ជាតិ
ប៉ូលិសកម្ពុជា-សិង្ហបុរី បន្តរួមគ្នាប្រឆាំងនឹងភេរវកម្ម និងបទល្មើសឆ្លងដែន
ជំនួបរវាងសម្តេច ស ខេង និង លោក HOONG WEE TECH។ រូបពីហ្វេសប៊ុករបស់សម្តេច ស ខេង
×![]()
ដោយ: ថ្មីៗ
ភ្នំពេញ ៖ អគ្គស្នងការដ្ឋាននគរបាលជាតិកម្ពុជា និងអគ្គស្នងការដ្ឋាននគរបាលជាតិសិង្ហបុរី បន្តសហការគ្នាលើការទប់ស្កាត់បទឧក្រិដ្ឋឆ្លងដែន បទល្មើសបច្ចេកវិទ្យា និងប្រយុទ្ធប្រឆាំងអំពើភេរវកម្ម។ ក្នុងជំនួបជាមួយលោក Hoong Wee Tech អគ្គស្នងការនគរបាលជាតិសិង្ហបុរី នារសៀលថ្ងៃទី៤ ខែមីនា ឆ្នាំ២០១៩នេះ សម្តេច ស ខេង រដ្ឋមន្ត្រីក្រសួងមហាផ្ទៃ សម្តែងការគាំទ្រពោះកិច្ចសហប្រតិបត្តិការនេះ។
គេហទំព័រអគ្គស្នងការនគរបាលជាតិ បានស្រង់ប្រសាសន៍របស់សម្តេច ស ខេង ក្នុងជំនួបនោះ ទៅចុះផ្សាយថា វាជាការល្អបំផុត ដែលកម្ពុជានិងសិង្ហបុរី បន្តសហការគ្នា ក្នុងការទប់ស្កាត់រាល់បទល្មើសឧក្រិដ្ឋផ្សេងដូចជា ការប្រឆាំងភេរវកម្ម ការប្រឆាំងបទល្មើសបច្ចេកវិទ្យា និងបទល្មើសឆ្លងដែន។ លើសពីនេះ សម្តេច ស ខេង អរគុណរដ្ឋាភិបាល ក៏ដូចជាអគ្គស្នងការនគរបាលជាតិសិង្ហបុរី ដែលបានជួយដល់កម្ពុជា តាំងពីដើមរហូតដល់បច្ចុប្បន្ននេះ ជាពិសេសនគរបាលសិង្ហបុរី បានជួយផ្តល់វគ្គបណ្តុះបណ្តាលជំនាញផ្នែកបង្ក្រាបបទល្មើសឆ្លងដែនដល់នគរបាលកម្ពុជា។
រដ្ឋមន្ត្រីក្រសួងមហាផ្ទៃ រំពឹងថា កិច្ចសហប្រតិបត្តិការទ្វេភាគី នឹងកាន់តែល្អប្រសើបន្ថែមទៀត ដើម្បីរួមគ្នាទប់ស្កាត់រាល់បទល្មើសផ្សេងៗ ក្នុងគោលបំណងការពារផលប្រយោជន៍នៃប្រជាជននិងប្រទេសទាំងពីរ ក៏ដូចជាផលប្រយោជន៍ទាំងក្នុងតំបន់ និងពិភពលោក។
លោក Hoong Wee Tech បានលើកឡើងថា កម្ពុជា និងសិង្ហបុរី គឺជាមិត្តដ៏ល្អនឹងគ្នា ហើយសិង្ហបុរី រីករាយចំពោះកិច្ចសហប្រតិបត្តិការជាមួយកម្ពុជា ហើយសិង្ហបុរីនឹងបន្តជួយបើកវគ្គបណ្តុះបណ្តាលជំនាញផ្សេងៗទៀត ដល់កម្ពុជាគ្រប់ពេលវេលា ជាពិសេសជំនាញផ្នែកនគរបាលតែម្តង៕
Tag:
កម្ពុជា-សិង្ហបុរី
កិច្ចសហការ
សន្តិសុខ
© រក្សាសិទ្ធិដោយ thmeythmey.com
