អន្តរជាតិ
×![]()
នាយកដ្ឋានចំណូលជាតិថៃ មានគោលបំណងបង្កើនតួលេខអ្នកដែលមានកាតព្វកិច្ចបង់ពន្ធជូនរដ្ឋឲ្យបាន១០ភាគរយ ក្នុងឆ្នាំ២០១៩នេះ។ ទាក់ទិននឹងគម្រោងនេះ ខ្លួននឹងផ្តោតសំខាន់លើអាជីវករលក់ផលិតផលតាមអនឡាញនៅក្រៅប្រព័ន្ធពន្ធដារ។
ដោយមានជំនួយពីប្រព័ន្ធវិភាគទិន្នន័យ ភ្នាក់ងារប្រមូលពន្ធដ៏ធំបំផុតរបស់ថៃចង់បង្កើនតួលេខអ្នកដែលមានកាតព្វកិច្ចបង់ឲ្យបាន១លាននាក់ក្នុងឆ្នាំនេះ។ នេះបើតាមការបញ្ជាក់របស់លោក Ekniti Nitithanprapas ប្រធាននាយកដ្ឋានចំណូលជាតិថៃ ដែលបន្ថែមថា នាយកដ្ឋានលោកគ្រោងកោះហៅអាជីវករលក់ទំនិញតាមប្រព័ន្ធអនឡាញដែលបានគេចពីការបង់ពន្ធ។
យោងតាមការចុះផ្សាយរបស់សារព័ត៌មាន Bangkok Post លោក Ekniti គូសបញ្ជាក់ថា នាយកដ្ឋានលោកមានទិន្នន័យគ្រប់គ្រាន់លើចំនួនអាជីវករលក់ទំនិញតាមអនឡាញ ដែលបានបង់ពន្ធជូនរដ្ឋ។ ត្រង់ចំណុចនេះ លោកស្នើឲ្យអាជីវករដែលធ្វើជំនួញតាមប្រព័ន្ធអនឡាញដាក់ឯកសារបង់ពន្ធឲ្យបានត្រឹមត្រូវ ព្រោះលោកមិនចង់បើកការស៊ើបអង្កេតឲ្យស៊ីជម្រៅ ឬកោះហៅអ្នកទាំងនោះឡើយ។
សូមបញ្ជាក់ថា គិតត្រឹមចុងខែកុម្ភៈ ឆ្នាំ២០១៩នេះ អ្នកដែលត្រូវបង់ពន្ធប្រមាណ ៣,២លាននាក់បានដាក់ឯកសារស្តីពីចំណូលពន្ធត្រឡប់របស់ពួកគេទៅកាន់នាយកដ្ឋានចំណូលជាតិរបស់ថៃ។ ចំនួននេះគឺកើនឡើងពី២,៧លាននាក់កាលពីឆ្នាំ២០១៨។
យ៉ាងណាមិញ កាលពីឆ្នាំមុន មនុស្សចំនួន១០លាននាក់បានដាក់ឯកសារចំណូលត្រឡប់របស់ពួកគេរួចរាល់ទៅកាន់នាយកដ្ឋានចំណូលជាតិថៃ ប៉ុន្តែមនុស្សត្រឹម ៣-៤ លាននាក់តម្រូវឲ្យបង់ពន្ធ៕
Tag:
ថៃ
អាជីវកម្មតាមអនឡាញ
© រក្សាសិទ្ធិដោយ thmeythmey.com
