វិទ្យាសាស្រ្ត និង បច្ចេកវិទ្យា
អន្តរជាតិ
សត្វអំពិលអំពែកអាចបញ្ចេញពន្លឺបានដូចម្តេច?
× មានមនុស្សភាគច្រើន ជាពិសេសក្មេងតូចៗតែងមានចម្ងល់សាមញ្ញមួយពីមូលហេតុដែលធ្វើឲ្យសត្វអំពិលអំពែកអាចបញ្ចេញពន្លឺដោយខ្លួនឯងបាននៅពេលយប់។ តើសត្វល្អិតមួយនេះប្រើចរន្តអគ្គីសនីមែនទេ? ចម្លើយគឺមិនមែនទេ។
យោងតាមការបកស្រាយរបស់គេហទំព័រវិទ្យាសាស្ត្រមួយមានឈ្មោះថា scientificamerican.com សត្វអំពិលអំពែកប្រើប្រាស់ប្រតិកម្មគីមីមួយបែបយ៉ាងពិសេសក្នុងការបញ្ចេញពន្លឺមកខាងក្រៅ។
ប្រតិកម្មនោះ បើនិយាយឲ្យងាយស្តាប់ គឺកើតឡើងរវាងការរលាយចូលគ្នានូវធាតុកាល់ស្យូម, ម៉ូលេគុល Adenosine Triphosphate (ATP) ដែលជាម៉ូលេគុលសរីរាង្គសម្រាប់ផលិតថាមពល និងអុកស៊ីសែននៅក្នុងខ្យល់។ ប្រតិកម្មគីមីប្រភេទនេះត្រូវបានគេឲ្យឈ្មោះថា ប្រភេទប្រតិកម្ម Luciferin ដែលមាននាទីបញ្ចេញពន្លឺ។ មិនមែនមានតែសត្វអំពិលអំពែកដែលបញ្ចេញពន្លឺនោះទេ។
ប្លង់តុង និងសត្វរស់នៅក្នុងជម្រៅសមុទ្រជ្រៅជាច្រើនទៀតក៏អាចផលិតពន្លឺក្នុងលំនាំស្រដៀងគ្នាដែរ។ ពន្លឺដែលបានផលិតនេះមិនបញ្ចេញកម្តៅក្តៅដូចអំពូលអគ្គីសនីដែលមនុស្សប្រើប្រាស់នោះទេ។ វាជាពន្លឺគ្មានកម្តៅ។ លំនាំដែលសត្វបញ្ចេញពន្លឺដោយខ្លួនឯងនេះមានឈ្មោះថា Bioluminescent ។
ចុះអំពិលអំពែកបញ្ចេញពន្លឺក្នុងគោលបំណងអ្វី? នេះជាសំណួរដែលមិនទាន់មានចម្លើយច្បាស់លាស់នៅឡើយទេ។ តាមការសិក្សា អ្នកស្រាវជ្រាវសន្មត់ថា ពន្លឺរបស់វាអាចបញ្ជាក់ពីក្រុម បក្សពួក និងប្រភេទ។ ពេលខ្លះ ដង្កូវអំពិលអំពែលប្រើប្រាស់ពន្លឺនោះដើម្បីការពារខ្លួនវាពីសត្វរំពារ។ ពន្លឺក៏អាចជាសញ្ញាដែលសម្គាល់ភេទ និងពេលខ្លះសត្វឈ្មោលអាចបញ្ចេញសញ្ញាទាំងនោះក្នុងការទាក់ទាញសត្វញី។ ធម្មជាតិគឺពោរពេញទៅដោយអាថ៌កំបាំង និងភាពអស្ចារ្យ៕
© រក្សាសិទ្ធិដោយ thmeythmey.com