ក្រសួងសុខាភិបាលឲ្យពលរដ្ឋប្រយ័ត្នជំងឺគ្រុនឈាម ដែលអាចផ្ទុះឡើងខ្លាំងនៅឆ្នាំនេះ

ជាតិ

សង្គមជាតិ

សុខភាព

ក្រសួងសុខាភិបាលឲ្យពលរដ្ឋប្រយ័ត្នជំងឺគ្រុនឈាម ដែលអាចផ្ទុះឡើងខ្លាំងនៅឆ្នាំនេះ

10, Mar 2019 , 12:59 pm

រូបភាព

ដោយ: ថ្មីៗ

ភ្នំពេញ៖ ក្រសួងសុខាភិបាល បានប្រកាសថា ជំងឺគ្រុនឈាមអាចនឹងផ្ទុះឡើងខ្លាំងនៅទូទាំងប្រទេសកម្ពុជានៅដើមឆ្នាំ២០១៩នេះ ដែលលើសពីឆ្នាំ២០១៨កន្លងទៅ។ មូលហេតុដែលនាំឲ្យមានជំងឺគ្រុនឈាម ផ្ទុះឡើងខ្លាំង ដោយសារតែមានការបម្រែបម្រួលអាកាសធាតុ ដែលនាំឲ្យមានជម្រកមូលខ្លា នៅតាមផ្ទះសម្បែង និងទីធ្លាសាធារណៈ។ ក្រសួង សូមណែនាំឲ្យពលរដ្ឋប្រុងប្រយ័ត្នខ្ពស់លើបញ្ហានេះ ដើម្បីរួចផុតពីជំងឺគ្រុនឈាម។

លោក ម៉ម ប៊ុន ហេង រដ្ឋមន្ត្រីក្រសួងសុខាភិបាល បានលើកឡើងថា ជំងឺគ្រុនឈាម ជាជំងឺដែលអាចកើតឡើងលើមនុស្សគ្រប់វ័យ ដែលបង្កឡើងដោយមូសខ្លាញីខាំបឺតឈាមអ្នកដែលមានវីរុសគ្រុនឈាម ចម្លងពីមនុស្សម្នាក់ទៅមនុស្សម្នាក់ទៀត។ លោក រដ្ឋមន្ត្រីបានបញ្ជាក់ថា ជំងឺគ្រុនឈាម មានរោគសញ្ញាដូចជា បន្ទាប់ពីអ្នកជំងឺត្រូវបានមូលខ្លាខាំ មានជំងឺក្តៅខ្លួនពី ៣៩ ទៅ៤០អង្សារ ឡើងមុខក្រហម ឈឺប្រឡង់ភ្នែកចាក់ទៅក្រោយ ឈឺក្បាល ចង់ក្អួត ឈឺពោះ ឈឺសាច់ដុំ ឈឺសន្លាក់ដៃជើង ស្នាមអុចៗក្រហមលើស្បែក និងមានការហូរឈាមតាមអញ្ចាញឆ្មេញជាដើម។ ករណីបើមានរោគសញ្ញាក្តៅខ្លួនភ្លាមៗ ក្រសួងស្នើឲ្យជៀសវាងការប្រើថ្នាំអាស្ពីរីន និងត្រូវបញ្ចូនអ្នកជំងឺទៅរកសេវាពិនិត្យ ដើម្បីទទួលបានថ្នាំព្យាបាលត្រឹមត្រូវ។

នៅក្នុងសេចក្តីណែនាំរបស់ក្រសួងសុខាភិបាល បានសរសេរពីសម្តីរបស់លោក ម៉ម ប៊ុនហេង យ៉ាងដូច្នេះថា៖« ខ្ញុំ និងគ្រួសារខ្ញុំជាគ្រួសារគំរូ ព្រោះផ្ទះខ្ញុំ និងលំនៅដ្ឋានរបស់ខ្ញុំ គ្មានដង្កូវទឹក»។ តាមរយៈខ្លឹមសារនេះ លោក រដ្ឋមន្ត្រី ចង់ណែនាំឲ្យពលរដ្ឋគ្រប់រូបលុបបំបាត់ជម្រកមូសខ្លា ដោយប្រកាន់ខ្ជាប់ខ្ជួននូវទម្លាប់រស់នៅល្អ ដើម្បីជៀសផុតពីជំងឺគ្រុនឈាម។

តាមការស្រាវជ្រាវបាណកសាស្ត្រ របស់កម្មវិធីជាតិប្រយុទ្ធប្រឆាំងនឹងជំងឺគ្រុនឈាមនៃមជ្ឈមណ្ឌលជាតិ ប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រនៃក្រសួងសុខាភិបាល មូសខា្លចូលចិត្តពង និងបង្កបង្កើតកូនចៅ ក្នុងសំបកកង់ឡាន និងសំបកកង់ម៉ូតូចាស់ ចំនួន១១ដង ច្រើនជាងវត្ថុដក់ទឹក ឬដាក់ទឹកផ្សេងៗ។ ទន្ទឹមនឹងក្រសួងសិក្សាឃើញពីបញ្ហានេះហើយ ក្រសួងស្នើឲ្យ អាណាព្យាបាល មាតាបិតា កុមារកុមារី ម្ចាស់អាជីវកម្ម ត្រូវកំចាត់ដង្កូវទឹកនៅតាមកន្លែង ឬវត្ថុទឹកដក់ ដូច ជា ពាងទឹក អាងទឹក ថូផ្កា ធុង ក្រឡ ជាដើមត្រូវផ្លាស់ប្តូរទឹក និងលាងសំអាតជាប្រចាំ ដោយដាក់ថ្នាំអាបែត សម្លាប់ដង្កូវទឹក ឬចិញ្ចឹមកូនត្រីប្រាំពីរពណ៌។

តាមការអះអាងរបស់លោករដ្ឋមន្ត្រីនៅក្នុងសន្និបាតបូកសរុបការងារឆ្នាំ២០១៨ ពុំមានអ្នកស្លាប់ដោយសារជំងឺគ្រុនចាញ់ទេ។ ជាមួយគ្នាផងដែរ លោកនឹងណត់ផែនការលុបបំបាត់ជំងឺគ្រុនចាញ់ឆ្នាំ២០២០ នឹងខិតខំទប់ស្កាត់ការរាតត្បាតជំងឺគ្រុនឈាមឲ្យទាន់ពេលវេលា និងពង្រឹងកិច្ចការការងារផ្តល់ថ្នាំទម្លាក់ព្រូនឲ្យបានទូលំទូលាយផងដែរ៕