ម្ចាស់ក្លិប CTT ថា រិន សារ័ត្ន បង្ហាញសមត្ថភាពសមជាអ្នកប្រដាល់លំដាប់កំពូលរបស់ ONE

ONE Championship

កីឡាជាតិ

ជាតិ

ម្ចាស់ក្លិប CTT ថា រិន សារ័ត្ន បង្ហាញសមត្ថភាពសមជាអ្នកប្រដាល់លំដាប់កំពូលរបស់ ONE

11, Mar 2019 , 2:59 pm

រូបភាព

ដោយ: ថ្មីៗ

អត្ថបទ៖ Matias Andres

កីឡាករ រិន សារ័ត្ន របស់ក្លិប Cambodian Top Team មិនបានទទួលជោគជ័យឡើយក្នុងការប្រកួតទល់នឹងកីឡាករសំណព្វចិត្តរបស់ម្ចាស់ផ្ទះមីយ៉ាន់ម៉ា “The Dragon Leg” Tial Thang នៅ ONE: REIGN OF VALOR កាលពីថ្ងៃសុក្រទី៨ខែ មីនា ឆ្នាំ២០១៩។

ក្នុងការប្រកួតទម្ងន់ catchweight ៦៨គីឡូក្រាមក្នុងគូសំខាន់ក្នុងរដ្ឋធានីយ៉ាំងហ្គូន ប្រទេសមីយ៉ាន់ម៉ា សារ័ត្ន បានល្បងសមត្ថភាពជាមួយសមាជិកថ្មីរបស់ស្ថាប័នក្បាច់គុនធំបំផុតរបស់ពិភពលោកនេះ ទាំងបែបឈរវាយនិងផ្ដេកខ្លួនលើផ្ទៃសង្វៀន។

កីឡាករគុនខ្មែរវ័យ២៥ឆ្នាំនៅទីបំផុតបានរងបរាជ័យដោយចៅក្រមទាំង៣បានសម្រេចជាឯកច្ឆន្ទឲ្យ Thang ឈ្នះ ក្រោយប្រកួតគ្នា៣ទឹកយ៉ាងសកម្ម។

ទោះបីសារ័ត្នចាញ់ក្នុងការប្រកួតលើកដំបូងរបស់គេក្នុងឆ្នាំ២០១៩ក្ដី តែគេនៅទទួលបានការសរសើរខ្ពស់ពីសំណាក់អ្នកគាំទ្រនិងក្រុមការងាររបស់ខ្លួន។

ជាក់ស្ដែង លោក ហ៊ុន ចាន់រាជ្យ ម្ចាស់ក្លិប Cambodian Top Team និយាយថា៖ «គុណផលរបស់សារ័ត្នទល់នឹងកីឡាករដែលមានកម្ពស់ខ្ពស់ជាងបានបង្ហាញថាកីឡាករកម្ពុជាមិនមែនងាយយកឈ្នះដូចមុនទៀតឡើយ។ គាត់បានប្រឹងប្រែងខ្លាំងទល់នឹងជើងឯកចំបាប់៤សម័យរបស់មីយ៉ាន់ម៉ានិងជាជើងឯកក្រុង New York»។

នៅមុនការប្រកួតចាប់ផ្ដើម Thang បានព្យាករទុកជាមុនថាគេនឹងបញ្ចប់ សារ័ត្ន ដោយមិនប្រើពេលយូរ ខណៈ សារ័ត្ន បានសន្យាថាគេនឹងបង្ហាញក្បាច់ថ្មីៗដែលគេបានហ្វឹកហាត់នៅថៃ។

ជាក់ស្ដែង នៅពេលការប្រកួតចាប់ផ្ដើមជាផ្លូវការ សារ័ត្ន បានបង្ហាញភាពរីកចម្រើនយ៉ាងខ្លាំងត្រង់របៀបការពារការចូលចាប់ផ្ដួលរបស់គូបដិបក្ខ និងបានតតាំងទឹកទី១ដោយឈរវាយភាគច្រើន។

លោក ចាន់រាជ្យ បន្តថា៖ «សម្រាប់សារ័ត្ន ការការពារការចូលចាប់ផ្ដួលនិងអាចឈរតតាំងទល់នឹងកីឡាករដូចជា Tial Thang នេះបង្ហាញឲ្យឃើញថាគេបានរីកចម្រើនកម្រិតណាក្នុងនាមជាកីឡាករគុនចម្រុះម្នាក់»។

«សារ័ត្នមានការវាយតបយ៉ាងចំណានមួយចំនួនក្នុងពេលឈរតតាំងគ្នា ប៉ុន្តែមិនអាចទប់ទល់នឹងកម្លាំងដ៏ខ្លាំងរបស់ជើងឯកចំបាប់មីយ៉ាន់ម៉ាដូចជា Tial បានល្អឡើយ ហើយនោះជាការចាញ់ប្រៀបរបស់គាត់ក្នុងការប្រកួត»។

បើក្រឡេកមើលការប្រកួតរបស់អត្តពលិកកម្ពុជាក្នុងឆ្នាំ២០១៩នេះ ថ្នាក់ដឹកនាំក្លិប CTT លោក ចាន់រាជ្យ នៅតែមានផ្នត់គំនិតវិជ្ជមាន និងមើលឃើញថាវិស័យគុនចម្រុះកម្ពុជាកំពុងរះឡើង។

លោក ចាន់រាជ្យ បញ្ជាក់ថា៖ «សារ័ត្នបានបញ្ជាក់ឱ្យឃើញថាគាត់ស្ថិតក្នុងចំណោមកីឡាករលំដាប់កំពូលមួយចំនួនរបស់ ONE Championship ហើយគាត់សមនឹងទទួលបានការទទួលស្គាល់ចំពោះការលះបង់និងការខិតខំប្រឹងប្រែងរបស់គាត់ដើម្បីដាក់កម្ពុជានៅលើឆាកពិភពលោក។ ខ្ញុំប្រាកដថាសារ័ត្នបានធ្វើឲ្យ Tial និងមនុស្សជុំវិញពិភពលោកភ្ញាក់ផ្អើល»។

សូមរម្លឹកថាមកទល់ពេលនេះ កម្ពុជានៅមិនទាន់បង្កើតបានជោគជ័យជាថ្មីដូចកាលពីពាក់កណ្ដាលខែកុម្ភៈដែល នៅ ស្រីពៅ បានស៊ីដាច់ពិន្ទុលើ Rika Ishige របស់ថៃនៅឡើយទេ។

ទោះបែបនេះក្ដី ព្រះរាជាណាចក្រអច្ឆរិយៈនៅតែមានអត្តពលិកចូលប្រកួតជាប្រចាំនៅ ONE Championship និងស្ថាប័នអន្តរជាតិល្បីៗផ្សេងទៀត។

លោក ចាន់រាជ្យ មើលឃើញភាពប្រែប្រួលនៃទស្សនៈរបស់ប្រជាជនកម្ពុជាចំពោះវិស័យក្បាច់គុនក្នុងប្រទេសនេះ តែក៏សង្ឃឹមថានឹងកាន់តែមានការគាំទ្រច្រើនជាងនេះទៀតនៅពេលអនាគត។

ថ្នាក់ដឹកនាំក្លិប CTT បញ្ជាក់ជាចុងក្រោយថា៖ «ពួកយើងសមនឹងទទួលបានការគាំទ្រនិងលើកតម្កើងដូចគ្រប់គ្នាផ្សេងទៀតដែរ។ ពួកយើងហ៊ានទទួលយកការប្រកួតដែលត្រូវបានផ្ដល់មក និងបានបញ្ចេញនូវអ្វីដែលយើងមាន ហើយពួកយើងបានបង្កើតភាពភ្ញាក់ផ្អើលខ្លាំងជាច្រើនលើកមកហើយ។ ដូច្នេះសូមជួយលើកតម្កើងអត្តពលិកកម្ពុជាយើងនិងបន្តអភិវឌ្ឍវីរបុរសកម្ពុជាយើងជាបន្តទៀត»៕