ជាតិ
សង្គមជាតិ
ACU ស៊ើបអង្កេតលើស្នងការរងម្នាក់ដែលជូនថ្លៃទឹកដោះ១០ម៉ឺនដុល្លារ និងឡានទំនើបដល់កូនក្រមុំ រូបពីគណនីហ្វេសប៊ុក Sreng Sokha
× អង្គភាពប្រឆាំងអំពើពុករលួយ (ACU ) ដែលមានលោក ឱម យ៉ិនទៀង ជាប្រធាន បានចាប់ផ្តើបស៊ើបសង្កេតទ្រព្យសម្បត្តិរបស់លោក ស្រេង សុខា ស្នងការរងខេត្តកណ្តាល។ អង្គភាពប្រឆាំងអំពើពុករលួយ បានចេញសេចក្តីជូនដំណឹងពីចំណាត់ការនេះ នៅថ្ងៃ២៧ ខែកុម្ភៈ ឆ្នាំ២០១៩។
វិធានការរបស់អង្គភាពប្រឆាំងអំពើពុករលួយ គឺធ្វើឡើងបន្ទាប់ពី អ្នកប្រើប្រាស់បណ្តាញសង្គម នាំគ្នារិះគន់លោក ស្រេង សុខា ថា មានទ្រព្យសម្បត្តិច្រើន រហូតដល់មានលទ្ធភាពបង្គាប់១០ម៉ឺនដុល្លារ និង លុចស៊ីស៥៧០ ដល់ខាងស្រី។ អ្នកប្រើប្រាសបណ្តាញសង្គម ងឿងឆ្ងល់ថាហេតុអ្វីបានជាស្នងការរងរូបនេះ មានលុយច្រើនយ៉ាងនេះ?
យ៉ាងណាក៏ដោយ មកដល់ពេលនេះ លោក ស្រេង សុខា គ្រាន់តែប្រឈមនឹងការស៊ើបអង្កេតពីសំណាក់អង្គភាពប្រឆាំងអំពើពុករលួយប៉ុណ្ណោះ តែតំណែងរបស់លោក មិនទាន់ប៉ះពាល់នោះទេ។
សេចក្តីជូនដំណឹង បានបញ្ជាក់ថា៖«ក្រុមប្រឹក្សាអង្គភាពប្រឆាំងអំពើពុករលួយ គាំទ្ររាល់ចំណាត់ការរបស់អង្គភាពប្រឆាំងអំពើពុករលួយ ក្នុងការពង្រឹងការអនុវត្តច្បាប់ ការបង្ការ ការទប់ស្កាត់ និងការបោសសម្អាតអំពើពុករលួយ ដើម្បីពង្រឹងអភិបាលកិច្ចល្អ»។
ចំណាត់ការលើលោក ស្រេង សុខា គឺដូចគ្នាទៅនឹងចំណាត់ការលើលោក គឹម រស្មី អតីតមេបញ្ជាការកងរាជអាវុធហត្ថខេត្តរតនគិរី ដែលទើបនឹងត្រូវបានដកចេញពីតំណែង ដោយសារតែសម្ញែងទ្រព្យសម្បត្តិ។ តាមរយៈវីដេអូដែលបែកធ្លាយ ក្នុងថ្ងៃចូលឆ្នាំចិនកន្លងទៅ លោក គឹម រស្មី បានចែកលុយឲ្យកូន៥នាក់ ដោយម្នាក់ៗទទួលបាន១០ម៉ឺនដុល្លារ។
អង្គភាពប្រឆាំងអំពើពុករលួយ សរសេរក្នុងសេចក្តីជូនដំណឹងថា ការស៊ើបអង្កេតលើទ្រព្យសម្បត្តិរបស់លោក គឹម រស្មី ជិតចប់សព្វគ្រប់ហើយ។ សម្តេចនាយករដ្ឋមន្ត្រី ហ៊ុន សែន ដែលស្នើឲ្យព្រះមហាក្សត្រ បញ្ចប់តំណែងរបស់លោក គឹម រស្មី បានហៅថា ជាការវះកាត់ដ៏ឈឺចាប់៕
© រក្សាសិទ្ធិដោយ thmeythmey.com