កីឡាអន្តរជាតិ
អន្តរជាតិ
Marcelo ត្រូវរ៉ូវលក្ខខណ្ឌផ្ទេរទៅ Juventus ជាមួយប្រាក់ឈ្នួល១៣លានដុល្លារក្នុង១ឆ្នាំ
× ក្លិបយក្សអ៊ីតាលី Juventus បានយល់ព្រមលក្ខខណ្ឌផ្ទាល់ជាមួយ Marcelo ដើម្បីផ្ទេរយកខ្សែការពារឆ្វេងរូបនេះពី Real Madrid នៅរដូវកាលក្រោយ ដោយយល់ព្រមផ្តល់ប្រាក់ឈ្នួល១៣លានដុល្លារអាមេរិកក្នុងមួយឆ្នាំ។
ខ្សែការពារសញ្ជាតិប្រេស៊ីលវ័យ៣០រូបនេះ បានបាត់បង់តំណែងសម្រាប់ជម្រើស១១នាក់ដំបូងទៅលើកីឡាករវ័យក្មេង Sergio Reguilon ដែលទើបវិវត្តន៍ខ្លួនពីក្រុមយុវជន ចាប់តាំងពីលោក Santiago Solari ឡើងមកដឹកនាំ។ មូលហេតុនេះបានធ្វើឲ្យ Marcelo មានទំនាក់ទំនងខ្លាំងទៅនឹងការផ្លាស់ទៅកាន់ក្លិប Juventus។
កាសែតអ៊ីតាលី La Stampa បានបញ្ជាក់ថា ក្រុមរហស្សនាមសេះបង្កង់ បានយល់ព្រមលើលក្ខខណ្ឌសម្រាប់ Marcelo ខណៈដែលរូបគេកំពុងមានបំណងចង់ចាកចេញពីក្រុមក្លិបយក្សអេស្ប៉ាញ ដើម្បីទៅចូលរួមជាមួយអតីតមិត្តរួមក្រុម Cristiano Ronaldo។
កាសែតដដែលនេះរាយការណ៍ទៀតថា នាយកប្រតិបត្តិក្លិប Real Mdrid លោក Jose Angel Sanchez បានជួបជាមួយ Marcelo ហើយរូបគេបានសុំចាកចេញពីក្រុមរួចហើយដែរ។
La Stampa បញ្ជាក់ថា Marcelo ដែលចូលរួមជាមួយក្រុមស្តេចស កាលពីឆ្នាំ២០០៧ បានយល់ព្រមចុះកិច្ចសន្យារយៈពេល៤ឆ្នាំជាមួយម្ចាស់ការពារជើងឯកអ៊ីតាលី Serie A ដោយទទួលបានប្រាក់ឈ្នួលជាង ១៣លានដុល្លារអាមេរិកក្នុងមួយឆ្នាំ ហើយទំនាក់ទំនងរបស់គេមួយ Ronaldo នឹងបង្កើនល្បឿននៃកិច្ចព្រមព្រៀងនៅរដូវកាលនេះតែម្តង៕
Tag:
បាល់ទាត់
Juventus
Marcelo
© រក្សាសិទ្ធិដោយ thmeythmey.com