អន្តរជាតិ
លោក ដូណាល់ ត្រាំ ក្នុងសន្និសីទសារព័ត៌មានក្រោយជំនួបមិនបានផលនៅវៀតណាម។ (រូបភាព Bloomberg)
×![]()
ដោយ: តន ចាន់រិទ្ធារ៉ា
ជំនួបកំពូលអាមេរិក-កូរ៉េខាងជើងលើកទីពីរ បានបញ្ចប់ទៅដោយគ្មានកិច្ចព្រមព្រៀងអ្វីទាំងអស់។ ទណ្ឌកម្ម គឺជាចំណុចខ្ទាស់គ្នាព្រោះអាមេរិកមិនព្រមដកទណ្ឌកម្មតាមការទាមទាររបស់កូរ៉េខាងជើង។ តាមពិត កិច្ចព្រមព្រៀងត្រៀមរួចហើយសម្រាប់មេដឹកនាំទាំងពីរ តែលោកប្រធានាធិបតី ដូណាល់ ត្រាំ យល់ថា ជំនួបនៅវៀតណាមមិនមែនជាពេលវេលាត្រឹមត្រូវដើម្បីចុះហត្ថលេខាឡើយ។ ទោះគ្មានផ្លែផ្កាធំដុំ ជំនួបនៅហាណូយក៏មានផលតិចតួចដែរ។
ខុសពីការរំពឹងទុក ជំនួបតទល់លើកទីពីររវាងប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន មិនមានលទ្ធផលអ្វីឡើយ។ ជំនួបពីរថ្ងៃនៅឯរដ្ឋធានីហាណូយ បានបញ្ចប់មុនផែនការ ដោយគ្មានជំនួបអាហារថ្ងៃត្រង់ និងការចុះហត្ថលេខាលើសេចក្ដីថ្លែងការណ៍រួមឡើយ។ ទាំងលោក ត្រាំ ទាំងលោក គីម បានជិះឡានត្រឡប់ទៅសណ្ឋាគារវិញ។ ដក ឬមិនដកទណ្ឌកម្ម ជាមូលហេតុធ្វើឲ្យជំនួបនេះបរាជ័យ។
ក្នុងសន្និសីទសារព័ត៌មានថ្ងៃទី២៨ ខែកុម្ភៈ លោក ត្រាំ និយាយថា អាមេរិកត្រូវសម្រេចចិត្តដើរចេញ។ ភាគីទាំងពីរខ្វែងគំនិតគ្នាលើលទ្ធភាពនៃការដកទណ្ឌកម្មរបស់អាមេរិកលើកូរ៉េខាងជើង ដែលជាការទាមទាររបស់ក្រុងព្យុងយ៉ាងជាយូរមកហើយ។ លោកប្រធានាធិបតីអាមេរិកបន្តថា វាក៏ព្រោះតែទណ្ឌកម្ម គឺកូរ៉េខាងជើងចង់ឲ្យអាមេរិកទណ្ឌកម្មទាំងស្រុង ប៉ុន្តែអាមេរិកមិនអាចធ្វើតាមការលក្ខខណ្ឌនេះបានឡើយ។
លោក ត្រាំ បានលើកឡើងការធ្វើសម្បទានរបស់កូរ៉េខាងជើងដែលចង់រំសាយនុយក្លេអ៊ែរតែផ្នែកដែលខ្លួនគិតថាមិនសូវសំខាន់ តែជារឿងសំខាន់របស់អាមេរិក។ ក្នុងសន្និសីទដដែល លោក ត្រាំ ទម្លាយថា កូរ៉េខាងជើងបានស្នើឲ្យលើកលែងទណ្ឌកម្មគ្រប់យ៉ាង ជាថ្នូរនឹងការបោះបង់ទីតាំងនុយក្លេអ៊ែរ Yongbyon តែមិនមែនជាផ្នែកណាមួយនៃកម្មវិធីនុយក្លេអ៊ែររបស់ខ្លួនឡើយ។ លោក ត្រាំ ទំនងគិតថា សំណើររបស់កូរ៉េខាងជើងទៅហួសពីអ្វីដែលអាមេរិកអាចធ្វើបាន។
យ៉ាងណាមិញ កូរ៉េខាងជើងនឹងមិនសាកល្បងនុយក្លេអ៊ែរ ឬបាញ់មីស៊ីលទៀតឡើយ។ នេះបើតាមការប្រកាសរបស់លោក ត្រាំ ដែលបន្តថា សុទិដ្ឋិនិយមដែលកើតឡើងអំឡុងពេលចរចា នឹងបើកផ្លូវដល់ការចរចានៅថ្ងៃអនាគត ហើយលោកចង់សម្រេចចកិច្ចការឲ្យបានត្រឹមត្រូវ ជាជាងធ្វើទាំងប្រញាប់ប្រញាល។ ខណៈជំនួបលើកទីពីរចប់ទៅដោយគ្មានបានផលអ្វីនោះ លោក ត្រាំ មិនទាន់ចង់បានជំនួបលើកទីបីទៀតឡើយ។
វាដូចជារឿងភ្ញាក់ផ្អើលខ្លាំង ដែលចុងក្រោយជំនួបរវាងលោក ត្រាំ និងលោក គីម បែរជាគ្មានបានផល ខណៈពេលជួបគ្នាដំបូង មេដឹកនាំទាំងពីរហាក់ល្អូកល្អឺននឹងគ្នាខ្លាំង។ ប្រមុខដឹកនាំវ័យក្មេងកូរ៉េខាងជើងថែមទាំងនិយាយថា លោកធ្វើដំណើរទៅវៀតណាម ក៏ព្រោះតែត្រៀមខ្លួនជាស្រេចក្នុងការរំសាយនុយក្លេអ៊ែរ។ ប៉ុន្តែនៅចុងក្រោយ លោក ត្រាំ ក៏បន្ទោសកូរ៉េខាងជើងដែលចង់បានសម្បទានខ្លាំងពេកទៅវិញ។
ក្រោយជំនួបគ្មានផ្លែផ្កានៅហាណូយ លោក ត្រាំ មិនរេរាយូរឡើយ ក៏ហោះទៅអាមេរិកវិញភ្លាម។ ចំណែកលោក គីម វិញ បន្តស្នាក់នៅទឹកដីវៀតណាម ដើម្បីធ្វើទស្សនកិច្ចពីរបីថ្ងៃទៀត។ តាមគម្រោង លោក គីម ចាកចេញពីទៅកាន់កូរ៉េខាងជើងវិញនៅថ្ងៃទី២ ខែមីនាខាងមុខ។
Tag:
អាមេរិក
កូរ៉េខាងជើង
វៀតណាម
ដូណាល់ ត្រាំ
គីម ជុងអ៊ុន
© រក្សាសិទ្ធិដោយ thmeythmey.com
