សម្តេចនាយករដ្ឋមន្ត្រី ហ៊ុន សែន បង្ហាញឆន្ទៈកាន់តែខ្លាំងក្លា ក្នុងការការពារប្រជាពលរដ្ឋ ហើយព្រមានមិនលើកលែងឲ្យមន្ត្រីណា ដែលបំពារបំពានប្រជាពលរដ្ឋ។ ជាក់ស្តែង នាយករដ្ឋមន្ត្រី បានចេញអនុក្រឹត្យនៅថ្ងៃទី១ ខែកុម្ភៈ ឆ្នាំ២០១៩នេះ ដោយសម្រេចដកអភិបាលរងខេត្តព្រះសីហនុពីររូប ដោយសារតែមានការផ្ទុះហិង្សារវាងកម្លាំងសមត្ថកិច្ច ជាមួយប្រជាពលរដ្ឋ ដែលទៅតវ៉ារឿងដីធ្លី។
សម្តេច ហ៊ុន សែន អះអាងថា ការដកអភិបាលរងខេត្តទាំងពីរនេះ គឺធ្វើឡើងដោយបង្ខំចិត្ត ដើម្បីអនុវត្តអភិក្រមទីប្រាំឲ្យបាន គឺ «ការវះកាត់»។ បន្ទាប់មក នាយករដ្ឋមន្ត្រី ក៏យកករណីអភិបាលរងខេត្តទាំងពីរ ទៅព្រមានដល់មន្ត្រីផ្សេងទៀត។
ប្រមុខរដ្ឋាភិបាល បានហៅមន្ត្រីខិលខូច ថាជាគ្រាប់ក្រួសនិងខ្សាច់ ដែលត្រូវតែយកចេញពីស្បែកជើង ទើបអាចដើរទៅមុខទៀតបាន។ ប្រមុខរដ្ឋាភិបាល ប្តេជ្ញាចាត់វិធានការលើគ្រប់មន្ត្រីខិលខូចទាំងនោះ ទោះមានអំណាចធំឬឋានៈខ្ពស់កម្រិតណាក៏ដោយ ហើយក៏មិនចាច់ចំណាយពេលអប់រំឬនិយាយជាមួយពួកគេទៀតដែរ។
តាមរយៈសារលើទំព័រហ្វេសប៊ុក មេដឹកនាំកម្ពុជា បានសរសេរយ៉ាងដូច្នេះថា៖«ដល់ពេលនេះ ខ្លាក៏ត្រូវវាយ ពស់ក៏ត្រូវវាយ កណ្តុរក៏ត្រូវវាយ រុយក៏ត្រូវវាយ ឲ្យតែបំពានលើផលប្រយោជន៍ប្រជាជន»។
ថ្មីៗនេះ ព្រះមហាក្សត្រ បានបញ្ចប់តំណែងលោក គឹម រស្មី ជាមេបញ្ជាការកងរាជអាវុធហត្ថខេត្តរតនគិរី តាមសំណើរបស់នាយករដ្ឋមន្រ្តី។ លោក គឹម រស្មី ត្រូវបានដកចេញពីតំណែង ក្រោយពីលោក ចែកលុយឲ្យកូន៥នាក់ ដោយម្នាក់ៗ ទទួលបាន១០ម៉ឺនដុល្លារ ក្នុងថ្ងៃចូលឆ្នាំចិនកន្លងទៅ។ ប្រមុខរដ្ឋាភិបាល ក៏បានហៅការដកលោក គឹម រស្មី ថាជាការអនុវត្តអភិក្រមទីប្រាំងដែរ ហើយត្រូវបានធ្វើឡើងទាំងឈឺចាប់។
មិនត្រឹមតែត្រូវបានដកចេញពីតំណែងទេ លោក គឹម រស្មី នៅត្រូវបានអង្គភាពប្រឆាំងអំពើពុករលួយ ស៊ើបអង្កេតលើទ្រព្យសម្បត្តិរបស់លោកថែមទៀត។ អង្គភាពប្រឆាំងអំពើពុករលួយ បានចេញសេចក្តីជូនដំណឹង កាលពីថ្ងៃទី២៧ ខែកុម្ភៈថា ការស៊ើបអង្កេតលើករណីរបស់លោក គឹម រស្មី ជិតចប់សព្វគ្រប់ហើយ។
ស៊ើបអង្កេតលើលោក គឹម រស្មី មិនទាន់បានប៉ុន្មានផង អង្គភាពប្រឆាំងអំពើពុករលួយ ក៏ចាប់ផ្តើមស៊ើបអង្កេតលើមន្ត្រីនគរបាលម្នាក់ទៀត គឺលោក ស្រេង សុខា ស្នងការរងខេត្តកណ្តាល។ ការស៊ើបអង្កេតនេះ គឺធ្វើឡើង បន្ទាប់ពីអ្នកប្រើប្រាស់បណ្តាញសង្គម នាំគ្នារិះគន់លោក ស្រេង សុខា ថា មានទ្រព្យសម្បត្តិច្រើន រហូតដល់មានលទ្ធភាពបង្គាប់ឲ្យខាងស្រី ដល់ទៅ១០ម៉ឺនដុល្លារ និង ឡានលុចស៊ីស៥៧០។
គេនៅចាំថា កន្លងមក សម្តេច ហ៊ុន សែន មិនមែនព្រមានតែមន្ត្រីទេ សូម្បីតែមនុស្សត្រកូលហ៊ុនខ្លួនឯង ក៏រងការព្រមានដែរ។ សម្តេច ហ៊ុន សែន ធ្លាប់ប្រកាសថា ត្រកូលហ៊ុនក៏ដោយ ឲ្យតែធ្វើអាក្រក់ឬធ្វើខុសច្បាប់ ត្រូវតែប្រឈមមុខនឹងច្បាប់ដូចគេឯង៕