ជាតិ
សង្គមជាតិ
វិចិត្រករវ័យក្មេងសិង្ហបុរី មកតាំងពិព័រណ៌គំនូរនៅពេទ្យកុមារអង្គរ ដើម្បីប្រមូលថវិកាព្យាបាលកុមារកម្ពុជា
× សៀមរាប៖ វិចិត្រករវ័យក្មេងរបស់សិង្ហបុរី ដែលមានភាពល្បីល្បាញផ្នែកគំនូរ នឹងធ្វើដំណើរមកកាន់ខេត្តសៀមរាប ដើម្បីរៀបចំពិធីសម្ពោធពិព័រណ៌គំនូររបស់ខ្លួននៅមន្ទីរពេទ្យកុមារអង្គរ។ ពិព័រណ៌នេះ នឹងធ្វើនៅដើមខែមីនា ហើយថវិកាដែលទទួលបានពីការលក់គំនូរទាំងអស់ នឹងត្រូវបរិច្ចាគជូនមន្ទីរពេទ្យកុមារអង្គរ ដែលគេស្គាល់ថា បាននិងកំពុងព្យាបាលកុមារក្រីក្រកម្ពុជាដោយឥតគិតថ្លៃ។
មន្ទីរពេទ្យកុមារអង្គរ បានប្រកាសប្រាប់សាធារណជនអំពីការតាំងពិព័រណ៌គំនូរ ក៏ដូចជាវត្តមានរបស់កុមារា ចននី ចៅ (Johnny Zhao) ជនជាតិចិនសិង្ហបុរី។ ចននី ចៅ បានបង្កើតស្នាដៃដ៏អស្ចារ្យ ហើយស្នាដៃគំនូរគេ ត្រូវបានទទួលស្គាល់ជាលក្ខណៈអន្ដរជាតិ នៅពេលដែលកុមារារូបនេះ អាយុត្រឹម១១ឆ្នាំ។
ពិព័រណ៌គំនូររបស់កុមារា ចននី ចៅ នឹងត្រូវសម្ពោធនៅថ្ងៃទី៧ មីនា វេលាម៉ោង ៥និង៣០នាទី នៅមជ្ឈមណ្ឌលទស្សនកិច្ចរបស់មន្ទីរពេទ្យកុមារអង្គរ ហើយការតាំងបង្ហាញនេះនឹងបន្តរហូតពេញមួយខែ។ ព័រណ៌នេះធ្វើឡើងក្រោមប្រធានបទ «ពរជ័យ» (Blessing) គឺជាកិច្ចសហការរៀបចំដោយសណ្ឋាគារ Templation និង សៀមរាប Brewpub ធ្វើឡើងក្នុងបំណងបង្ហាញពីគំនិតនៃការចែតរំលែកចំពោះអ្នកដែលខ្វះខាត និងការជួនពរជ័យដល់អ្នកដទៃ។
គួរបញ្ជាក់ថា កុមារា ចននី ចៅ កើតនៅថ្ងៃទី២៤ ធ្នូ ឆ្នាំ២០០៧ ដែលស្រឡាញ់សិល្បៈតាំងពីនៅវ័យក្មេង។ នៅអាយុ៧ឆ្នាំ ចននីបានរៀបចំការតាំងពិព័រណ៌សប្បុរសធម៌លើកដំបូងដែលមានឈ្មោះថា «អនុស្សាវរីយ៍នាពេលអនាគតមួយ» ដែលបានប្រារព្ធធ្វើឡើងអំឡុងខែ តុលា ឆ្នាំ២០១៥ ដែលពេលនោះហើយធ្វើឱ្យកុមារារូបនេះ មានភាពល្បីល្បាញក្នុងប្រទេស សិង្ហបុរី៕
© រក្សាសិទ្ធិដោយ thmeythmey.com