ជាតិ
នយោបាយជាតិ
អតីតមន្ត្រីជាន់ខ្ពស់CNRPលោក គង់ បូរ៉ា សុំបម្រើការងារនៅក្របខណ្ឌចាស់នៃនាយកដ្ឋានសុខភាពសត្វវិញ
× ភ្នំពេញ៖ អតីតមន្ត្រីជាន់ខ្ពស់អតីតគណបក្សសង្គ្រោះជាតិ លោក គង់ បូរ៉ា បានស្នើសុំចូលបម្រើការងារនៅក្នុងនាយកដ្ឋានសុខភាពសត្វ សុខភាពសាធារណៈ បសុព្យាបាល ដែលជាកន្លែងការងារចាស់របស់លោកវិញ ក្រោយចង់សម្រាកពីការងារនយោបាយមួយរយៈពេល។
ទោះជាទទួលបានសិទ្ធិធ្វើនយោបាយវិញក្តី ក៏វាមិនទាន់ដល់ពេលដែលលោក គង់ បូរ៉ា បន្តសកម្មភាពនយោបាយខ្លួនដែរ។ នោះក៏ព្រោះតែអតីតមន្ត្រីជាន់ខ្ពស់គណបក្សសង្គ្រោះជាតិរូបនេះ មើលមិនឃើញពីសមត្ថភាពរឹងមាំរបស់គណបក្សនយោបាយដទៃ ដែលអាចផ្ដល់ភាពកក់ក្តៅដូចទ្រនំអតីតគណបក្សខ្លួន ក្នុងការប្រកួតប្រជែងនយោបាយ។
ដ្បិតលោក គង់ បូរ៉ា មិនបន្តសកម្មភាពនយោបាយក្តី ប៉ុន្តែមិនមានមានន័យថា លោកបោះបង់ចោលអាជីពនយោបាយទាំងស្រុងដែរ ពោលគឺលោកគ្រាន់តែចង់សម្រាកពីការងារនយោបាយមួយរយៈពេលសិនប៉ុណ្ណោះ។ ក្នុងន័យនេះលោក គង់ បូរ៉ា បានសង្កត់ធ្ងន់ថា លោកនឹងអាចប្រឡូកចូលឆាកនយោបាយវិញ នៅក្នុងរូបភាពណាមួយ នាការបោះឆ្នោតអាណត្តិក្រោយ ឆ្នាំ២០២៣។
ថ្លែងប្រាប់សារព័ត៌មានថ្មីៗ អតីតតំណាងរាស្ត្រមណ្ឌលព្រៃវែង នៃអតីតគណបក្សសង្គ្រោះជាតិរូបនេះ បាននិយាយដូច្នេះថា៖«ការដាក់ពាក្យទៅបម្រើការងារនៅនាយកដ្ឋានសុខភាពសត្វ សុខភាពសាធារណៈ បសុព្យាបាល នៃក្រសួងកសិកម្ម ដោយសារខ្ញុំយល់ឃើញថា ខ្ញុំមិនទាន់ចង់ចូលរួមក្នុងជីវភាពនយោបាយថ្មីណា ក្រៅពីអតីតគណបក្សសង្គ្រោះជាតិនៅឡើយទេ ដោយសារខ្ញុំរង់ចាំពេលវេលា និងមើលគណបក្សផ្សេងៗទៀតសម្រាប់ការបោះឆ្នោត ហើយខ្ញុំនឹងចូលរួមនយោបាយជាមួយគណបក្សណាមួយនៅពេលខាងមុខ»។
តាមពិតទៅមុននឹងប្រឡូកចូលឆាកនយោបាយជាមួយអតីតគណបក្សសង្គ្រោះជាតិពីរអាណត្តិកន្លងមកនេះ លោក គង់ បូរ៉ា ក៏ធ្លាប់ជាមន្ត្រីក្របខណ្ឌ«ក» បម្រើការងារនាយកដ្ឋានសុខភាពសត្វ សុខភាពសាធារណៈ បសុព្យាបាល នៃក្រសួងកសិកម្ម រុក្ខាប្រមាញ់ និងនេសាទដែរ។ កាលណោះលោក បូរ៉ា បម្រើការងារនៅក្នុងនាយកដ្ឋានផលិតកម្ម សុខភាពសត្វ និងបសុព្យាបាល។ ការសុំបម្រើការងារក្នុងក្របខណ្ឌដើមវិញនេះ លោក គង់ បូរ៉ា រំពឹងថា ខ្លួននឹងអាចប្រើប្រាស់ជំនាញ ដែលធ្លាប់បម្រើការងារពីមុន ជួយដោះស្រាយបញ្ហាសាធារណៈ និងសង្គម ក្រៅពីអាជីពនយោបាយនេះដែរ៕
© រក្សាសិទ្ធិដោយ thmeythmey.com