ជាតិ
សង្គមជាតិ
អាជ្ញាធរអប្សរា ពិចារណារឿងចិនសុំខ្ចីបដិមាមួយចំនួន ទៅតាំងក្នុងពិព័រណ៍អរិយធម៌អាស៊ី
× សៀមរាប៖ អនុប្រធាននៃពិព័រណ៌សិល្បៈចិន បានជួបអាជ្ញាធរជាតិអប្សរា នៅថ្ងៃទី១១ មីនា ដើម្បីពិភាក្សាពីគម្រោងខ្ចីរូបបដិមា ពីប្រាសាទបុរាណខ្មែរមួយចំនួន ក្នុងរមណីយដ្ឋានអង្គរ យកទៅបង្ហាញក្នុងពិព័រណ៍អរិយធម៌អាស៊ីនៅប្រទេសចិន។ ពិព័រណ៍នេះ គ្រោងធ្វើនៅក្នុងខែឧសភា ខាងមុខ។
អ្នកនាំពាក្យអាជ្ញាធរជាតិអប្សរា លោក ឡុង កុសល បានឱ្យដឹងថា ភាគីចិនដែលដឹកនាំដោយលោក CHOU Ming អនុប្រធាននៃពិព័រណ៌សិល្បៈចិន ក្រោមការគ្រប់គ្រងនៃរដ្ឋបាលបេតិកភណ្ឌវប្បធម៌ជាតិចិន បានជួបពិភាក្សាជាមួយអគ្គនាយកអាជ្ញាធរជាតិអប្សរា លោក ហង់ ពៅ ពីគម្រោងខ្ចីរូបបដិមានៅប្រាសាទចៅសាយទេវតា និងប្រាសាទតាកែវ ដើម្បីយកទៅតាំងពិព័រណ៌នៅប្រទេសចិន។ លោកបន្ថែមថា ពិព័រណ៌នេះ ភាគីចិនបានអញ្ជើញបណ្ដាប្រទេសក្នុងតំបន់អាស៊ី ក្នុងនោះក៏មានកម្ពុជាដែរ ដើម្បីបង្ហាញពីអរិយធម៌ប្រទេសក្នុងតំបន់អាស៊ី។
ទាក់ទងនឹងការខ្ចីបដិមានៅប្រាសាទចៅសាយទេវតា និងប្រាសាទតាកែវវិញ អ្នកនាំពាក្យពន្យល់ថា ដោយសារភាគីចិនមានបំណងរំលេចជាពិសេសនូវកិច្ចសហប្រតិបត្តិការរវាងកម្ពុជា និងចិន ទៅលើកិច្ចការងារនៃការថែរក្សាបេតិកភណ្ឌនេះ។ គេដឹងហើយថា ចិនបានជួយជួសជុលប្រាសាទចៅសាយទេវតា បន្ទាប់មកប្រាសាទតាកែវ ហើយបាននិងកំពុងសិក្សាពីគម្រោងជួសជុលប្រាសាទមួយចំនួនទៀតនៅតំបន់អង្គរ រួមមាន ប្រាសាទបេងមាលា ប្រាសាទភិមានអាកាស និងផ្នែកមួយនៃកំពែងក្រុងអង្គរធំ ក៏ដូចជាគម្រោងជួសជុលប្រាសាទព្រះវិហារផងដែរ។
លោក ឡុង កុសល បន្ថែមថា ការងារនេះជាកិច្ចសហប្រតិបត្តិការរវាងប្រទេសនិងប្រទេស ហើយមិនមែនជារឿងចំឡែកទេ ទាក់ទងនឹងការងារខ្ចីបដិមានេះ។ លោកបន្ថែមថា កន្លងមកកម្ពុជាក៏ធ្លាប់ឱ្យប្រទេសមួយចំនួនខ្ចីបដិមាដែរ ក្នុងនោះរួមមាន ប្រទេសបារាំង ជប៉ុន និងសហរដ្ឋអាមេរិកជាដើម។
យ៉ាងណា អ្នកនាំពាក្យលើកឡើងថា គម្រោងខ្ចីបដិមានេះមិនទាន់ច្បាស់លាស់ឡើយ ដោយសារអាជ្ញាធរជាតិអប្សរា ត្រូវសិក្សាឱ្យបានល្អិតល្អន់ទៅលើការវាយតម្លៃ ការធានារ៉ាប់រង មុននឹងអនុញ្ញាតឱ្យបដិមា ឬបុរាណវត្ថុនានាចាកចេញពីប្រទេស។ លោក ឡុង កុសល សុំឱ្យសាធារណជនទាំងអស់កុំឱ្យមានការព្រួយបារម្ភ និងសូមអរគុណចំពោះការចូលរួមនូវមតិយោបល់ផ្សេងៗទាក់ទងនឹងបញ្ហានេះ៕
រូបភាព៖ ប្រាសាទតាកែវ ដែលចិនបញ្ចប់គម្រោងជួសជុលនៅដើមឆ្នាំ ២០១៨
© រក្សាសិទ្ធិដោយ thmeythmey.com