អន្តរជាតិ
ចិន នឹងបង្កើនថវិកាការពារជាតិ ហើយប្រកាន់ខ្ជាប់នយោបាយមិនគំរាមអ្នកដទៃ លោក Zhang Yesui ក្នុងសន្និសីទសារព័ត៌មានថ្ងៃទី៤ ខែមីនា (រូបភាព Xinhua)
× បីឆ្នាំជាប់គ្នាមកហើយ គឺពីឆ្នាំ២០១៦ដល់ឆ្នាំ២០១៨ កញ្ចប់ចំណាយថវិកាការពារជាតិប្រចាំឆ្នាំរបស់មហាយក្សចិនកើនឡើងក្នុងអត្រាត្រឹមមួយខ្ទង់ប៉ុណ្ណោះ។ សម្រាប់ឆ្នាំ២០១៩ ចិននឹងបង្កើនការចំណាយរបស់ខ្លួនដដែល ហើយនៅតែរក្សាអត្រាមួយខ្ទង់ទៀតដើម្បីឲ្យសមស្របតាមនយោបាយកំណែទម្រង់កងទ័ព។ នេះបើតាមការប្រកាសរបស់អ្នកនាំពាក្យសភាប្រជាជនចិននៅថ្ងៃទី៤ ខែមីនា មុនមួយថ្ងៃការបើកកិច្ចប្រជុំប្រចាំរបស់ខ្លួន។
សភាតំណាងប្រជាជនចិន នឹងបើកកិច្ចប្រជុំប្រចាំឆ្នាំរបស់ខ្លួននៅថ្ងៃទី៥ ខែមីនា ដោយនឹងពិនិត្យមើលរបាយការណ៍ការងារឆ្នាំ២០១៨ អនុម័តច្បាប់សំខាន់ៗ និងទិសដៅសម្រាប់ឆ្នាំ២០១៩ ។ ការចំណាយសម្រាប់វិស័យការពារជាតិ គឺជាប្រធានបទសំខាន់ដែលទាក់ទាញចំណាប់អារម្មណ៍គេឯង។ ដូចឆ្នាំកន្លងទៅដែរ ចិននឹងបង្កើនទំហំកញ្ចប់ទឹកប្រាក់សម្រាប់វិស័យការពារជាតិរបស់ខ្លួនឲ្យសមស្របតាមស្ថានការណ៍ជាក់ស្ដែង។
ក្នុងសន្និសីទសារព័ត៌មានថ្ងៃទី៤ ខែមីនា លោក Zhang Yesui អ្នកនាំពាក្យកិច្ចប្រជុំសភានិយាយថា ការបង្កើនទឹកប្រាក់ក្នុងវិស័យការពារជាតិក្នុងកម្រិតសមរម្យ ជាការចាំបាច់ក្នុងការការពារសន្តិសុខជាតិ និងស្របតាមការកែទម្រង់យោធាផង។ អ្នកនាំពាក្យរូបនេះមិនបានបង្ហាញតួលេខជាក់លាក់ពីចំនួនទឹកប្រាក់ចំណាយសម្រាប់ឆ្នាំ២០១៩ ឡើយ ប៉ុន្តែគេរំពឹងថា អត្រាកើនឡើងនៃការចំណាយនឹងមិនច្រើនជាងមួយខ្ទង់ឡើយ។
ក្នុងឆ្នាំ២០១៨កន្លងទៅ ការចំណាយលើវិស័យយោធាមានកំណើន៨,១ភាគរយ ហើយកញ្ចប់ថវិកាការពារជាតិទាំងមូលមានចំនួន១៤៩ពាន់លានដុល្លារ ស្មើនឹង១,៣ភាគរយនៃផលិតផលក្នុងស្រុកសរុប (GDP) ។ លោក Zhang អះអាងថា ទំហំចំណាយរបស់ចិន គឺតិចជាងប្រទេសខ្លះផង ដោយប្រទេសជាច្រើនចាយលុយលើវិស័យយោធាដល់ទៅពីរភាគរយបើប្រៀបធៀបនឹងទំហំ GDP របស់ពួកគេ។
អ្នកនាំពាក្យខាងលើបានលើកឡើងពីជំហររបស់ចិនក្នុងការប្រកាន់ខ្ជាប់ផ្លូវអភិវឌ្ឍសន្តិភាព និងអនុវត្តគោលនយោបាយការពារជាតិដែលមិនបង្កការគំរាមកំហែងដល់ប្រទេសផ្សេងឡើយ។ បើតាមទីភ្នាក់ងារព័ត៌មាន Xinhua លោក Zhang និយាយដូច្នេះថា៖ «ប្រទេសមួយគំរាមកំហែងផ្នែកយោធាដាក់ប្រទេសផ្សេងឬអត់ មិនអាស្រ័យលើការបង្កើនការចំណាយយោធាឡើយ តែអាស្រ័យលើនយោបាយរបស់ប្រទេសនោះតែម្ដង។»
បច្ចុប្បន្ន យោធាចិនដែលចំនួនកងទ័ពច្រើនជាងគេលើពិភពលោក កំពុងធ្វើទំនើបកម្មសព្វាវុធ និងការកែទម្រង់ទ្រង់ទ្រាយធំដែលវាតម្រូវឲ្យការបង្កើនការចំណាយច្រើន។ អ្វីគួរឲ្យកត់សម្គាល់ ចិនចង់បាននាវាដឹកយន្តហោះយ៉ាងតិច៦ ដើម្បីពង្រឹងអានុភាពជើងទឹករបស់ខ្លួន បន្ថែមពីលើការពង្រឹងសមត្ថភាព និងការត្រៀមខ្លួនប្រយុទ្ធគ្រប់ពេលរបស់កងទ័ពម្នាក់ៗ៕
© រក្សាសិទ្ធិដោយ thmeythmey.com