កីឡាអន្តរជាតិ
អន្តរជាតិ
Son និង Pochettino ឈ្នះពានកីឡាករនិងគ្រូឆ្នើមប្រចាំឆ្នាំនៅ Premier League
× Son Heung-min ខ្សែបម្រើក្រុម Tottenham Hotspur បានក្លាយជាម្ចាស់ពានកីឡាករឆ្នើមបំផុតប្រចាំឆ្នាំក្នុងក្របខណ្ឌ Premier League ក្នុងកម្មវិធី London Football Awards ដែលរៀបចំឡើងក្នុងក្រុងឡុងដ៏ នៅរាត្រីថ្ងៃទី២៨ ខែកុម្ភៈ។ អ្នកចាត់ការទូទៅលោក Mauricio Pochettino ក៏ជាប់ជាគ្រូបង្វឹកឆ្នើមប្រចាំឆ្នាំផងដែរ។
សមាជិកក្រុមជម្រើសជាតិកូរ៉េខាងត្បូងរូបនេះ បានក្លាយជាកីឡាករដ៏សំខាន់សម្រាប់ Spurs នៅរដូវកាលនេះ ជាមួយនឹងការស៊ុតបញ្ចូលទី ១៦គ្រាប់ និងបញ្ជូនឲ្យដៃគូសម្រេចទី៩លើកក្នុងការបង្ហាញខ្លួនចំនួន ៣៤ប្រកួត។
Son អាយុ២៦ឆ្នាំ ដែលបានជួយជម្រើជាតិខ្លួនឈ្នះមេដាយមាសព្រឹត្តិការណ៍ Asian Games ឆ្នាំ២០១៨ ទទួលសំឡេងឆ្នោតនាំមុខមិត្តរួមក្រុម Harry Kane ខ្សែប្រយុទ្ធ Pierre-Emerick Aubameyang របស់ Arsenal និង Eden Hazard ខ្សែបម្រើ Chelsea ដើម្បីឈ្នះពានរង្វាន់ប្រចាំឆ្នាំសម្រាប់កីឡាករក្នុងក្របខណ្ឌកំពូលអង់គ្លេសនេះ។ កម្មវិធី London Football Awards នេះរៀបចំឡើង ដើម្បីផ្តល់រង្វាន់សម្រាប់តែកីឡាករដែលលេងនៅក្នុងមូលដ្ឋានទីក្រុងឡុងដ៏ប៉ុណ្ណោះ។
ដោយឡែកគ្រូរបស់ Son លោក Pochettino ក៏ត្រូវបានបោះឆ្នោត ដើម្បីក្លាយជាម្ចាស់ពានអ្នកចាត់ការទូទៅឆ្នើមប្រចាំឆ្នាំផងដែរ បើទោះមិនអាចដឹកនាំក្រុមឈ្នះពានក្តី។
ក្រៅពីពានរង្វាន់នេះ ក៏មានការផ្តល់ជូនពានសម្រាប់កីឡាករឆ្នើមៗដទៃទៀតជាច្រើនរូបផងដែរដូចជា៖
- Declan Rice ខ្សែបម្រើក្រុម West Ham ឈ្នះពានកីឡាករវ័យក្មេងល្អប្រចាំឆ្នាំ
- Andros Townsend ខ្សែបម្រើ Crystal Palace ឈ្នះពានគ្រាប់បាល់ល្អប្រចាំឆ្នាំ
- Ben Foster អ្នកចាំទីក្រុម Watford ឈ្នះពានអ្នកចាំល្អប្រចាំឆ្នាំ
- Neal Maupay ខ្សែប្រយុទ្ធក្រុម Brentford ឈ្នះពានកីឡាករល្អប្រចាំឆ្នាំនៅ EPL Cup
- Vivianne Miedema កីឡាការិនីក្រុម Arsenal ឈ្នះពានកីឡាការិនីឆ្នើមប្រចាំឆ្នាំ៕
Tag:
បាល់ទាត់
Son Heung-min
Mauricio Pochettino
London Football Awards
© រក្សាសិទ្ធិដោយ thmeythmey.com