ជាតិ
សង្គមជាតិ
សម្តេច ហ៊ុន សែន បញ្ជាឲ្យពិនិត្យអ្នកទោសស្ត្រី ដែលត្រូវលើកលែង ដោយមិនរង់ចាំបុណ្យទាន
× សម្តេចនាយករដ្ឋមន្ត្រី ហ៊ុន សែន ប្រាប់ទៅក្រសួងកិច្ចការនារីនិងក្រសួងយុត្តិធម៌ ឲ្យសហការជាមួយពន្ធនាគារ ដើម្បីពិនិត្យមើលទណ្ឌិតជាស្ត្រីណា ដែលគួរតែត្រូវបានបន្ធូរបន្ថយនិងលើកលែងទោស ដោយមិនចាំបាច់រង់ចាំតែពេលបុណ្យទាននោះទេ។
បញ្ជារបស់សម្តេចនាយករដ្ឋមន្ត្រី គឺធ្វើឡើងក្នុងពិធីអបអរសាទរទិវាអន្តរជាតិនារី៨មីនាលើកទី១០៨ នៅព្រឹកថ្ងៃទី៥ ខែមីនា ឆ្នាំ២០១៩នេះ។ ប្រមុខរដ្ឋាភិបាល ថ្លែងយ៉ាងដូច្នេះថា៖«បើយើងឃើញថាស្ថានភាពរបស់ទណ្ឌិតជាស្ត្រីនោះលំបាក យើង អាចផ្តល់ការសម្រាលទោសនិងការលើកលែងទោស ដោយមិនចាំបាច់រង់ចាំពេលវេលាទេ»។
ការបន្ធូរបន្ថយនិងការលើកលែងទោសឲ្យទណ្ឌិតនៅកម្ពុជា តែងធ្វើឡើងក្នុងពិធីបុណ្យបី គឺបុណ្យចូលឆ្នាំថ្មី បុណ្យវិសាខបូជា និង បុណ្យអុំទូក។
ក្រៅពីបញ្ជាឲ្យពិនិត្យលទ្ធផលបន្ធូរបន្ថយនិងលើកលែងទោស សម្តេច ហ៊ុន សែន ក៏បានយកចិត្តទុកដាក់លើស្ត្រីជាប់ពន្ធនាគារ លើចំណុចមួយទៀតដែរ គឺការផ្តល់មេធាវី ដោយមិនយកលុយ។ នាយករដ្ឋមន្ត្រី លើកឡើងថា ការផ្តល់មេធាវីនេះ គឺអាចពន្លឿនការជំនុំជម្រះលើសំណុំរឿងរបស់ស្ត្រីជាប់ឃុំទាំងនោះ។
ប្រមុខរដ្ឋាភិបាល បញ្ជាក់បែបនេះថា៖«ត្រូវដោះស្រាយស្ត្រីជាពិរុទ្ធជន នៅជាប់ឃុំឃាំង ហើយមិនទាន់ទទួលបានការកាត់ទោស ព្រោះខ្វះមេធាវី។ ជួនកាលយកពួកគាត់ទៅឃុំ គ្មានមេធាវី កាត់ក្តីមិនចេញ ដោយសារគាត់គ្មានលុយជួលមេធាវី»។
សម្តេច ហ៊ុន សែន បានបង្កើតក្រុមមេធាវីផ្ទាល់ខ្លួន ដើម្បីការពារក្តីឲ្យស្ត្រីក្រីក្រនៅតាមរាជធានី-ខេត្ត។ បច្ចុប្បន្ន ក្រុមមេធាវីនេះ មានគ្នាជាង៦០នាក់ ដោយមានលោក គី តិច ជាប្រធាន។
ក្នុងពិធីអបអរសាទរទិវាអន្តរជាតិនារី៨មីនា សម្តេច ហ៊ុន សែន អះអាងបែបនេះថា៖«ខ្ញុំ នឹងពង្រីកចំនួនមេធាវីបន្ថែម បើមិនគ្រប់គ្រាន់ ក្នុងការការពារក្តី»៕
Tag:
ហ៊ុន សែន
ទិវានារីអន្តរជាតិ
អ្នកទោសស្ត្រី
© រក្សាសិទ្ធិដោយ thmeythmey.com