អាមេរិក ផ្ដល់រង្វាន់១លានដុល្លារសម្រាប់ព័ត៌មានពីទីតាំងលាក់ខ្លួនកូនប្រុស ប៊ិនឡាដិន

អន្តរជាតិ

អាមេរិក ផ្ដល់រង្វាន់១លានដុល្លារសម្រាប់ព័ត៌មានពីទីតាំងលាក់ខ្លួនកូនប្រុស ប៊ិនឡាដិន

01, Mar 2019 , 2:52 pm

រូបភាព

ដោយ:

សហរដ្ឋអាមេរិក បានប្រកាសផ្តល់ប្រាក់រង្វាន់ចំនួន១លានដុល្លារសម្រាប់ព័ត៌មានស្តីពីទីតាំងរបស់កូនប្រុសមេដឹកនាំក្រុមឧទ្ទាមអាល់កៃដា អូសាម៉ា ប៊ិនឡាដិន ។ ក្រុងវ៉ាស៊ីនតោនអះអាងថា ហាមសា ប៊ិនឡាដិន កំពុងលេចមុខជាមេដឹកនាំថ្មីរបស់ក្រុមជ្រុលនិយម ព្រមទាំងត្រៀមវាយប្រហារលើសហរដ្ឋអាមេរិក និងសម្ព័ន្ធមិត្តខ្លួនបណ្តាប្រទេសលោកខាងលិចទៀតផង។

ជាច្រើនឆ្នាំមកហើយ សហរដ្ឋអាមេរិកបានស្វះស្វែងរកទីតាំងរបស់ ហាមសា ប៊ិនឡាដិន ដែលត្រូវបានអ្នកខ្លះស្គាល់ថា «រជ្ជទាយាទនៃក្រុមជីហាត» ។ កន្លងទៅរបាយការណ៍មួយចំនួន បង្ហាញថា ហាមសា កំពុងរស់នៅក្នុងប្រទេសប៉ាគីស្ថាន, អាហ្វហ្កានីស្ថាន, ស៊ីរី ឬឃុំខ្លួននៅក្នុងផ្ទះនៅអ៊ីរ៉ង់។

«ហាមសា ប៊ិនឡាដិន គឺជាកូនប្រុសអតីតមេដឹកនាំអាល់កៃដា អូសាម៉ា ប៊ិនឡាដិន និងកំពុងលេចមុខជាមេដឹកនាំម្នាក់ក្នុងក្រុមអាល់កៃដាផងដែរ»។ នេះបើតាមសេចក្តីថ្លែងការណ៍របស់ក្រសួងការបរទេសអាមេរិកនៅថ្ងៃទី២៨ ខែកុម្ភៈ ដោយបន្ថែមថា ប្រាក់រង្វាន់១លានដុល្លារនឹងផ្តល់ជូនអ្នកដែលផ្តល់ដំណឹងពីទីតាំងរបស់ភេរវជនរូបនេះ។

កាលពីពេលកន្លងទៅ កូនប្រុសវ័យឆ្នាំ៣០របស់មេអាល់កៃដារូបនេះ ធ្លាប់បានគំរាមវាយប្រហារលើសហរដ្ឋអាមេរិក ដើម្បីសងសឹកនឹងការសម្លាប់ឳពុកខ្លួនកាលពីឆ្នាំ២០១១ ដោយកងកម្លាំងពិសេសក្នុងអាណត្តិលោក បារ៉ាក់ អូប៉ាម៉ា។ ប្រតិបត្តិការពិសេសនោះត្រូវបានឡើងក្នុងប៉ាគីស្ថាន។ នេះបើតាមការចុះផ្សាយរបស់សារព័ត៌មាន AFP ។

ទន្ទឹមនឹងនេះ ក្នុងឆ្នាំ២០១៥ ហាមសា ប៊ិនឡាដិន ត្រូវបានគេរាយការណ៍ថា បានបញ្ចេញសារជាខ្សែអាត់សំឡេងមួយ ដោយទទូចឲ្យក្រុមជ្រុលនិយមក្នុងប្រទេសស៊ីរីរួបរួមគ្នាចូលប្រយុទ្ធ ក្នុងគោលដៅទាមទារសេរីភាពឲ្យប៉ាឡេស្ទីន។ ចំណែកឯក្នុងសារដោយឡែកមួយទៀត កាលពីឆ្នាំមុន ដោយដើរតាមគន្លងរបស់ឳពុកខ្លួន ហាមសា បានទទូចឲ្យមានការផ្តួលរំលំមេដឹកនាំក្នុងអារ៉ាប៊ីសាអូឌីតថែមទៀតផង៕