ជាតិ
លោក ប្រាក់ សុខុន៖ កម្ពុជា ជារដ្ឋតូចមួយ តែយើងមានភាពឆ្លាតវៃ
× ភ្នំពេញ៖ កម្ពុជា គឺជាប្រទេសតូចមួយ តែមានភាពឆ្លាតវៃ ក្នុងការបត់បែនឆ្លើយតបទៅនឹងនយោបាយការបរទេសថ្មីៗ របស់ពិភពលោក ។ នេះជាការលើកឡើងរបស់លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៅក្នុងឱកាសអបអរសាទរ «ASEM DAY»។
ផ្ដើមឃ្លារក្នុងសន្ទរកថា ចំនួន៨ទំព័រ លោក ប្រាក់ សុខុន បាននិយាយពីចំណុចវិជ្ជមាន ដែលកម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលអាស៊ី -អឺរ៉ុប លើកទី១៣ នៅឆ្នាំ២០២០ខាងមុខ។ សម្រាប់លោក ប្រាក់ សុខុន ការរៀបចំធ្វើម្ចាស់ផ្ទះនៃកិច្ចប្រជុំអាស៊ី-អាស៊ី នេះ វាគឺជាផ្នែកំខាន់មួយ ដែលជួយឲ្យកម្ពុជាកាន់តែមានមុខមាត់ និងកិត្យានុភាព នៅលើឆាកអន្តរជាតិ។ ជាពិសេសវាក៏បង្ហាញនូវការចូលរួមយ៉ាងសកម្មរបស់កម្ពុជា ដោយឈរលើមូលដ្ឋាននៃភាពជាដៃគួស្មើគា្នទៀតផង។
និយាយពីចំណុចខាងលើនេះហើយ រដ្ឋមន្ត្រីការបរទេសកម្ពុជា ក៏ងាកមកនិយាយពីបញ្ហាប្រឈម និងសន្តិសុខនានា នៅក្នុងពិភពលោកវិញម្ដង។ ត្រង់ចំណុចនេះ លោក ប្រាក់ សុខុន បានសង្កត់ធ្ងន់ទៅលើសកម្មភាពរបស់ប្រទេសមហាអំណាចទី១ (សហរដ្ឋអាមេរិក) ដែលងាកចេញពីប្រព័ន្ធពហុភាគីនិយម ទៅកាន់ឯកតោភាគីនិយម និងគាំពារនិយម ហើយកំពុងគំរាមដល់ប្រព័ន្ធសណ្ដាប់ធ្នាប់ពិភពលោកបច្ចុប្បន្ន។ ចំណែកការប្រកួតប្រជែងរបស់ប្រទេសមហាអំណាចធំៗ ក៏ជះឥទ្ធិពលអវិជ្ជមាន និងសម្ពាធមកលើកម្ពុជា និងបណ្ដាប្រទេសតូច ធំនៅក្នុងតំបន់ និងពិភពលោក។
ដ្បិតកម្ពុជាអាចរងឥទ្ធិពលអវិជ្ជមានពីសកម្មភាពប្រជែងរបស់មហាអំណាចក្តី ប៉ុន្តែវាមិនធ្វើឲ្យកម្ពុជាជួបផលលំបាកក្នុងការដោះស្រាយឡើយ ។ នោះក៏ព្រោះតែកម្ពុជាមានភាពឆ្លាតវៃ ក្នុងបត់បែន និងទប់ទល់ឆ្លើយតបទៅនឹងការប្រជែងអំណាចនៅក្នុងភូមិសាស្ត្រនយោបាយរបស់ប្រទេសធំៗទាំងនោះ។ នេះជាការលើកឡើងរបស់លោក ប្រាក់ សុខុន ។
ក្នុងសន្ទរកថា នៃឱកាសអបអរសាទរ «ASEM DAY នៅព្រឹកថ្ងៃទី១១ មីនា រដ្ឋមន្ត្រីការបរទេសកម្ពុជារូបនេះ បាននិយាយដូច្នេះថា៖«កម្ពុជាយើងកំពុងរីករាយជាមួយកំណើនសេដ្ឋកិច្ចដ៏ខ្លាំងក្លា និងស្ថិរភាពនយោបាយរបស់ខ្លួន។ កត្តាទាំងពីរនេះ គឺជាធាតុសំខាន់បំផុត ដើម្បីជួយយើងនៅក្នុងការដោះស្រាយ និងជម្នះនូវនិន្នាការ និងការគំរាមកំហែងនៅក្នុងតំបន់ និងសកលលោក។ ខ្ញុំតែងតែរំឭកថា ប្រទេសកម្ពុជា គឺជារដ្ឋតូចមួយ ។ យើងមិនអាចផ្លាស់ប្ដូរឋានៈនេះបានឡើយ ប៉ុន្តែយើងអាចមានភាពឆ្លាតវៃ និងបុរសកម្ម ដើម្បីបន្តបត់បែនសម្របខ្លួនទៅនឹងតថភាពនយោបាយថ្មី ដោយផ្អែកលើឆន្ទៈ សមត្ថភាព និងផលប្រយោជន៍ស្នូលរបស់យើង»។
បើតាមលោក ប្រាក់ សុខុន កម្ពុជាបានកំណត់ទស្សនវិស័យការបរទេស៤ចំណុច ដើម្បីឆ្លើយតបបញ្ហាដែលកំពុងកើតមាននៅក្នុងពិភពលោក។ ចំណុចទាំងនោះរួមមាន តម្លៃស្នូលនៃការការពារឯករាជ្យ និងអធិបតេយ្យភាព នៅក្នុងកាលៈទេសៈចំពោះមុខ។ ការប្រើនយោបាយការបរទេសរឹងមាំ និងការងារការទូតបត់បែន ដែលឆ្លើយតបទៅនឹងសក្ដានុពលនៃការប្រកួតប្រជែងភូមិសាស្ត្រនយោបាយ ក្នុងចំណោមមហាអំណាច។ ការលើកកម្ពស់ការទូតសេដ្ឋកិច្ច ពាណិជ្ជកម្ម ទេសចរណ៍ និងការទូតវប្បធម៌ ដើម្បីធានាបាននូវប្រភពបន្ថែមសម្រាប់កំណើន តាមរយៈការធ្វើពិពិធកម្ម ក្នុងការពង្រឹងសេដ្ឋកិច្ចជាតិ។ ជាពិសេសការរួមវិភាគទានដ៏សកម្មរបស់កម្ពុជា នៅក្នុងការបន្តរក្សាសន្តិភាព និងដោះស្រាយនូវបញ្ហាប្រឈមសកល។ នេះជាការបញ្ជាក់របស់លោក ប្រាក់ សុខុន៕
Tag:
ប្រាក់ សុខុន
អាស៊ី
អឺរ៉ុប
© រក្សាសិទ្ធិដោយ thmeythmey.com