កីឡាអន្តរជាតិ
អន្តរជាតិ
គ្រូអាល្លឺម៉ង់ឈប់យក Boateng, Hummels និង Muller ចូលជម្រើសជាតិ
× គ្រូបង្វឹកក្រុមកីឡាបាល់ទាត់ជម្រើសជាតិអាល្លឺម៉ង់លោក Joachim Low បានប្រាប់ខ្សែការពារ Jerome Boateng, Mats Hummels និងខ្សែប្រយុទ្ធ Thomas Muller ថាលោកមិនជ្រើសយកពួកគេទៅរួមក្រុមទៀតឡើយ។
ខ្សែការពារ Boateng និង Hummels ដែលមានវ័យ៣០ឆ្នាំ រួមទាំង Muller អាយុ២៩ឆ្នាំ សុទ្ធសឹងជាកីឡាករសំខាន់របស់ Bayern Munich និងបានជួយឲ្យអាល្លឺម៉ង់ឈ្នះពាន World Cup ឆ្នាំ២០១៤ ទៀតផង។
ប៉ុន្តែក្រោយក្រុមរហស្សនាមឥន្ទ្រីដែកខ្ទាតចេញពីពាន World Cup ឆ្នាំ២០១៨ ត្រឹមវគ្គចែកពូល និងត្រូវកាត់ចោលពីក្របខណ្ឌអឺរ៉ុប Nations League ទៀតនោះទើបលោក Joachim Low សម្រេចមិនយកអ្នកទាំង៣ទៅជួយក្រុមទៀតទេ ដោយជំនួសកីឡាករក្មេងៗវិញ។
«ឆ្នាំ ២០១៩ គឺជាឆ្នាំនៃការចាប់ផ្តើមថ្មីសម្រាប់ក្រុមជម្រើសជាតិអាល្លឺម៉ង់។ «យើងចង់ឲ្យក្រុមនេះមានមុខថ្មីហើយខ្ញុំជឿជាក់ថានេះគឺជាជំហានដ៏ត្រឹមត្រូវ»។ Low អះអាងពីការសម្រេចចិត្តរបស់លោកបែបនេះ។
អ្នកចាត់ការសញ្ជាតិអាល្លឺម៉ង់ វ័យ៥៩ឆ្នាំរូបនេះបន្ថែមថា កីឡាករវ័យក្មេងនឹងមានកន្លែងដែលពួកគេត្រូវការដើម្បីអភិវឌ្ឍខ្លួនឲ្យបានពេញលេញហើយពួកគេត្រូវទទួលខុសត្រូវនៅពេលនេះ។
ក្នុងជំនួបចុងក្រោយរបស់អាល្លឺម៉ង់នៅថ្ងៃទី១៣ ខែតុលា ឆ្នាំ២០១៨ ដែល Boateng, Hummels និង Muller ចូលលេងទាំងអស់នោះ គឺក្នុងបរាជ័យដោយលទ្ធផល ៣-០ ក្រោមថ្វីជើងក្រុមជម្រើសជាតិហូឡង់ក្នុងក្របខណ្ឌ Nations League៕
Tag:
បាល់ទាត់
Joachim Low
អាល្លឺម៉ង់
© រក្សាសិទ្ធិដោយ thmeythmey.com