សម្ដេច ហ៊ុន សែន ស្នើអ្នកនិពន្ធភាពយន្តគិតពីផ្លូវច្បាប់និងប្រពៃណីខ្មែរឲ្យបានច្បាស់ មុនផលិតរឿង

ជាតិ

សម្ដេច ហ៊ុន សែន ស្នើអ្នកនិពន្ធភាពយន្តគិតពីផ្លូវច្បាប់និងប្រពៃណីខ្មែរឲ្យបានច្បាស់ មុនផលិតរឿង

07, Mar 2019 , 3:27 pm

រូបភាព

ដោយ: ប៉ូ សាគុន

ភ្នំពេញ៖ ថ្លែងដោយមិនបញ្ចេញឈ្មោះចំណងជើងភាពយន្ត និងឈ្មោះតួអង្គ សម្ដេច ហ៊ុន សែន មានប្រសាសន៍ថា ភាពយន្តមួយដែលសម្ដេចបានមើលពីរដងរួចមកហើយនោះ អ្នកនិពន្ធមិនបានគិតដល់ជម្រៅផ្លូវច្បាប់ និងប្រពៃណីខ្មែរឡើយ។

សម្ដេច ហ៊ុន សែន បានស្នើដល់អ្នកនិពន្ធសេណារីយោភាពយន្ត និងអ្នកដឹកនាំរឿង ឱ្យយកចិត្តទុកដាក់ខ្ពស់ ចំពោះខ្លឹមសារ និងគុណភាពសាច់រឿង។ សម្ដេចបានលើកឧទាហរណ៍ទៅលើភាពយន្តមួយ ដែលបាននិពន្ធឱ្យម្ដាយមានអាយុលើសកូនតែ១៥ឆ្នាំ។ បានន័យថាទំនងម្ដាយរូបនោះ រៀបអាពាហ៍ពិពាហ៍នៅអាយុ១៤ឆ្នាំតែប៉ុណ្ណោះ ដែលខុសនឹងច្បាប់អាពាហ៍ពិពាហ៍នៅកម្ពុជា ព្រមទាំងខុសនិងប្រពៃណី ទំនៀមទម្លាប់ខ្មែរផង។

សម្តេចមានប្រសាសន៍យ៉ាងដូច្នេះ ៖«ខ្ញុំសុំបន្តអំពាវនាវឱ្យយកចិត្តទុកដាក់លើកកម្ពស់សមត្ថភាពរបស់អ្នកនិពន្ធ របស់អ្នកដឹកនាំរឿង។ ខ្ញុំបានប្រទះឃើញភាពយន្តមួយ ដែលខ្ញុំបានមើលរហូតដល់ទៅ២ដង។ ស្ត្រីអាយុ៤០ឆ្នាំ ត្រូវបានកូនស្រីអាយុ២៥ឆ្នាំទៅធានា។ តើស្ត្រីរូបនេះគាត់មានប្ដីអាយុប៉ុន្មាន? ហោចណាស់បើគាត់មានប្ដីភ្លាម គាត់មានកូនភ្លាម គាត់រៀបការនៅអាយុ១៤ឆ្នាំតែប៉ុណ្ណោះ។ ដូច្នេះសុំស្នើឱ្យអ្នកនិពន្ធយកចិត្តទុកដាក់ជាអ្នកនិពន្ធម្នាក់ ដែលវាមិនឆ្លុះបញ្ចាំងនូវតថភាពសង្គម។ រឿងនោះពាក់ព័ន្ធនឹងផ្លូវច្បាប់ផង ហើយពាក់ព័ន្ធទៅនឹងប្រពៃណីផង។ បើនិយាយទាក់ទងនឹងខណ្ឌស្លា គេនិយាយអំពីការគ្រប់អាយុនៃការរៀបការ»។

សូមស្ដាប់ប្រសាសន៍សម្ដេច ហ៊ុន សែន ថ្លែងក្នុងពិធីបិទមហោស្រពសិល្បៈយុវជនទូទាំងប្រទេសឆ្នាំទី៥ និងពិធីជួបជុំសិល្បករទូទាំងប្រទេសលើកទី២ ៖

ថ្វីដ្បិតភាពយន្តខ្មែរនៅពេលបច្ចុប្បន្ន ហាក់មានការគាំទ្រពីប្រជាជនកម្ពុជា ច្រើនជាងប៉ុន្មានឆ្នាំមុនក្ដី ប៉ុន្តែគេនៅតែសង្កេតឃើញថា នៅមានចំណុចខ្វះខាតមួយចំនួន ត្រូវបំពេញបន្ថែម ដើម្បីអាចប្រកួតប្រជែងជាមួយភាពយន្តបរទេស ដែលបញ្ចាំងនៅកម្ពុជា។ ខ្លឹមសាររឿង តម្លៃអប់រំ បច្ចេកទេសថត តួសម្ដែង ទីតាំងថត ជាដើមនោះ សុទ្ធតែជាកត្តាចាំបាច់ត្រូវយកចិត្តទុកដាក់៕