កីឡាជាតិ
ជាតិ
×![]()
ទោះបីក្រុមជម្រើសជាតិកម្ពុជារងបរាជ័យក្នុងជំនួបមិត្តភាពអន្តរជាតិកម្តៅសាច់ដុំជាមួយបង់ក្លាដែល តែលោក Felix Dalmas គ្រូបង្វឹកក្រុមជម្រើសជាតិកម្ពុជាពេញចិត្តចំពោះទម្រង់លេង និងការខិតខំប្រឹងប្រែងរបស់កីឡាករ។ លោកចាត់ទុកការបរាជ័យនេះថា ជាបទពិសោធមួយដ៏ល្អ សម្រាប់ការត្រៀមប្រកួតក្នុងវគ្គជម្រុះ AFC U23 Championship ដែលកម្ពុជាធ្វើជាម្ចាស់ផ្ទះការប្រកួតពូល H។ ជាមួយការអរគុណចំពោះការលើកទឹកចិត្តរបស់អ្នកគាំទ្រ លោកនៅតែបន្តស្នើឲ្យប្រជាពលរដ្ឋ ពិសេសអ្នកគាំទ្រកីឡាបាល់ទាត់ផ្តោតលើការអភិវឌ្ឍជាជាងលទ្ធផល។
គ្រូបង្វឹកក្រុមជម្រើសជាតិកម្ពុជាលោក Felix Dalmas បង្ហាញការពេញចិត្តយ៉ាងខ្លាំងចំពោះកូនក្រុមខ្លួន ទោះបីពួកគេមិនអាចស្វែងរកជ័យជម្នះ នាជំនួបមិត្តភាពអន្តរជាតិកម្តៅសាច់ដុំជាមួយបង់ក្លាដែល កាលពីល្ងាចថ្ងៃទី៩ ខែមីនា ឆ្នាំ២០១៩ ក៏ដោយ។ ទន្ទឺមនឹងបង្ហាញអារម្មណ៍សោកស្តាយចំពោះលទ្ធផល គ្រូបង្វឹកអាហ្សង់ទីនរូបនេះរំពឹងថា ប្រជាពលរដ្ឋជាពិសេសអ្នកគាំទ្រយល់ពីគោលបំណងរបស់លោក ក៏ដូចជាថ្នាក់ដឹកនាំក្នុងការអភិវឌ្ឍវិស័យកីឡាបាល់ទាត់នៅកម្ពុជា។
«សូមអរគុណដល់អ្នកគាំទ្រដែលបានមកចូលរួមលើកទឹកចិត្តពួកយើងផ្ទាល់ ទោះបីយើងមិនទទួលបានលទ្ធផលល្អក៏ដោយ តែខ្ញុំពិតជាពេញចិត្តចំពោះការខិតខំប្រឹងប្រែងរបស់កីឡាករទាំងអស់គ្នា។ យើងនឹងខិតខំបន្ថែមទៀតសម្រាប់ការប្រកួត AFC U23 ដែលនឹងខិតជិតមកដល់ក្នុងពេលឆាប់ៗខាងមុខនេះ»។ នេះជាការលើកឡើងរបស់លោក Felix Dalmas។
លោកបានចាត់ទុកជំនួបនេះថា វាជាការធ្វើតេស្ត និងជាបទពិសោធមួយដ៏ល្អក្នុងការពង្រឹងសមត្ថភាព និងបច្ចេកទេស សម្រាប់ត្រៀមការប្រកួតវគ្គជម្រុះ AFC U23 Championship។ សម្រាប់ការប្រកួតដែលរៀបចំចន្លោះពីថ្ងៃទី២៤-២៦ ខែមីនា នេះដែរ កម្ពុជាធ្វើជាម្ចាស់ផ្ទះការប្រកួតពូល H ដែលមានអូស្ត្រាលី កូរ៉េខាងជើងត្បូង និងឆាយនីសតៃប៉ិ។
ក្រុមជម្រើសជាតិកម្ពុជា ដែលសុទ្ធសឹងជាយុវជនអាយុក្រោម២២ឆ្នាំបានប្រកួតចាញ់ក្រុមជម្រើសជាតិបង់ក្លាដែស ក្នុងលទ្ធផល ១-០ នាជំនួបមិត្តភាពអន្តរជាតិកម្តៅសាច់ដុំកាលពីល្ងាចថ្ងៃសៅរ៍។ នេះជាបរាជ័យលើកទី៣សម្រាប់ក្រុមជម្រើសជាតិកម្ពុជាក្នុងប្រកួតប្រវត្តិជួបគ្នាចំនួន៤លើក។
មិនមែនតែកម្ពុជានោះទេ សូម្បីក្រុមជម្រើសជាតិបង់ក្លាដែស ដែលមានយុវជនអាយុក្រោម២៣៨០ភាគរយ ក៏ប្រើជំនួបមិត្តភាពនេះ ដើម្បីត្រៀមការប្រកួតវគ្គជម្រុះ AFC U23 ផងដែរ ដោយបង់ក្លាដែស ស្ថិតនៅក្នុងពូល B ជាមួយម្ចាស់ផ្ទះបារ៉េន ស្រីលង្គា និងប៉ាឡេស្ទីន៕
Tag:
បាល់ទាត់
Felix Dalmas
ជម្រើសជាតិកម្ពុជា
© រក្សាសិទ្ធិដោយ thmeythmey.com
