ជើងហោះហើរអន្តរជាតិទាំងអស់រវាងថៃនិងអឺរ៉ុបរបស់ក្រុមហ៊ុនអាកាសចរណ៍ Thai Airways ត្រូវបានលុបចោលកាលពីយប់ថ្ងៃពុធ និងព្រឹកថ្ងៃព្រហស្បតិ៍។ ការប្រកាសលុបចោលជើងហោះហើរបន្ទាន់បែបនេះ គឺធ្វើឡើងក្រោយពីអាជ្ញាធរប៉ាគីស្ថានសម្រេចបិទផ្លូវអាកាសរបស់ខ្លួន ដែលប្រធានក្រុមហ៊ុននេះចាត់ទុកថា ជារឿងអាសន្នមួយ។
ដំបូងឡើយជើងហោះហើរចំនួន ៤ ដែលត្រូវបានលុបចោល គឺចេញពីអាកាសយានដ្ឋានសុវណ្ណភូមិថៃ ដែលធ្វើដំណើរទៅកាន់ប្រទេសចំនួន៤ រួមមាន រុស្ស៊ី, បារាំង, ចក្រភពអង់គ្លេស, អាល្លឺម៉ង់។ ប៉ុន្តែចំនួននៃការលុបចោលជើងហោះហើរបានកើនឡើងយ៉ាងរហ័ស។ ការលុបចោលបែបនេះ ក៏នឹងប៉ះពាល់ដល់អាកាសយានដ្ឋានផ្សេងទៀតក្នុងតំបន់អាស៊ីអាគ្នេយ៍ និងអាស៊ីបូព៌ាផងដែរ។
យោងតាមការចុះផ្សាយរបស់សារព័ត៌មាន Bangkok Post ប្រធាននៃក្រុមហ៊ុនអាកាសចរណ៍អន្តរជាតិ Thai Airways លោក Sumeth Damrongchaitham បានចាត់ទុកស្ថានការណ៍នេះថាជារឿងអាសន្ន ហើយលោកក៏បានកោះហៅឲ្យមានកិច្ចប្រជុំបន្ទាន់មួយជាមួយមន្ត្រីអាកាសចរណ៍ជាន់ខ្ពស់ថែមទៀតផង។ លោកអះអាងថា វិធានការជាបណ្តោះអាសន្នដ៏ចាំបាច់នោះ គឺត្រូវតែផ្លាស់ប្តូរជើងហោះហើររវាងថៃ និងអឺរ៉ុប។
កាលពីរសៀលថ្ងៃពុធទី២៧ខែកុម្ភៈ រដ្ឋាភិបាលឥណ្ឌាក៏បានបិទផ្លូវហោះហើររបស់ខ្លួននៅផ្នែកភាគខាងជើងនៃប្រទេស។ យ៉ាងណាមិញ គេមិនទាន់ច្បាស់នៅឡើយទេថា តើវានឹងអាចជះឥទ្ធិពលដល់ចរាចរណ៍ផ្លូវអាកាសរវាងអឺរ៉ុបនិងថៃឬយ៉ាងណានោះ។
ទន្ទឹមនឹងគ្នានេះ នាថ្ងៃដដែលនេះ ស្ថានទូតថៃប្រចាំទីក្រុង Islamabad បានដាក់ចេញការព្រមានលើការធ្វើដំណើរ ដោយណែនាំឲ្យអ្នកដំណើរថៃទាំងអស់បញ្ជៀសការធ្វើដំណើរកម្សាន្តទៅកាន់តំបន់កាស្មៀ និងទីតាំងជម្លោះរវាងប៉ាគីស្ថាននិងឥណ្ឌា។
ក្រៅពីក្រុមហ៊ុនអាកាសចរណ៍របស់ថៃ ក្រុមហ៊ុនអាកាសចរណ៍ធំៗមួយចំនួនរួមមាន Emirates និង Qatar Airways ក៏បានផ្អាកជើងហោះហើររបស់ខ្លួនទៅកាន់ប៉ាគីស្ថានផងដែរ ក្រោយទទួលបានសេចក្តីប្រកាសបិទផ្លូវហោះហើររបស់ប៉ាគីស្ថាន។ ការហោះហើររបស់ក្រុមហ៊ុនអាកាសទាំងនេះ ដែលត្រូវឆ្លងកាត់ប៉ាគីស្ថាន មុននឹងអាចធ្វើដំណើរទៅកាន់អឺរ៉ុប មជ្ឈបូព៌ា និងអាស៊ី នឹងត្រូវបានផ្អាក។ ចំណែកឯ ជើងហោះហើរខ្លះ ត្រូវបានផ្លាស់ប្តូរផ្លូវឆ្លងកាត់ ដោយត្រូវហោះឆ្លងកាត់តាមទីក្រុង Mumbai ដើម្បីបញ្ជៀសការហោះឆ្លងកាត់ចូលផ្លូវអាកាសរបស់ប៉ាគីស្ថាន។
ទាក់ទិននឹងរឿងនេះ អ្នកជំនាញផ្នែកអាកាសចរណ៍ លោក Mark Martin បានប្រាប់ទីភ្នាក់ងារព័ត៌មាន Reuters ថា៖«អ្នកមិនអាចហោះហើរឆ្លងកាត់ប្រទេសចិនបានឡើយ ដូច្នេះអ្នកត្រូវតែហោះឆ្លងកាត់ប៉ាគីស្ថាននិងឥណ្ឌា ដើម្បីអាចទៅកាន់តំបន់អាស៊ីអាគ្នេយ៍ និងអូស្ត្រាលី។ ភាគច្រើននៃជើងហោះហើរដែលមានទិសដៅទៅកាន់រដ្ឋធានីបាងកក និងសិង្ហបុរី នឹងត្រូវហោះឆ្លងកាត់អីរ៉ង់ជំនួសវិញ»។
ជើងហោះហើរអន្តរជាតិដែលជាធម្មតាត្រូវឆ្លងកាត់រវាងផ្លូវអាកាសឥណ្ឌានិងប៉ាគីស្ថាន នឹងត្រូវបង្ខំផ្លូវប្តូរជើងហោះហើរខ្លួន រួមមានដូចជា ជើងហោះហើររបស់ក្រុមហ៊ុនអាកាសចរណ៍សិង្ហបុរី, Finnair, British Airways និង Air India ជាដើម។ នេះបើតាមវេបសាយ flightradar24.com ដែលតាមដានចរាចរណ៍នៃយន្តហោះទូទាំងពិភពលោក។
សូមបញ្ជាក់ថា ការបិទផ្លូវហោះហើរនេះ គឺធ្វើឡើងខណៈដែលប៉ាគីស្ថាននិងឥណ្ឌាត្រូវបានរាយការណ៍ថា បានប៉ះទង្គិចគ្នា រួមមាន ការបាញ់ទម្លាក់យន្តហោះចម្បាំងឥណ្ឌាពីរគ្រឿងក្នុងទឹកដីប៉ាគីស្ថាន។ ក្នុងហេតុការណ៍នេះ យោធាប៉ាគីស្ថានអះអាងថា ខ្លួនបានចាប់ខ្លួនអ្នកបើកយន្តហោះរបស់ឥណ្ឌាម្នាក់ថែមទៀតផង។
ការណ៍នេះបានបញ្ឆេះភាពតានតឹងកាន់តែខ្លាំងរវាងប្រទេសក្នុងតំបន់អាស៊ីខាងត្បូងទាំងពីរនេះ ចាប់តាំងការបំផ្ទុះគ្រាប់បែកអត្តឃាតមួយដែលក្រុមឧទ្ទាមមានមូលដ្ឋាននៅប៉ាគីស្ថានក្នុងទឹកដីកាស្មៀដែលគ្រប់គ្រងដោយឥណ្ឌា កាលពីថ្ងៃទី១៤ ខែកុម្ភកន្លងទៅ។ ក្នុងហេតុការណ៍បំផ្ទុះនេះ មន្ត្រីប៉ូលីស និងទាហានឥណ្ឌាចំនួន ៤០នាក់បានស្លាប់៕