ជាតិ
បទយកការណ៍ / បទសម្ភាសន៍
ការបង្ហាញគូស្នេហ៍,សម្ភារ,ជោគជ័យ..លើបណ្ដាញសង្គម ធ្វើឲ្យប៉ះទង្គិចផ្លូវចិត្តអ្នកមើលឬយ៉ាងណា? លោក ហឿ សេធុល អ្នកឯកទេសចិត្តសាស្រ្ត
× ភ្នំពេញ៖ នៅលើបណ្ដាញសង្គមសព្វថ្ងៃ មនុស្សមួយចំនួនបានបង្ហោះអ្វីដែលខ្លួនមាន អ្វីដែលខ្លួនសម្រេចបាន ដូចជាសម្ភារ អាជីវកម្ម ការរៀនសូត្រ ការងារ រថយន្ត គូស្នេហ៍ ជាដើម។ ចង់មិនចង់អ្នកមើលឃើញមួយចំនួនយកអ្វីទាំងនោះមកប្រៀបធៀបនឹងស្ថានភាពរបស់ខ្លួន។ តើការបង្ហោះអ្វីទាំងនោះ នឹងបង្កឲ្យប៉ះទង្គិចផ្លូវចិត្តដល់អ្នកផងគ្នា ដែលគិតថាខ្លួនឯងមិនដល់គេ?
សូមស្ដាប់កិច្ចសម្ភាសរវាងលោក ញ៉ុង ហេង នៃសារព័ត៌មានថ្មីៗ និងលោក ហឿ សេធុល អ្នកជំនាញចិត្តវិទ្យា និងជានាយកប្រឹក្សាបញ្ហាផ្លូវចិត្តនៃក្រុមហ៊ុន KCPS ដូចតទៅនេះ៖
អ្នកឯកទេសចិត្តសាស្ត្រ ប្រាប់ថា វាអាស្រ័យលើសមត្ថភាពផ្លូវចិត្តរបស់បុគ្គលម្នាក់ៗ។ បើបុគ្គលនោះមានសមត្ថភាពទប់ទល់នឹងអ្វីខាងក្រៅទាប គេនឹងងាយរងឥទ្ធិពលពីការបង្ហោះនោះហើយទាញទៅរកភាពអវិជ្ជមាន។
អ្នកជំនាញបានសង្កត់ធ្ងន់រវាងការឲ្យតម្លៃទៅលើ គុណធម៌ ឬសម្ភារនិយម? បើសម្ភារនិយម នោះគេនឹងអាក់អន់ស្រពន់ចិត្តជាដើម ដែលខ្លួនមិនបានដូចគេ។
ប៉ុន្តែបើរូបគេឲ្យតម្លៃលើគុណធម៌ សេចក្ដីថ្លៃថ្នូ ចំណេះដឹងរបស់មនុស្ស នោះគេនឹងមិនត្រូវបានវាយប្រហាផ្លូវចិត្តពីការបង្ហាញសម្ភារនិយមឡើយ។ ត្រង់ចំណុចនេះ អ្នកឯកទេសចិត្តសាស្ត្រលោក ហឿ សេធុល ជំរុញឲ្យសង្គមខ្មែរឲ្យតម្លៃលើគុណធម៌ ហើយអ្វីទាំងនេះទាមទារការអប់រំ។
លោកបានបង្ហាញក្ដីបារម្ភផងដែរទៅលើការឲ្យតម្លៃលើសម្ភារនិយមជាងគុណធម៌នៅក្នុងសង្គម។ លោកលើកឡើងថា៖«ជាស្ថានភាពមួយដែលជាការព្រួយបារម្ភ មនុស្សហាក់មានទំនោរប្រឹងប្រែងដើម្បីសម្ភារជាជាងការប្រឹងទៅលើជោគជ័យពិតប្រាកដ ហើយយកសម្ភារទៅវាស់វែងភាពជោគជ័យរបស់ខ្លួន»។ ជោគជ័យពិតប្រាកដ ដែលលោក ហឿ សេធុល សំដៅទៅលើការសម្រេចអ្វីមួយដែលមានប្រយោជន៍ដល់អ្នកដទៃ ដល់សង្គម ឬពិភពលោក៕
Tag:
ហឿ សេធុល
សម្ភារនិយម
© រក្សាសិទ្ធិដោយ thmeythmey.com