អាជ្ញាធរចិន បានចេញបញ្ជាឲ្យក្រុមហ៊ុនអាកាសចរណ៍ក្នុងស្រុកទាំងអស់ ផ្អាកការប្រើប្រាស់យន្តហោះប្រភេទ Boeing 737 Max ជាបណ្តោះអាសន្នសិន។ ការដាក់បញ្ជាយ៉ាងភ្ញាក់ផ្អើលនេះ គឺធ្វើឡើង ក្រោយពីយន្តហោះប្រភេទនេះរបស់ក្រុមហ៊ុន Ethiopian Airlines បានធ្លាក់កាលពីថ្ងៃអាទិត្យ ដោយមនុស្សទាំងអស់លើយន្តហោះបាត់បង់ជីវិត។ ការណ៍នេះកំពុងបង្កជាកង្វល់ដ៏ធំជុំវិញសុវត្ថិភាពនៃយន្តហោះលក់ដាច់បំផុតរបស់ក្រុមហ៊ុនអាមេរិក។
ក្រុមហ៊ុនអាកាសចរណ៍ក្នុងស្រុក ដែលដាក់ដំណើរការយន្តហោះប្រភេទ Boeing 737 Max ចំនួន ៦០គ្រឿង បានទទួលបញ្ជានេះពីរដ្ឋបាលអាកាសចរណ៍ស៊ីវិលចិន (CAAC) ។ ភ្លាមៗនោះ ក្រុមហ៊ុនទាំងអស់ បានបញ្ឈប់ការប្រើប្រាស់យន្តហោះប្រភេទនេះជាបណ្តោះអាសន្ន កាលពីថ្ងៃអាទិត្យទី១០ ខែមីនា។ នេះបើតាមការចុះផ្សាយរបស់សារព័ត៌មានក្នុងស្រុកចិនមួយឈ្មោះថា Caijing ។
និយាយពីហេតុការណ៍ធ្លាក់យន្តហោះរបស់ក្រុមហ៊ុន Ethiopian Airlines មុននឹងកើតមានហេតុការណ៍នេះ អ្នកបើកបរយន្តហោះ ប្រភេទ Boeing 737 Max ដែលបាត់បង់ជីវិតក្នុងហេតុការណ៍ដ៏អាក្រក់នេះដែរនោះ បានរាយការណ៍ពីបញ្ហាបច្ចេកទេស ត្រឹមប៉ុន្មាននាទីប៉ុណ្ណោះក្រោយពីយន្តហោះឡើងផុតពីដី។ អ្នកបើកបររូបនេះ ក៏បានស្នើសុំកាច់ចង្កូតយន្តហោះខ្លួនត្រឡប់ទៅកាន់អាកាសយានដ្ឋានវិញ។ ប៉ុន្តែជាអកុសល បន្តិចក្រោយមកយន្តហោះនេះបានធ្លាក់ចុះបុកដី និងសម្លាប់មនុស្សទាំងអស់១៥៧នាក់ដែលជិះនៅលើនោះ។
មែនទែនទៅ យន្តហោះ Boeing 737 Max របស់អេត្យូពី គឺជាយន្តហោះប្រភេទដូចគ្នាទៅនឹងយន្តហោះរបស់ក្រុមហ៊ុនអាកាសចរណ៍ Lion Air របស់ឥណ្ឌូណេស៊ី ដែលបានធ្លាក់ក្នុងទីក្រុង Jakarta កាលពីខែតុលាឆ្នាំ២០១៨កន្លងទៅ។ ក្នុងហេតុការណ៍នេះ មនុស្សទាំងអស់ចំនួន១៨៩នាក់បានបាត់បង់ជីវិត។
យន្តហោះ Boeing 737 Max ដែលផលិតដោយក្រុមហ៊ុនយក្ស Boeing Commercial Airplanes នេះ គឺជាយន្តហោះស៊េរី Boeing 737 ចុងក្រោយរបស់ខ្លួន។ យន្តហោះប្រភេទថ្មីនេះ ត្រូវបានផលិតចំនួន ៣៣០គ្រឿង គិតមកត្រឹមខែធ្នូ ឆ្នាំ២០១៨។ វាចាប់ផ្តើមប្រតិបត្តិការហោះហើរលើកដំបូងក្នុងខែមករា ឆ្នាំ២០១៦។
យ៉ាងណាមិញ អ្នកជំនាញផ្នែកអាកាសចរណ៍ បានបង្ហាញពីក្តីកង្វល់ពាក់ព័ន្ធនឹងសុវត្ថិភាពនៃយន្តហោះប្រភេទនេះ ដោយនិយាយថា ភាពដូចគ្នារវាងហេតុការណ៍ធ្លាក់យន្តហោះរបស់ Ethiopian Airlines និងគ្រោះថ្នាក់របស់ក្រុមហ៊ុន Lion Air របស់ឥណ្ឌូណេស៊ី ពិបាកធ្វើឲ្យពិភពលោកព្រងើយកន្តើយណាស់។
ទីមួយគឺ យន្តហោះប្រភេទនេះបើកប្រតិបត្តិការដោយក្រុមហ៊ុនអាកាសចរណ៍ល្បីឈ្មោះ ជាមួយនឹងកំណត់ត្រាសុវត្ថិភាពខ្ពស់។ ចំណែកទីពីរគឺ ជើងហោះហើររបស់ក្រុមហ៊ុន Lion Air ធ្លាក់ចុះត្រឹម១៣នាទីប៉ុណ្ណោះក្រោយហោះផុតពីដី ខណៈដែលជើងហោះហើររបស់ក្រុមហ៊ុន Ethiopian Airlines ជួបគ្រោះថ្នាក់ ក្នុងរយៈពេលត្រឹម៦នាទីប៉ុណ្ណោះបន្ទាប់ពីហោះចេញពីអាកាសយានដ្ឋាន។
ថ្លែងប្រាប់ទូរទស្សន៍ CNN លោក Mary Schiavo អ្នកជំនាញផ្នែកអាកាសចរណ៍ និងអតីតមន្ត្រីជាន់ខ្ពស់នៃក្រសួងដឹកជញ្ជូនអាមេរិក និយាយថា៖ «រឿងនេះពិតជាគួរឲ្យសង្ស័យណាស់។ យើងមានយន្តហោះស៊េរីថ្មីមួយ ដែលបានធ្លាក់ចំនួនពីរលើកក្នុងអំឡុងពេលត្រឹមតែមួយឆ្នាំ។ នេះអាចជាសារព្រមានមួយដល់ឧស្សាហកម្មអាកាសចរណ៍»៕