អន្តរជាតិ
អ្នកកាសែតស្ត្រីចំនួន២៧នាក់កំពុងជាប់ឃុំនៅទូទាំងពិភពលោក
× នាឱកាសនៃទិវានារីអន្តរជាតិ អង្គការអ្នកកាសែតគ្មានព្រំដែន (RSF) បានស្នើឲ្យមានការដោះលែងដោយគ្មានលក្ខខណ្ឌចំពោះអ្នកកាសែតស្ត្រីចំនួន២៧នាក់នៅទូទាំងពិភពលោក ដែលកំពុងជាប់ឃុំខ្លួន។
ក្នុងចំណោមអ្នកសារព័ត៌មាន៣៣៤នាក់ ដែលកំពុងជាប់ពន្ធនាគារគិតត្រឹមចុងខែកុម្ភៈ មាន២៧នាក់ ឬ៨ភាគរយ ជានារី។ នេះបើតាមការអះអាងរបស់ RSF ដោយបានប្រៀបធៀបថា កាលពី៥ឆ្នាំមុន អ្នកកាសែតស្ត្រីដែលជាប់ឃុំ មានត្រឹមតែ៣ភាគរយប៉ុណ្ណោះ។
ប្រទេសចំនួន៩ដែលមានអ្នកកាសែតស្ត្រីកំពុងជាប់ឃុំ ដោយអ៊ីរ៉ង់ និងចិន មានចំនួនច្រើនជាង (៧នាក់រៀងៗខ្លួន)។ តួកគីស្ថិតនៅលំដាប់បន្ទាប់ ដោយមានចំនួន៤នាក់ បើទោះបីជាពួកគេទើបដោះលែងអ្នកកាសែតអំបូរឃើដ Zehra Dogan កាលពីពេលថ្មីៗកន្លែងមកនេះក៏ដោយ។
អារ៉ាប់ប៊ីសាអូឌីត មានអ្នកកាសែតស្រីចំនួន៣នាក់កំពុងជាប់ឃុំ ខណៈវៀតណាម មាន២នាក់ អេហ្ស៊ីប បារ៉ែន ស៊ីរី និងនីការ៉ាហ្គា មានម្នាក់រៀងៗខ្លួន។ ស្ត្រីទាំងនោះ ត្រូវបានជាប់ឃុំ និងកាត់ទោសពាក់ព័ន្ធនឹងអត្ថបទរបស់ខ្លួន ដោយអ្នកខ្លះត្រូវបានចោទប្រកាន់ពីបទឧក្រិដ្ឋកម្មធ្ងន់ធ្ងរថែមទៀតផង។
នៅអ៊ីរ៉ង់ Narges Mohammadi និង Hengameh Shahidi ត្រូវកាត់ទោសឲ្យជាប់ពន្ធនាគារពី១០ទៅ១២ឆ្នាំ ពីបទសមគំនិតប្រឆាំងសន្តិសុខជាតិ និងរដ្ឋឥស្លាម ខណៈ Roya Saberi Nagad Nabokht ត្រូវបានកាត់ទោសឲ្យជាប់ពន្ធនាគារ២០ឆ្នាំ កាលពីឆ្នាំ២០១៤ សម្រាប់ការបង្ហោះនៅលើហ្វេសប៊ុក ដែលក្រោយមកកាត់បន្ថយចំនួន៥ឆ្នាំ។
នៅចិន Gulmira Imin ត្រូវកាត់ទោសឲ្យជាប់ពន្ធនាគារមួយជីវិត ពាក់ព័ន្ធនឹងចលនាបំបែកខ្លួនអ៊ុយហ្គួរ ខណៈ Nazli Illicak នៅតួកគី មានវាសនាដូចគ្នាពីបទរិះគន់វាយប្រហាររដ្ឋាភិបាល។
ករណីជាច្រើនទៀតដែលធ្វើអ្នកកាសែត Blogger ស្ត្រី ត្រូវបានចាប់ខ្លួន និងផ្តន្ទាទោស ហើយអ្នកទាំងនោះតែងតែបន្តរងទារុណកម្ម ការគំរាមកំហែង និងការបៀតបៀនផ្លូវភេទផងដែរ៕
Tag:
អ្នកកាសែត
សិទ្ធិនារី
© រក្សាសិទ្ធិដោយ thmeythmey.com