 Championship ទៀតផង។

កិច្ចសន្យាក្រោមកិច្ចសហការរវាងសហព័ន្ធកីឡាបាល់ទាត់នៃប្រទេសទាំងពីរកម្ពុជា-ជប៉ុននេះ មានសុពលភាពរយៈពេល១ឆ្នាំ។ បច្ចុប្បន្នសាលាបាល់ទាត់ជាតិបាទីក្រោមការដឹកនាំរបស់គ្រូបង្វឹក Inoue Kazunori កំពុងជ្រើសរើសនិងធ្វើតេស្តយុវជនអាយុក្រោម១៥ឆ្នាំ៕