ការសិក្សា៖ឥណ្ឌូណេស៊ីជាទីកន្លែងគ្រោះថ្នាក់លំដាប់ទីពីរសម្រាប់ស្ត្រីនៅអាស៊ី

អន្តរជាតិ

ការសិក្សា៖ឥណ្ឌូណេស៊ីជាទីកន្លែងគ្រោះថ្នាក់លំដាប់ទីពីរសម្រាប់ស្ត្រីនៅអាស៊ី

08, Mar 2019 , 7:59 am

រូបភាព

ដោយ:

ការសិក្សាថ្មីមួយរបស់ក្រុមហ៊ុនស្រាវជ្រាវសិង្ហបុរីឈ្មោះថា ValueChampion បានរកឃើញថា ឥណ្ឌូណេស៊ី គឺជាប្រទេសដែលគ្រោះថ្នាក់បំផុតលំដាប់ទីពីរសម្រាប់ស្ត្រីក្នុងតំបន់អាស៊ី-ប៉ាស៊ីហ្វិក។ ក្នុងចំណោមប្រទេសទាំង១៤ ដែលត្រូវបានយកមកសិក្សានោះ ឥណ្ឌា, ឥណ្ឌូណេស៊ី និងហ្វីលីពីន ត្រូវបានចាត់ទុកថាមានសុវត្ថិភាពតិចតួចបំផុតសម្រាប់ស្ត្រី។

ការសិក្សានេះ បានលើកយកសូចនាករសំខាន់ៗចំនួនបីរួមមាន ការទទួលបានការថែទាំសុខភាពតិចតួចបំផុត, ច្បាប់ដែលពុំសូវមានប្រសិទ្ធភាពដើម្បីការពារសុវត្ថិភាពស្ត្រី និងអសមភាពយេនឌ័រជារួម។ ហេតុផលទាំងនេះហើយដែលធ្វើឲ្យប្រទេសបីនេះស្ថិតនៅចំណាត់ថ្នាក់ក្រោមគេ។ ឥណ្ឌាទទួលបានពិន្ទុទាបបំផុត និងតាមពីក្រោយដោយឥណ្ឌូណេស៊ីជាប់លេខ១៣ និងហ្វីលីពីននៅលេខ១២។

និយាយអំពីបញ្ហារបស់ស្ត្រីនៅឥណ្ឌូណេស៊ី កន្លងទៅសកម្មជនជាច្រើនក្នុងប្រទេសនេះបានជំរុញឲ្យរដ្ឋាភិបាលខ្លួនពន្លឿនការអនុម័តច្បាប់ស្តីពីការទប់ស្កាត់អំពើហិង្សាផ្លូវភេទ ដែលជារឿយៗទទួលរងការប្រឆាំងយ៉ាងខ្លាំងពីក្រុមជនជាតិអ៊ីស្លាមអភិរក្សនិយម។ ក្រោយពីមានហេតុការណ៍ររំលោភនិងសម្លាប់លើក្មេងស្រីវ័យ១៤ឆ្នាំម្នាក់កាលពីឆ្នាំ២០១៦ សេចក្តីព្រាងច្បាប់ស្តីពីការទប់ស្កាត់អំពើហិង្សាផ្លូវភេទត្រូវបានបង្កើតឡើង។ ប៉ុន្តែមកទល់នឹងពេលនេះ វាពុំទាន់ត្រូវបានសភាឥណ្ឌូណេស៊ីអនុម័តនៅឡើយទេ ពោលគឺមានរយៈជាង៣ឆ្នាំមកហើយ។

ឲ្យពិតទៅ អំពើហិង្សាផ្លូវភេទមានជាច្រើនករណីក្នុងប្រទេសឥណ្ឌូណេស៊ី ដែលពិបាកនឹងទប់ស្កាត់។ ការស្ទង់មតិទូទាំងប្រទេសមួយរបស់ក្រសួងការពារកុមារនិងអំណាចស្ត្រីឥណ្ឌូណេស៊ី រកឃើញថា ស្ត្រីម្នាក់ក្នុងចំណោមស្ត្រីបីនាក់ទទួលរងបទពិសោធឈឺចាប់ពីអំពើហិង្សាក្នុងជីវិតរបស់ពួកគេ ជាពិសេសស្ត្រីជាភរិយា។

សូមបញ្ជាក់ថា ការសិក្សាថ្មីនេះចាត់ថ្នាក់បណ្តាប្រទេសក្នុងតំបន់ដោយផ្អែកលើកត្តាមួយចំនួន រួមមាន សុវត្ថិភាព, ការថែទាំសុខភាព និងឱកាសដែលមានសម្រាប់ស្ត្រី ប៉ុន្តែផ្តោតសំខាន់ខ្លាំងលើសុវត្ថិភាពស្ត្រី។ ក្រុមហ៊ុនស្រាវជ្រាវដែលមានមូលដ្ឋាននៅសិង្ហបុរីខាងលើនេះ បានប្រើប្រាស់ទិន្នន័យពីប្រភពមួយចំនួន រួមមាន សន្ទស្សន៍ការអភិវឌ្ឍមនុស្សរបស់អង្គការសហប្រជាជាតិ, សន្ទស្សន៍សន្តិភាពសកល, ធនាគារពិភពលោក និងក្រសួងការបរទេសសហរដ្ឋអាមេរិក។

ក្នុងរបាយការណ៍ដដែល ក្រុមហ៊ុន ValueChampion កត់សម្គាល់ថា ទិន្នន័យអាចពុំទាន់គ្រប់ជ្រុងជ្រោយនៅឡើយទេ។ ជាឧទាហរណ៍ ការរាយការណ៍ស្តីករណីអំពើហិង្សានិងរំលោភបំពានផ្លូវភេទ អាចមានចំនួនតិចតួចជាងករណីជាក់ស្តែង ដែលបានកើតឡើងក្នុងប្រទេសនីមួយៗ។ នេះបើតាមការចុះផ្សាយរបស់សារព័ត៌មាន The Jakarta Post ។

បើរបាយការណ៍ដដែល ជប៉ុនជាប់ចំណាត់ថ្នាក់លេខបួន ជាប្រទេសមានសុវត្ថិភាពបំផុតសម្រាប់ស្ត្រីក្នុងតំបន់អាស៊ី-ប៉ាស៊ីហ្វិក។ ប្រទេសឈរលើកំពូលតារាងចំនួនប្រាំ គឺរួមមាន សិង្ហបុរី, ណូវែលសេឡង់ (លេខមួយស្ទួន), អូស្ត្រាលី, ជប៉ុន និងកោះតៃវ៉ាន់៕