Pacquiao ទៅមើលដៃគូប្រយុទ្ធបន្ទាប់ ខណៈកំពុងចរចាជំនួបសងសឹកជាមួយ Floyd

កីឡាអន្តរជាតិ

អន្តរជាតិ

Pacquiao ទៅមើលដៃគូប្រយុទ្ធបន្ទាប់ ខណៈកំពុងចរចាជំនួបសងសឹកជាមួយ Floyd

05, Mar 2019 , 8:39 am

រូបភាព

Manny Pacquiao នាជំនួបទល់នឹង Adrien Broner

ដោយ: ទេព ពិទូរ្យ

ស្តេចប្រដាល់អាស៊ី Manny Pacquiao បង្ហាញចំណាប់អារម្មណ៍ចង់ឡើងសង្វៀនប្រកួតជាមួយអ្នកប្រដាល់មិនដែលចាញ់អាមេរិក Errol Spence ខណៈការចរចាសម្រាប់ជំនួបសងសឹក Floyd Mayweather កំពុងដំណើរការ។

អត្ថបទទាក់ទង

Pacquiao ប្រាប់ឲ្យ Floyd ចេញពីការចូលនិវត្តន៍ដើម្បីឡើងសង្វៀនវាយគ្នាម្តងទៀត

Pacquiao ក៏មានគម្រោងធ្វើដំណើរទៅកាន់ទីក្រុង Arlington រដ្ឋ Texas សហរដ្ឋអាមេរិកដើម្បីមើលការប្រកួតដណ្តើមខ្សែក្រវាត់រវាង Spence និង Mikey Garcia នៅថ្ងៃទី១៦ ខែមីនាខាងមុខផងដែរ។

អ្នកប្រដាល់ និងជាសមាជិកព្រឹទ្ធសភាហ្វីលីពីន វ័យ៤០ឆ្នាំរូបនេះ បានប្រាប់សារព័ត៌មាន Rappler ថា រូបគេនឹងទៅទស្សនាការប្រកួតនោះដើម្បីមើលពីរបៀបប្រយុទ្ធដ៏អស្ចារ្យរបស់អ្នកប្រដាល់មិនស្គាល់ចាញ់ទាំងពីរ។

Errol Spence សញ្ជាតិអាមេរិក វ័យ២៨ឆ្នាំ ធ្លាប់ប្រកួត២៤ដង ឈ្នះទាំង២៤ និងផ្តួលដៃគូមិនឲ្យតដៃរួច២១លើក។ ចំណែក Mikey Garcia វ័យ៣១ឆ្នាំ ក៏ជាអ្នកប្រដាល់អាមេរិកដែរ និងមានប្រវត្តិប្រកួតដ៏អស្ចារ្យក្នុងជំនួប៣៩លើក មិនដែលស្គាល់ពាក្យចាញ់និងស្មើឡើយ ហើយផ្តួលដៃគូឲ្យសន្លប់៣០លើក។

កីឡាករ Errol Spence (ឆ្វេង) និង Mikey Garcia (ស្តាំ)

ខណៈគូប្រកួតបន្ទាប់របស់ Pacquiao នៅមិនទាន់រកឃើញនៅឡើយ ហើយការចរចាសម្រាប់ជំនួបសងសឹកជាមួយ Mayweather ក៏នៅមិនទាន់មានផ្លែផ្កាផង ម្ចាស់ខ្សែក្រវាត់៨ស្ថាប័នរូបនេះចាប់អារម្មណ៍ និងដាក់គោលដៅដើម្បីសាកថ្វីដៃជាមួយ Errol Spence នេះឯង។

បើទោះការចរចាមិនទាន់ត្រូវរូវគ្នាក្តីប៉ុន្តែ Pacquiao បានបញ្ជាក់ប្រាប់សារព័ត៌មានហ្វីលីពីនថាជំនួបលើកទី២ទល់នឹងស្តេចប្រដាល់អាមេរិក វ័យ៤២ឆ្នាំ Floyd ត្រូវតែកើតឡើងមិនអាចអាក់ខានបានឡើយ។

Pacquiao បានគ្រប់គ្រងខ្សែក្រវាត់៨ស្ថាប័នផ្សេងគ្នាជាកំណត់ត្រាបន្ទាប់ពីដណ្តើមបានខ្សែក្រវាត់ WBA ក្នុងជ័យជម្នះដោយពិន្ទុលើកីឡាករ Adrien Broner កាលពីខែមករាកន្លងទៅ៕