កំណើនសំណល់ប្លាស្ទិកជាបញ្ហាប្រឈមធំសម្រាប់កម្ពុជា ដែលវាតម្រូវឲ្យមានដំណោះស្រាយបន្ទាន់។ បច្ចុប្បន្នមានការការផ្តល់យោបល់ឲ្យមានការអនុវត្តវិធានការហាមឃាត់ទាំងស្រុងលើការប្រើប្រាស់ប្លាស្ទិកថែមទៀត។ ប៉ុន្តែអ្នកជំនាញយល់ថា ការហាមឃាត់ការប្រើប្រាស់ប្លាស្ទិកទាំងស្រុងមិនសមស្របឡើយក្នុងបរិបទកម្ពុជាបច្ចុប្បន្ន។
«យើងមិនទាន់អាចអនុវត្តវិធានការហាមឃាត់ប្លាស្ទិកបានឡើយ។ ប៉ុន្តែវាអាចទៅរួចនៅពេលអនាគត»។ នេះជាការលើកឡើងរបស់លោក នី ផល្លី អគ្គលេខាធិការរងនៃគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជានៃក្រសួងទេសចរណ៍ នាកិច្ចពិភាក្សាអាហារពេលព្រឹកស្តីពី «ផលប៉ះពាល់នៃសំណល់ប្លាស្ទិក និងដំណោះស្រាយ» រៀបចំឡើងដោយសភាពាណិជ្ជកម្មអឺរ៉ុបប្រចាំនៅកម្ពុជា (EuroCham Cambodia) នៅសណ្ឋាគារកាំបូឌីយ៉ាណានៅព្រឹកថ្ងៃ២៨ ខែកុម្ភៈ។
អគ្គលេខាធិការរងរូបនេះបានពន្យល់បន្ថែមដែរថា បច្ចុប្បន្នកម្ពុជាមានវិធានការជំរុញការកាត់បន្ថយការប្រើប្រាស់ប្លាស្ទិកតាមរយៈការគិតលុយថ្លៃថង់ប្លាស្ទិករួចរាល់ហើយ ហើយលោកជឿជាក់ថា ការបន្តតាមដានបន្ថែមពីការប្រែប្រួលនៃឥរិយាបថរបស់ប្រជាជនជារឿងចាំបាច់។
វាគ្មិននាវេទិកាពិភាក្សាអាហារពេលព្រឹកស្តីពីប្រធានបទគ្រប់គ្រងសំណល់ប្លាស្ទិក រៀបចំដោយសភាពាណិជ្ជកម្មអឺរ៉ុបនៅកម្ពុជាថ្ងៃ ២៨ ខែកុម្ភៈ
កាលខែមេសាពីឆ្នាំ ២០១៨ ក្រសួងបរិស្ថានកម្ពុជាបានដាក់ចេញបទបញ្ញត្តិថ្មីដែលគ្រប់គ្រងការប្រើប្រាស់ថង់ប្លាស្ទិកដោយតម្រូវឲ្យផ្សារធំៗដូចជា ឡាក់គី និង Aeon គិតតម្លៃបន្ថែម ១០សេនឬ ៤០០រៀលសម្រាប់ថង់មួយ។ ក្រសួងក៏កំពុងពិចារណាជំរុញឲ្យមានការប្រើប្រាស់កាបូប ជំនួសថង់ប្លាស្ទិកផងដែរ។
ទាក់ទិននឹងបញ្ហានេះ លោក ឌិន សុមេធារិទ្ធ នាយកប្រតិបត្តិសណ្ឋាគារ Frangipani Villa និងជាប្រធានសមាគមសណ្ឋាគារកម្ពុជា បានបង្ហាញឯកភាពថា ការហាមប្រាមការប្រើប្រាស់ប្លាស្ទិកទាំងស្រុងមិនមែនជាដំណោះស្រាយសមស្របទេ។
ផ្ទុយទៅវិញលោកគាំទ្រចំណាត់ការយកថ្លៃបន្ថែមលើការប្រើថង់ប្លាស្ទិក ដែលកម្ពុជាកំពុងអនុវត្តបច្ចុប្បន្ន ដ្បិតវាមានប្រសិទ្ធភាពរួចទៅហើយ ក្នុងការជំរុញឲ្យមានការផ្លាស់ប្តូរឥរិយាបថរបស់ប្រជាជនក្នុងការប្រើថង់ប្លាស្ទិក។ លោកក៏រំពឹងថា ការអនុវត្តវិធានការនេះនឹងឈានដល់ការទីផ្សារតូចៗនៅពេលខាងមុខ។
«វាមិនបាច់មានការហាមប្រាមទាំងស្រុងលើប្លាស្ទិកទេ។ យើងឃើញមានការផ្លាស់ប្តូរឥរិយាបថរួចហើយក្នុងចំណោមអ្នកប្រើប្រាស់ថង់ប្លាស្ទិក ក្រោយមានការយកថ្លៃបន្ថែមលើថង់ប្លាស្ទិក។ ជាធម្មតាទេ ឲ្យតឹងពេកវាដាច់។ ដូច្នេះវាចាំបាច់ត្រូវធ្វើសន្សឹមៗ។ ឥឡូវការអនុវត្តការយកតម្លៃបន្ថែមធ្វើនៅផ្សារទំនើបធំៗ បន្តិចទៀតវានឹងអាចមានការអនុវត្តលើទីផ្សារតូចៗផ្សេងទៀតដែរ»។ លោក សុមេធារិទ្ធ បានថ្លែងប្រាប់សារព័ត៌មានថ្មីៗដូច្នេះ។
ចំណែកលោកស្រី Marianne Teoh ប្រធានគម្រោងអភិរក្សតំបន់សមុទ្រនិងឆ្នេរនៃអង្គការ Fauna and Flora International ក៏យល់ឃើញស្រដៀងគ្នាដែរថា ក្នុងស្ថានភាពបច្ចុប្បន្ន វិធានការហាមប្រាមសំណល់ប្លាស្ទិកទាំងស្រុងប្រហែលមិនមែនដំណោះស្រាយល្អប្រសើរសម្រាប់កម្ពុជាទេ។
អ្នកជំនាញរូបនេះពន្យល់បន្ថែម វាមិនអាចប្រកែកបានឡើយដែលថា ប្លាស្ទិកមានតួនាទីសំខាន់ក្នុងជីវភាពរស់នៅរបស់ប្រជាជនកម្ពុជា ដោយសារគ្មានផលិតផ្សេងទៀតសម្រាប់ប្រើប្រាស់ជំនួស។ ជារួម បើគ្មានការសិក្សាលម្អិតទេ ការអនុវត្តវិធានការនេះអាចនឹងបង្កឲ្យមានផលប៉ះពាល់អវិជ្ជមានខ្លាំងថែមទៀត។
«ខ្ញុំគិតថា វាពិតជាចាំបាច់ត្រូវមានវិធានច្បាប់តឹងរ៉ឹងដើម្បីដោះស្រាយបញ្ហាប្លាស្ទិក។ ប្លាស្ទិកនៅតែមានតួនាទីវិជ្ជមានក្នុងសេដ្ឋកិច្ចកម្ពុជា ក៏ដូចជាក្នុងសហគមន៍នានា។ ជារួម ប្រជាជនជាច្រើននៅពឹងពាក់លើការប្រើប្រាស់ប្លាស្ទិក ត្បិតមិនមានអ្វីផ្សេងប្រើប្រាស់ជំនួសប្លាស្ទិកនៅឡើយ។ ដូច្នេះ វាប្រហែលជាប៉ះពាល់ដល់វិស័យច្រើនទៀត បើយើងហាមឃាត់ប្លាស្ទិកទាំងស្រុង។ ធម្មតាទេ ការអនុវត្តចំណាត់ការភ្លាមៗ ដោយមិនបានរៀបចំជាមុនគ្រប់ជ្រុងជ្រោយ និងសិក្សាឲ្យបានស៊ីជម្រៅនឹងបង្កើឲ្យមានបញ្ហាច្រើន»។ លោកស្រី Marianne បានបកស្រាយប្រាប់សារព័ត៌មានថ្មីៗដូច្នេះ៕