អន្តរជាតិ
កូរ៉េខាងជើងបដិសេធសម្ដីលោក ត្រាំ ដែលថា ខ្លួនទារអាមេរិកលើកលែងទណ្ឌកម្មទាំងស្រុង រដ្ឋមន្រ្តីការបរទេសកូរ៉េខាងជើង រី យ៉ុងហូ (ឆ្វេង) និងអនុរដ្ឋមន្រ្តីការបរទេស ឆេ ស៊ុនហ៊ី (ស្ដាំ) នាសន្និសីទសារព័ត៌មាននៅវៀតណាម។ (រូបភាព AFP)
× អាមេរិក និងកូរ៉េខាងជើង នៅថ្ងៃទី២៨ ខែកុម្ភៈ បានបិទបញ្ចប់ជំនួបលើកទីពីររបស់ខ្លួន ដោយគ្មានបានលទ្ធផលផ្លែផ្កាអ្វីឡើយ។ មុនជិះយន្តហោះទៅអាមេរិកវិញ ប្រធានាធិបតី ដូណាល់ ត្រាំ បានរុញកំហុសលើកូរ៉េខាងជើង ដោយអះអាងថា កូរ៉េខាងជើងចង់បានការលើកលែងទណ្ឌកម្មទាំងអស់ ដែលនោះជារឿងអាមេរិកមិនអាចធ្វើបានឡើយ។ មិនប៉ុន្មានម៉ោងក្រោយមក កូរ៉េខាងជើងបានចេញមកប្រកាសបដិសេធការលើកឡើងបែបនេះ។
ក្នុងជំនួបកម្រជាមួយប្រព័ន្ធផ្សព្វផ្សាយ រដ្ឋមន្ត្រីការបរទេសកូរ៉េខាងជើង រី យ៉ុងហូ បានធ្វើសន្និសីទសារព័ត៌មានពាក់កណ្ដាលយប់ដ៏បន្ទាន់មួយជុំវិញលទ្ធផលជំនួបរវាងមេដឹកនាំកូរ៉េខាងជើង គីម ជុងអ៊ុន និងប្រធានាធិបតីអាមេរិក ដូណាល់ ត្រាំ ដែលគ្មានបានអ្វីនោះ។ ប្រមុខការទូតកូរ៉េខាងជើង បានផ្ដល់ព័ត៌មានផ្ទុយពីខាងអាមេរិកពីមូលហេតុដែលនាំឲ្យជំនួបលើកទីពីរនៅវៀតណាម មិនមានកិច្ចព្រមព្រៀងអ្វីសោះ។
ក្នុងសន្និសីទសារព័ត៌មានមុនហោះទៅអាមេរិកវិញថ្ងៃទី២៨ ខែកុម្ភៈ លោក ត្រាំ និយាយថា ភាគីទាំងពីរខ្វែងគំនិតគ្នាលើលទ្ធភាពនៃការដកទណ្ឌកម្មរបស់អាមេរិកលើកូរ៉េខាងជើង ដែលជាការទាមទាររបស់ក្រុងព្យុងយ៉ាងជាយូរមកហើយ។ លោកប្រធានាធិបតីអាមេរិកអះអាងថា វាក៏ព្រោះតែទណ្ឌកម្មតែម្ដង គឺកូរ៉េខាងជើងចង់ឲ្យអាមេរិកទណ្ឌកម្មរបស់ខ្លួនទាំងស្រុង ប៉ុន្តែអាមេរិកមិនអាចធ្វើតាមការលក្ខខណ្ឌនេះបានឡើយ។
មិនមែនលុបទណ្ឌកម្មទាំងស្រុងឡើយ តែផ្នែកខ្លះប៉ុណ្ណោះ។ នេះជាការឆ្លើយតបរបស់លោក រី ក្នុងសន្និសីទសារព័ត៌មានភ្លាមនៅរដ្ឋធានីហាណូយ។ បើតាមទីភ្នាក់ងារព័ត៌មាន AFP ប្រមុខការទូតកូរ៉េខាងជើងដែលចូលរួមជំនួបពីរថ្ងៃនេះដែរ បញ្ជាក់ថា ក្រុងព្យុងយ៉ាងស្នើបោះបង់ទាំងស្រុង និងអចិន្ត្រៃយ៍ទីតាំងនុយក្លេអ៊ែរ Yongbyon ប្រសិនបើអាមេរិកយល់ព្រមដកទណ្ឌកម្មទាំងឡាយដែលប៉ះពាល់សេដ្ឋកិច្ចស៊ីវិល និងជីវភាពប្រជាជនរបស់ខ្លួន។
សំណើខាងលើនេះ ជាជំហានដ៏ធំបំផុតដែលកូរ៉េខាងជើងអាចធ្វើបាននៅដំណាក់កាលបច្ចុប្បន្ន និងក្នុងកម្រិតនៃការទុកចិត្តដូចសព្វថ្ងៃនេះ។ នេះជាការពន្យល់បន្ថែមរបស់លោក រី ដែលបន្តថា ជំហរបែបនេះ នឹងមិនផ្លាស់ប្ដូរឡើយ ហើយសំណើបិទ Yongbyon ក៏មិនផ្លាស់ប្ដូរដែរ ទោះជាអាមេរិកចង់ចរចាប៉ុន្មានដងទៀតក៏ដោយ។
ជុំវិញបញ្ហានេះ លោក ត្រាំ ក៏លើកឡើងដែរថា សំណើរបស់កូរ៉េខាងជើងមិនសូវសំខាន់ឡើយក្នុងដំណើរការរំសាយនុយក្លេអ៊ែរ ហើយអាមេរិកចង់ឲ្យកូរ៉េខាងជើងធ្វើសកម្មភាពធំដុំជាងនេះ។ ទោះជាយ៉ាងណា ប្រធានាធិបតីអាមេរិកនៅតែមានសុទិដ្ឋិនិយមដដែល ហើយភាគីទាំងពីរនឹងមានការចរចានៅថ្ងៃអនាគតបន្តទៀត។
មិនដូចក្ដីរំពឹងទុក នៅចុងក្រោយ ជំនួបរវាងលោក ត្រាំ និងលោក គីម បែរជាគ្មានបានផលទៅវិញ ខណៈពេលជួបគ្នាដំបូង មេដឹកនាំទាំងពីរហាក់ល្អូកល្អឺននឹងគ្នាខ្លាំង។ មេដឹកនាំកូរ៉េខាងជើងថែមទាំងនិយាយថា លោកធ្វើដំណើរទៅជួបលោក ត្រាំ ដល់វៀតណាម ក៏ព្រោះលោកតែត្រៀមខ្លួនជាស្រេចក្នុងការរំសាយនុយក្លេអ៊ែរ។ ប៉ុន្តែនៅចុងក្រោយ លោក ត្រាំ ក៏បន្ទោសកូរ៉េខាងជើងដែលចង់បានសម្បទានខ្លាំងពេកទៅវិញ៕
Tag:
កូរ៉េខាងជើង
អាមេរិក
ដូណាល់ ត្រាំ
គីម ជុងអ៊ុន
© រក្សាសិទ្ធិដោយ thmeythmey.com