ជាតិ
សេដ្ឋកិច្ច
CDC ព្រមឱ្យក្រុមហ៊ុន៤ មានទុនជិត២០លានដុល្លារបង្កើតរោងចក្រកាត់ដេរសម្លៀកបំពាក់-កាបូប នៅ ភ្នំពេញ កណ្តាល កំពង់ស្ពឺ
× ភ្នំពេញ៖ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា ដែលហៅកាត់ថាCDC បានសម្រេចឱ្យក្រុមហ៊ុនថ្មីបួនទៀត បង្កើតរោងចក្រកាត់ដេរសម្លៀកបំពាក់ និងកាបូបនៅក្នុងរាជធានីភ្នំពេញ ខេត្តកណ្តាល និងកំពង់ស្ពឺ។ ក្រុមហ៊ុនទាំងបួននេះ មានទុនវិនិយោគជិត២០លានដុល្លារ ដែលអាចផ្តល់ឱកាសការងារដល់ប្រជាជនក្នុងស្រុក បានជិត៧ពាន់កន្លែង។
ក្នុងសេចក្តីជូនដំណឹងរបស់ CDC កាលពីថ្ងៃទី២៨ កុម្ភៈ ឆ្នាំ២០១៩ ក្រុមហ៊ុនទាំងបួននោះមាន៖ ក្រុមហ៊ុន NEWCOMER LUGGAGE AND BAGS (CAMBODIA) MANUFACTURING និងក្រុមហ៊ុន HAO MAI (CAMBODIA) GARMENT គម្រោងបង្កើតរោងចក្រកាត់ដេរសម្លៀកបំពាក់ និងកាបូប នៅក្នុងស្រុកសំរោងទង ខេត្តកំពង់ស្ពឺ។ ក្រុមហ៊ុនពីរនេះ មានទុនវិនិយោគសរុប៦,២លានដុល្លារ និងអាចបង្កើតការងារបានជិត៣ពាន់កន្លែង។
ក្រុមហ៊ុន ANDERSEN INDUSTRIES មានទុនប្រមាណ ៩លានដុល្លារ គ្រោងបង្កើតរោងចក្រកាត់ដេរសម្លៀកបំពាក់ពេទ្យ នៅក្នុងភូមិស្រះសង្គម ឃុំពើក ស្រុកអង្គស្នួល ខេត្តកណ្តាល ដែលផ្តល់ឱកាសការងារបានជិត២ពាន់កន្លែង។
ដោយឡែក ក្រុមហ៊ុនYUN LAI GARMENT គ្រោងបង្កើតរោងចក្រកាត់ដេរសម្លៀកបំពាក់ ជាមួយទុនវិនិយោគ៤លានដុល្លារ នៅខណ្ឌមានជ័យ រាជធានីភ្នំពេញ។ រោងចក្រនេះ មាននឹងផ្តល់ឱកាសការងារជិត២ពាន់កន្លែង ដល់ប្រជាពលរដ្ឋ។ បើតាមCDC៕
Tag:
ជាតិ
សេដ្ឋកិច្ច
CDC
រោងចក្រ
កំពង់ស្ពឺ
កណ្តាល
© រក្សាសិទ្ធិដោយ thmeythmey.com