Nantes ប្តឹង FIFA ថា Cardiff មិនបង់ប្រាក់ ១៩លានដុល្លារ លើថ្លៃខ្លួន Sala

កីឡាអន្តរជាតិ

អន្តរជាតិ

Nantes ប្តឹង FIFA ថា Cardiff មិនបង់ប្រាក់ ១៩លានដុល្លារ លើថ្លៃខ្លួន Sala

28, Feb 2019 , 5:27 pm

រូបភាព

ដោយ: ទេព ពិទូរ្យ

សហព័ន្ធកីឡាបាល់ទាត់អន្តរជាតិ FIFA កំពុងស៊ើបអង្កេតជុំវិញការផ្ទេរ Emiliano Sala ពីក្លិប FC Nantes ទៅកាន់ Cardiff City បន្ទាប់ពីមានពាក្យបណ្តឹងពីខាងភាគីក្លិបបារាំង ជុំវិញការព្យារពេលបង់ប្រាក់លើការផ្ទេរខ្សែប្រយុទ្ធសញ្ជាតិអាហ្សង់ទីន។ នេះបើតាមការបញ្ជាក់របស់ FIFA នៅថ្ងៃទី២៧ ខែកុម្ភៈ ឆ្នាំ២០១៩។

អត្ថបទទាក់ទង

ជុំវិញការផ្ទេ Sala៖ Cardiff ពន្យារពេលបង់ប្រាក់ ១៩លានដុល្លារ ទៅ Nantes

Sala បានបញ្ចប់ការផ្ទេរពី Nantes នៃក្របខណ្ឌ Ligue 1 របស់បារាំង ដោយក្លាយជាកីឡាករមានតម្លៃខ្លួនខ្ពស់ជាងគេនៅ Cardiff ប្រមាណ ១៩លានដុល្លារអាមេរិក។ ជាអកុសលខ្សែប្រយុទ្ធសញ្ជាតិអាហ្សង់ទីន រួមទាំងពីឡុតលោក David Ibbotson ដែលធ្វើដំណើរតាមយន្តហោះពី Nantes ប្រទេសបារាំងទៅកាន់ Cardiff City បានជួបគ្រោះថ្នាក់ធ្លាក់យន្តហោះចូលសមុទ្រតែម្តង។

ជុំវិញការផ្ទេរខ្សែប្រយុទ្ធវ័យ២៨ឆ្នាំរូបនេះ ប្រធានក្លិប Cardiff លោក Mehmet Dalman ថាក្លិបលោកនឹងបង់ប្រាក់ចំនួន ១៩លានដុល្លារអាមេរិកទៅឲ្យ FC Nantes សម្រាប់ថ្លៃផ្ទេរ Sala ទៅតាមកិច្ចសន្យាដោយគ្រាន់តែសុំពន្យារពេលផ្ទេរប្រាក់រយៈពេលមួយសប្តាហ៍ប៉ុណ្នោះ។

បើតាមការផ្សាយរបស់ BBC ក្លិបដែលមានមូលដ្ឋានក្នុងក្របខណ្ឌ Premier League នេះត្រូវដល់ពេលកំណត់ទូទាត់ប្រាក់លើកទីមួយតាំងពីរថ្ងៃទី២០ ខែកុម្ភៈ ហើយក្លិប FC Nantes ក៏បានព្រមព្រៀងគ្នាពន្យាររហូតដល់ថ្ងៃទី២៧ ខែកុម្ភៈដែរ។

ប៉ុន្តែយ៉ាងណា ក្លិបទាំងពីរបែជាមានជម្លោះជុំវិញការពន្យារពេលបង់ប្រាក់នេះទៅវិញ ហើយថែមទាំងមានការប្តឹងផ្តល់ដល់ FIFA ទៀតផង។

អ្នកនាំពាក្យរបស់ FIFA និយាយថាស្ថាប័នលោកបានទទួលពាក្យបណ្តឹងពីភាគីក្លិប FC Nantes ទៅកាន់ Cardiff City ជុំវិញការផ្ទេរកីឡាករ Sala រួចហើយ និងកំពុងស៊ើបអង្កេតពីបញ្ហានេះ ហើយលោកក៏មិនទាន់មានការបកស្រាយអ្វីជុំវិញរឿងនេះដែរ៕