សហព័ន្ធកីឡាបាល់ទាត់កម្ពុជារកចំណូលបានជាង ៦លានដុល្លារក្នុងឆ្នាំ២០១៨ ដោយចំណូលទាំងនេះទទួលបានពីប្រភពចំនួន១០ធំៗ។ ក្រោយទូទាត់ចំណាយចំណូលក្នុងឆ្នាំ២០១៨ សហព័ន្ធនេះនៅសល់ថវិកាជាង១,៥លានដុល្លារ សម្រាប់ប្រើប្រាស់បន្តនៅឆ្នាំ២០១៩។ បន្ថែមលើនេះ សហព័ន្ធ ក៏បានបង្ហាញពីគម្រោងចំណូលចំណាយលើដំណើរការអភិវឌ្ឍកីឡាបាល់ទាត់កម្ពុជាក្នុងឆ្នាំ២០១៩ ផងដែរ។
យោងតាមរបាយការណ៍ហិរញ្ញវត្ថុ ដែលអានដោយលោក អ៊ុក សិទ្ធិជាតិ ប្រធានគណៈកម្មការហិរញ្ញវត្ថុរបស់ព័ន្ធកីឡាបាល់ទាត់កម្ពុជា នៅឆ្នាំ២០១៨ សហព័ន្ធបាល់ទាត់កម្ពុជារកចំណូលបានចំនួន ៦,០២៥,៤២៨.៤៨ដុល្លារ។ ចំណូលទាំងនេះទទួលបានពីប្រភពធំៗចំនួន១០។
ប្រភពចំណូលទាំងនោះរួមមានថវិកាសល់ក្នុងឆ្នាំ២០១៧(១,៤៧៧,៣២៧.៨៤ដុល្លារ), សហព័ន្ធកីឡាបាល់ទាត់អន្តរជាតិ FIFA (១,៧៧២,៩៨៥ដុល្លារ), សហព័ន្ធកីឡាបាល់ទាត់អាស៊ី AFC (៣១៥,៨៧៣ដុល្លារ), សហព័ន្ធកីឡាបាល់ទាត់អាស៊ីអាគ្នេយ៍ AFF (១៩៩,០៣៣.៩៧ដុល្លារ), សហព័ន្ធកីឡាបាល់ទាត់ជប៉ុន JFA (២០,០០០ដុល្លារ), ក្រុមហ៊ុនក្នុងស្រុកនិងសកម្មភាពផ្សេងៗរបស់ FFC (៦៨៦,៩០០ដុល្លារ), ការឧបត្ថម្ភគាំទ្ររបស់រដ្ឋ (២៩៥,៤៤៦.៤៥ដុល្លារ), ពីសប្បុរសជន(១០,០០០ដុល្លារ), ចំណូលក្រៅផែនការ(៣៤៧,៨៩៧.២២ដុល្លារ) និងចំណូលពីក្រុមហ៊ុនឯកជនដែលមិនទាន់ទទួលបាន(៧២៩,១០០ដុល្លារ)។
ប៉ុន្តែសហព័ន្ធបានចំណាយលើការអភិវឌ្ឍហេដ្ឋារចនាសម្ព័ន្ធ ធនធានមនុស្ស ប្រាក់ខែបុគ្គលិក គ្រូបង្វឹក ការរៀបចំការប្រកួត និងចូលរួមការប្រកួតអន្តរអន្តរជាតិអស់ចំនួន៤,៤៨៨,៣៧០.៤១ដុល្លារ។
ថវិកាទាំងនេះ ត្រូវបានចំណាយលើការរៀបចំការប្រកួតក្នុងប្រទេសអស់ចំនួន៣១៦,៤៣១.៥៨ដុល្លារ, គម្រោងអភិវឌ្ឍបាល់ទាត់ថ្នាល និងយុវជន ៦៦៤,៧៩៦.៥៥ដុល្លារ, ការអភិវឌ្ឍគ្រូបង្ហាត់ ៦៤,០១៩.៥៨ដុល្លារ, ការអភិវឌ្ឍអាជ្ញាកណ្តាល ៦៩,៨១៣.៣៦ដុល្លារ, ការចូលរួមប្រកួតនិងអភិវឌ្ឍក្រុមជម្រើសជាតិ ៩៤៣,៩៤៧.៦៥ដុល្លារ, ការអភិវឌ្ឍបាល់ទាត់នារី ៩៦,៧៧៦.៧៨ដុល្លារ, ចំណាយលើសាលាបាល់ទាត់ជាតិ ១៩៧,៣៨៦.០៨ដុល្លារ, ប្រតិបត្តិការណ៍និងថែរក្សាមជ្ឈមណ្ឌលបាល់ទាត់ជាតិ ៧០,៧៨៨.១៣ដុល្លារ, ចំណាយលើប្រតិបត្តិការទីផ្សារ និងទំនាក់ទំនង ២៩,២៥០.០៥ដុល្លារ, ប្រាក់ខែបុគ្គលិកនិងគ្រូ ៦៧៥,០១២.៧១ដុល្លារ និងចំណាយលើរដ្ឋបាល ព្រឹត្តិការណ៍និងសង្គម ១,៣៦០,១៤៧.៩៤ដុល្លារ។
ក្រោយទូទាត់ចំណាយ និងចំណូល សហព័ន្ធនៅសល់ថវិកាចំនួន១,៥៣៧,០៥៨.០៧ដុល្លារ សម្រាប់ប្រើប្រាស់លើគម្រោងអភិវឌ្ឍន៍ក្នុងឆ្នាំ២០១៩ ដែលចំណូលនេះ មានកើនឡើងបើធៀបនឹងឆ្នាំ២០១៨ ដែលមានត្រឹមតែ១,៤៧៧,៣២៧.៨៤ដុល្លារ។
ក្រៅពីបង្ហាញរបាយការណ៍ចំណាយចំណូលក្នុងឆ្នាំ២០១៨ លោក អ៊ុក សិទ្ធិជាតិ ក៏បានបង្ហាញពីគម្រោងចំណូលចំណាយក្នុងឆ្នាំ២០១៩ ផងដែរ ដោយឆ្នាំនេះ ការចំណាយរបស់សហព័ន្ធ កើនឡើងបើធៀបនឹងឆ្នាំ២០១៨។ បើតាមរបាយការណ៍ហិរញ្ញវត្ថុខាងលើក្នុងឆ្នាំ២០១៩ សហព័ន្ធគ្រោងចំណាយចំនួន ៨,១៨៧,៩៩៩ដុល្លារ ខណៈគម្រោងចំណូលមានត្រឹមតែ ៧,៤៩០,៥២០ដុល្លារ ដែលធ្វើឲ្យសហព័ន្ធនៅខ្វះថវិកាចំនួន ៦៩៧,៤៧៩ដុល្លារ ក្នុងការចំណាយលើការអភិវឌ្ឍន៍នៅឆ្នាំ២០១៩។
បន្ថែមលើរបាយការណ៍ហិរញ្ញវត្ថុ អង្គមហាសន្និបាត ក៏បានបង្ហាញពីរបាយការណ៍វឌ្ឍនភាព និងសមិទ្ធផលដែលសម្រេចបានក្នុងឆ្នាំ២០១៨ និងដាក់ចេញយុទ្ធសាស្ត្រអភិវឌ្ឍន៍សម្រាប់ឆ្នាំ២០១៩ ពិសេសផែនការយុទ្ធសាស្ត្រឆ្ពោះទៅឆ្នាំ២០២៣ ដែលកម្ពុជាធ្វើជាម្ចាស់ផ្ទះកីឡាស៊ីហ្គេម។ លើសពីនេះ អង្គមហាសន្និបាតបានប្រកាសរំសាយសមាជិកប្រតិបត្តិផុតអាណត្តិពីររូបរួមមាន លោក អ៊ុក សិទ្ធិជាតិ និងលោក ខៀវ ចិន្តាវ័ន្ត និងរៀបចំបោះឆ្នោតជ្រើសរើសសមាជិកពីររូបជំនួសតំណែងនេះផងដែរ។
តាមរយៈការបោះឆ្នោតនៅក្នុងមហាសន្និបាតបូកសរុបការងារឆ្នាំ២០១៨ និងដាក់ទិសដៅអនុវត្តឆ្នាំ២០១៩ នៅថ្ងៃទី១១ មីនា ឆ្នាំ២០១៩ លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡានៃក្រសួងអប់រំយុវជននិងកីឡា ដែលជាសមាជិកប្រតិបត្តិចាស់ រួមជាមួយលោកស្រី ពុធ ធីតា ប្រធានក្លិបបឹងកេត ត្រូវបានអង្គមហាសន្និបាតបោះឆ្នោតគាំទ្រឲ្យធ្វើជាសមាជិកប្រតិបត្តិថ្មី។ ក្នុងនោះលោក អ៊ុក សិទ្ធិជាតិ ទទួលបានការគាំទ្រចំនួន៣២សម្លេង ក្នុងចំណោមអ្នកចូលរួមបោះឆ្នោតសរុប៣៧រូប ខណៈលោកស្រី ពុធ ធីតា ទទួលបាន២៩សម្លេង។
សម្រាប់ការបោះឆ្នោតដែលមានលោក ហ៊ុន សាមុត, លោក ដួង មាសចំរើន និងលោក ប៉ុន សុខ ជាគណៈរៀបចំការបោះឆ្នោតមានបេក្ខជនឈរឈ្មោះចំនួន៦រូបរួមមានលោក អ៊ុក សិទ្ធិជាតិ (សមាជិកប្រតិបត្តិផុតអាណត្តិ), លោក ខៀវ ចិន្តាវ័ន្ត(សមាជិកប្រតិបត្តិផុតអាណត្តិ), លោក អៀង សាក់នីដា, លោក ហុក សុចិត្រា, លោក ចាប សុខម៉េង និងអ្នកស្រី ពុធ ធីតា។ លោក អៀង សាក់នីដា ទទួលបាន៦សម្លេង, លោក ខៀវ ចិន្តាវ័ន្ត បាន៣សម្លេង, លោក ហុក សុចិត្រា បាន៤សម្លេង ចំណែកលោក ចាប សុខម៉េង មិនទទួលបានសម្លេងគាំទ្រនោះទេ៕