ជាតិ
សង្គមជាតិ
ជម្លោះដីធ្លីនៅព្រះសីហនុ៖ មេបក្សខ្មែរក្រោកថា នាយករដ្ឋមន្ត្រី ព្រមានដកអភិបាលរងមួយចំនួន រូបពីក្រសួងព័ត៌មាន៖ កិច្ចប្រជុំរវាងនាយករដ្ឋមន្រ្តី និង ឧត្តមក្រុមប្រឹក្សាពិគ្រោះនិងផ្តល់យោបល់ នៅវិមានសន្តិភាព នាថ្ងៃទី២៨ ខែកុម្ភៈ ឆ្នាំ២០១៩
× ប្រធានគណបក្សខ្មែរក្រោក លោក សុខសុវណ្ណ វឌ្ឍនាសាប៊ុង ដែលគេស្គាល់ជាទូទៅថា វិល្លាម ហ្គ័ង បានសរសរលើទំព័រហ្វេសប៊ុករបស់លោក ថា សម្តេចនាយករដ្ឋមន្ត្រី ហ៊ុន សែន ក៏សម្តែងការសោកស្តាយដែរ ចំពោះការផ្ទុះឡើងនូវអំពើហិង្សារវាងសមត្ថកិច្ចនិងប្រជាពលរដ្ឋ ក្នុងរឿងតវ៉ាដីធ្លីនៅខេត្តព្រះសីហនុនាពេលថ្មីៗនេះ ហើយបានគំរាមដកអភិបាលរងខេត្តមួយចំនួន ដែលជាអ្នកដឹកនាំកម្លាំងចុះទៅអនវុត្តដីការបស់តុលាការកំពូល។
ប្រធានគណបក្សខ្មែរ ថែមទាំងសរសេរទៀតថា នាយករដ្ឋមន្ត្រី ក៏បានបញ្ជាឲ្យពិនិត្យដកមេបញ្ជាការយោធាខេត្តព្រះសីហនុផងដែរ។ លោក ប្រាប់សារព័ត៌មានថ្មីៗតាមទូរសព្ទថា នាយករដ្ឋមន្រ្តី បានព្រមានដកអភិបាលរងខេត្តនិងមេបញ្ជាការយោធាខេត្តព្រះសីហនុ ក្នុងកិច្ចប្រជុំជាមួយឧត្តមក្រុមប្រឹក្សាពិគ្រោះនិងផ្តល់យោបល់ នៅថ្ងៃទី២៨ ខែកុម្ភៈ ឆ្នាំ២0១៩នេះ។
ប្រធានគណបក្សខ្មែរក្រោក ដែលជាសមាជិកឧត្តមក្រុមប្រឹក្សាពិគ្រោះនិងផ្តល់យោបល់ដែរនោះ បញ្ជាក់យ៉ាងដូច្នេះថា៖«ខ្ញុំ សរសេរតាមប្រសាសន៍របស់សម្តេច គឺគាត់ ព្រមានអ៊ីចឹងមែន តែគាន់និយាយទូទៅ គាត់អត់បញ្ចេញឈ្មោះទេ»។
ប្រជាពលរដ្ឋប្រមាណ២០០នាក់ បាននាំគ្នាតវ៉ា ក្រោយតុលាការកំពូល ចេញសាលដីកាស្ថាពរសម្រេចឲ្យឧកញ៉ាម្នាក់ឈ្នះក្តីពួកគាត់ លើរឿងដីធ្លី នៅភូមិគគីរ ឃុំបិតត្រាង ស្រុកព្រៃនប់ ខេត្តព្រះសីហនុ។ បន្ទាប់មក កម្លាំងប្រដាប់អាវុធទាំងបីប្រភេទ ដែលរួមមាន កម្លាំងនគរបាល កម្លាំងកងរាជអាវុធហត្ថ និង កម្លាំងយោធា ក្រោមការដឹកនាំរបស់អភិបាលរងខេត្ត បានចុះទៅអនុវត្តសាលដីការបស់កំពូល ហើយក៏ប្រឈមមុខជាមួយប្រជាពលរដ្ឋ រហូតឈានដល់ផ្ទុះអំពើហិង្សា។
កម្លាំងប្រដាប់អាវុធ បានបាញ់កាំភ្លើង៦គ្រាប់ ក្នុងព្រឹត្តិការណ៍នោះ។ ប៉ុន្តែ សមត្ថកិច្ច បដិសេធថា គ្រាប់កាំភ្លើងដែលត្រូវប្រជាពលរដ្ឋម្នាក់ មិនមែនជាគ្រាប់កាំភ្លើងរបស់សមត្ថកិច្ចឡើយ។ រហូតមកដល់ពេលនេះ សមត្ថកិច្ច មិនទាន់រកឃើញជនល្មើស ដែលបាញ់ត្រូវប្រជាពលរដ្ឋនោះទេ។
សមត្ថកិច្ច ធ្លាប់បកស្រាយថា សមត្ថកិច្ច បានតដៃនិងរហូតឈានដល់ប្រើអាវុធ គឺដើម្បីបញ្ឈប់ប្រជាប្រជាពលរដ្ឋ ក្នុងការប្រើអំពើហិង្សា ដូចជា ដុតកង់ឡាន គប់ដប គប់ដុំថ្ម និងបាញ់ចម្ពាមកៅស៊ូ ជាដើម។
យ៉ាងណាក៏ដោយ មានមន្រ្តីកងរាជអាវុធ៥នាក់ និង យោធិនម្នាក់ បានរងពិន័យ ពាក់ព័ន្ធនឹងអំពើហិង្សានេះ៕
Tag:
ហុន សែន
ដីធ្លី
ព្រះសីហនុ
វិល្លាម ហ្គ័ង
© រក្សាសិទ្ធិដោយ thmeythmey.com