ជាតិ
សង្គមជាតិ
តារាសម្ដែង អ៊ុក សុធារៈ ចេញមុខសុំទោស ក្រោយមន្ត្រីពន្ធនាគារព្រមានចាត់វិធានការច្បាប់ លោក អ៊ុក សុធារៈ នៅកណ្តាល
× ភ្នំពេញ៖ តារាសម្ដែង អ៊ុក សុធារៈ បានចេញមុខសុំទោសជាសាធារណៈ ក្រោយពីមន្ត្រីពន្ធនាគារព្រមានចាត់វិធានការផ្លូវច្បាប់ ចំពោះសកម្មភាពថតវីដេអូច្រៀង ដោយគ្រងសម្លៀកបំពាក់អ្នកទោស។ អគ្គនាយកដ្ឋានពន្ធនាគារ ចាត់ទុកសកម្មភាពតារាសម្ដែងនោះ ជាទង្វើខុសឆ្គង ដែលបំពុលបរិយាកាសសង្គម។
«ខ្ញុំបាទ សុំទោសចំពោះកំហុសខុសឆ្គងនៃការថតពាក់ខោអាវអ្នកទោស រាំ Tik tok កម្សាន្ត»។ នេះជាការលើកឡើងរបស់លោក អ៊ុក សុធារៈ ដែលបានបន្ថែមថា អ្វីដែលខ្លួន និងមិត្តភក្តិបានធ្វើនេះ គឺគ្មានបំណង ធ្វើឲ្យប៉ះពាល់ដល់ស្ថាប័នពន្ធនាគារឡើយ ។
តារាសម្ដែង អ៊ុក សុធារៈ ដែលបានចេញមុខសុំទោស តាមរយៈវីដេអូឃ្លីប៣នាទីដូច្នេះថា៖«បន្ទាប់ពីស្ដាប់ការសុំទោសនេះហើយ សុំកុំមានការយល់ច្រឡំ ព្រោះយើងអត់បានគិតច្បាស់ថា ការថតលេង ថតកម្សាន្តនេះ ធ្វើឲ្យប៉ះពាល់ដល់បណ្ដាញសង្គមអ៊ីចឹងទេ»។
ការចេញមុខសុំទោសនេះ បន្ទាប់ពីខាងអគ្គនាយកដ្ឋានពន្ធនាគារ បានព្រមានចាត់វិធានការផ្លូវច្បាប់លើលោក អ៊ុក សុធារៈ និងមិត្តភក្តិពីររូបទៀត ជុំវិញការប្រើប្រាស់សម្លៀកបំពាក់អ្នកទោស ថតវីដេអូរាំលេងកម្សាន្តនេះ។
អគ្គនាយកដ្ឋានពន្ធនាគារ បានបញ្ជាក់ថា បច្ចប្បន្នមន្ត្រីពន្ធនាគារនៅទូទាំងប្រទេស កំពុងខិតខំអនុវត្តន៍បទបញ្ជារបស់ប្រមុខរាជរដ្ឋាភិបាល ពាក់ព័ន្ធនឹងការហាមប្រើប្រាស់ទូរស័ព្ទនៅតាមពន្ធនាគារទាំងអស់ បែរជាបុគ្គល អ៊ុក សុធារៈ យកការសម្តែងរបស់ខ្លួនមកលេងសើច បំពុលបរិយាកាស ធ្វើឲ្យមានការយល់ច្រឡំពីសំណាក់មហាជន។ ជាពិសេសប៉ះពាល់យ៉ាងធ្ងន់ធ្ងរដល់កិត្តិយសនិងសេចក្តីថ្លៃថ្នូររបស់មន្ត្រី ក៍ដូចជាអគ្គនាយកដ្ឋានពន្ធនាគារ ។
« សកម្មភាពរបស់តារាសម្តែង អ៊ុក សុធារៈនិងបក្ខពួក ជាទង្វើឆ្កួតលីលានិង គ្មានការទទួលខុសត្រូវ »។នេះជាការលើកឡើងរបស់អគ្គនាយកដ្ឋានពន្ធនាគារបានសរសេរលើហ្វេសប៊ុកខ្លួន៕
Tag:
អ៊ុក សុធារៈ
សិល្បៈ
ពន្ធនាគារ
© រក្សាសិទ្ធិដោយ thmeythmey.com