អន្តរជាតិ
មុនចូលស្រុកវិញ មេដឹកនាំប្រឆាំងវ៉េណេស៊ុយអេឡាប្រកូកប្រកាសឲ្យធ្វើបាតុកម្មទ្រង់ទ្រាយធំ រូបភាព AFP
× មេដឹកនាំប្រឆាំងវ៉េណេស៊ុយអេឡា ហ័ន ក្វៃដូ នៅថ្ងៃទី៣ ខែមីនា បានប្រកាសឲ្យប្រជាជនប្រមូលផ្ដុំធ្វើបាតុកម្មទ្រង់ទ្រាយធំប្រឆាំងរដ្ឋាភិបាលលោក នីកូឡាស់ ម៉ាឌុយរ៉ូ ។ លោក ក្វៃដូ កំពុងស្ថិតនៅបរទេសក្នុងដំណើរទស្សនកិច្ចនៅតាមប្រទេសតំបន់អាមេរិកឡាទីនមួយចំនួនដែលទទួលស្គាល់លោកជាមេដឹកនាំស្របច្បាប់របស់វ៉េណេស៊ុយអេឡា។ ទោះប្រកាសថានឹងត្រឡប់ចូលស្រុកវិញ មេដឹកនាំប្រឆាំងរូបនេះមិនបញ្ជាក់ពីពេលវេលា ឬផ្លូវធ្វើដំណើរជាក់លាក់ឡើយ។
តាំងពីសប្ដាហ៍មុន លោក ហ័ន ក្វៃដូ ដែលតាំងខ្លួនជាប្រធានាធិបតីរបស់វ៉េណេស៊ុយអេឡា បានធ្វើដំណើរទស្សនកិច្ចនៅប្រទេសក្នុងតំបន់ដែលដើរតាមអាមេរិកកក្នុងការទទួលស្គាល់លោកជាមេដឹកនាំស្របច្បាប់តែមួយគត់។ ពីទឹកដីបរទេស លោក ក្វៃដូ បានអំពាវនាវឲ្យប្រជាជនវ៉េណេស៊ុយអេឡានៅទូទាំងប្រទេស ធ្វើបាតុកម្មនៅថ្ងៃទី៤ ខែមីនាដើម្បីប្រឆាំងរបបដឹកនាំលោក នីកូឡាស់ ម៉ាឌុយរ៉ូ ដែលនៅតែមិនព្រមចេញពីតំណែង។
លោក ក្វៃដូ បានចាកចេញពីវ៉េណេស៊ុយអេឡានៅថ្ងៃទី២៣ ខែកុម្ភៈទៅកាន់កូឡុំប៊ីក្រោមហេតុផលថា ដើម្បីបើកផ្លូវដល់ការដឹកជញ្ជូនជំនួយមនុស្សធម៌ចូលវ៉េណេស៊ុយអេឡា ព្រោះរដ្ឋាភិបាលលោក ម៉ាឌុយរ៉ូ បានបិទផ្លូវ។ ប៉ុន្តែមកទល់ពេលនេះ គេនៅតែមិនឃើញមានជំនួយមនុស្សធម៌អាមេរិកឆ្លងកាត់ព្រំដែនបានដដែល។ ការចេញក្រៅប្រទេសនេះ បានបំពានសេចក្ដីសម្រេចរបស់តុលាការកំពូលដែលជាគ្នាខ្នងរបស់លោក ម៉ាឌុយរ៉ូ ដែលហាមឃាត់លោក ក្វៃដូ ធ្វើដំណើរទៅបរទេស។
ទោះប្រឈមមុខការចាប់ខ្លួនក្ដី លោក ក្វៃដូ ប្រកាសហើយថា លោកនឹងត្រឡប់ទៅស្រុកវិញ។ ការវិលត្រឡប់របស់មេដឹកនាំប្រឆាំង នឹងក្លាយជាបញ្ហាប្រឈមដ៏ធំសម្រាប់លោក ម៉ាឌុយរ៉ូ ព្រោះត្រូវសម្រេចចិត្តចាប់ខ្លួនមេដឹកនាំប្រឆាំងរូបនេះពីបទបំពានបម្រាមតុលការកំពូលរបស់ប្រទេសឬក៏យ៉ាងណា។ បើសិនមានការចាប់ខ្លួនលោក ក្វៃដូ បែបនេះ វាប្រាកដជាធ្វើឲ្យលោកខាងលិចក្ដៅស្លឹកត្រចៀកខ្លាំងមិនខាន ហើយលោក ម៉ាឌុយរ៉ូ ក៏អាចជួបគ្រោះផង។
តាមពិតទៅ សហគមន៍អន្តរជាតិ ក៏បង្ហាញក្ដីបារម្ភរួចហើយដែរជុំវិញគម្រោងត្រឡប់ទៅវ៉េណេស៊ុយអេឡារបស់លោក ក្វៃដូ ពិសេសបញ្ហាសុវត្ថិភាពតែម្ដង។ ប្រមុខការទូតអឺរ៉ុប Federica Mogherini កាលពីសប្ដាហ៍កន្លងទៅ បានព្រមានរដ្ឋាភិបាលក្រុងការ៉ាកាស់ជាស្រេចពីលទ្ធភាពចាប់ខ្លួនមេដឹកនាំប្រឆាំងវ័យក្មេងរូបនេះ។ លោកស្រី Mogherini ដាស់តឿនលោក ម៉ាឌុយរ៉ូ ថា នឹងជួបការថ្កោលទោសខ្លាំងៗ បើសិនជាបង្កគ្រោះភ័យដល់លោក ក្វៃដូ ។
លោក ក្វៃដូ ដែលតាំងខ្លួនជាប្រធានាធិបតីបណ្ដោះអាសន្នរបស់វ៉េណេស៊ុយអេឡានៅថ្ងៃទី២៣ ខែមករា ក្លាយជាអ្នកនយោបាយជើងថ្មីម្នាក់ ដែលគំរាមខ្លាំងក្លាដល់កៅអីលោក ម៉ាឌុយរ៉ូ ។ ប្រទេសជាង៥០បានទទួលស្គាល់លោកជំនួសលោក ម៉ាឌុយរ៉ូ ដែលភាគច្រើនជាប្រទេសនៅតំបន់អាមេរិកខាងត្បូង និងតំបន់អឺរ៉ុបជាដើម។ យ៉ាងណាមិញ លោក ម៉ាឌុយរ៉ូ ដែលមានកងទ័ពក្នុងដៃនោះ មិនទាន់បញ្ចេញសញ្ញាលាលែងឡើយ ខណៈមានការគាំទ្រពីមហាអំណាចរុស្ស៊ី ចិន និងតួកគីផង៕
Tag:
វ៉េណេស៊ុយអេឡា
ហ័ន ក្វៃដូ
នីកូឡាស់ ម៉ាឌុយរ៉ូ
© រក្សាសិទ្ធិដោយ thmeythmey.com