សង្គមអន្តរជាតិ
អន្តរជាតិ
ទារកជប៉ុនកើតមកមានទម្ងន់តែ២៦៨ក្រាម ហើយ៦ខែក្រោយមក កើនដល់៣,២គីឡូក្រាម
× ទារកជប៉ុនដែលកើតមក មានទម្ងន់តែ២៦៨ក្រាម (ឬ០,២៦៨គីឡូក្រាម) ត្រូវបានបញ្ជូនទៅឲ្យថែរក្សានៅផ្ទះរបស់ខ្លួនហើយ បន្ទាប់ពីទទួលនូវការថែទាំយ៉ាងយកចិត្តទុកដាក់នៅមន្ទីរពេទ្យក្នុងក្រុងតូក្យូ អស់រយៈពេលជាច្រើនខែ។
ទារកបានប្រសូតកាលពីខែសីហា ឆ្នាំ២០១៨ ក្រោយម្តាយពរពោះបានត្រឹមតែរយៈពេល២៤សប្តាហ៍។ ក្រុមគ្រូពេទ្យនៅសាកលវិទ្យាល័យ Keio University បានវះកាត់ស្បូនបើកពោះដើម្បីយកទារកចេញ ដោយសារតែមិនមានការឡើងទម្ងន់ទាល់តែសោះពីមួយថ្ងៃទៅមួយថ្ងៃ។
ទោះបីជាយ៉ាងណាក៏ដោយ ទារកនោះ បានប្រសូតដោយសុវត្ថិភាព ហើយបន្តស្ថិតក្រោមការថែទាំនៅមន្ទីរពេទ្យដោយផ្ទាល់។ រយៈពេល៦ខែ ទារកបានឡើងដល់៣,២គីឡូក្រាម ដែលមានចំនួនគុណ១២ដងលើទម្ងន់ដែលគេទើបកើត។
លោក Takeshi Arimitsu វេជ្ជបណ្ឌិតម្នាក់ប្រចាំសាកលវិទ្យាល័យ បានអះអាងប្រាប់ Kyod News ថា៖ «ខ្ញុំចង់ឲ្យមនុស្សទាំងអស់ដឹងថា ទារកអាចត្រឡប់ទៅវិញដោយសុខភាពមាំទាំ បើទោះបីជាគេមានទំហំតូចក៏ដោយ»។
ម្តាយរបស់ទារកនោះ រំភើបយ៉ាងខ្លាំងដែលឃើញការឡើងទម្ងន់របស់កូនខ្លួន។ គាត់បានរៀបរាប់យ៉ាងដូច្នេះថា៖ «និយាយដោយស្មោះត្រង់ ខ្ញុំមិនហ៊ានគិតសោះ ថាកូនខ្ញុំអាចមានជីវិតរហូតដល់ពេលនេះ»។
កាលពីឆ្នាំ២០១៥ ទារិកាអាល្លឺម៉ង់ម្នាក់បានកើតមកដោយមាន២៥២ក្រាម រីឯទារកម្នាក់ទៀតដែលនៅអាល្លឺម៉ង់ដូចគ្នា បានកើតកាលពីឆ្នាំ២០០៩ ដោយមានទម្ងន់២៧៤ក្រាម៕
© រក្សាសិទ្ធិដោយ thmeythmey.com