ភ្នំពេញ៖ ស៊ុយអែត និងកម្មវិធីអភិវឌ្ឍន៍សហប្រជាជាតិ (UNDP) បានជួយកម្ពុជាអនុវត្តគម្រោងថ្មីមួយ ដើម្បីនិរន្តរភាពបរិស្ថាននៅកម្ពុជា។ គម្រោងថ្មីដែលត្រូវអនុវត្តសម្រាប់រយៈពេលពីរឆ្នាំនេះ មានគោលដៅផ្ដល់នូវដំណោះស្រាយថ្មីៗលើភាពរិចរិលនៃបរិស្ថាន បញ្ហាសំណល់ដែលកំពុងកើនឡើង និងលទ្ធភាពទទួលបានថាមពលស្អាតមាននិរន្តរភាព និងតម្លៃសមរម្យ។ នេះបើតាមសេចក្ដីប្រកាសព័ត៌មានរួម។
គម្រោងថ្មីនេះ ត្រូវបានចុះហត្ថលេខាដោយតំណាង UNDP ស្ថានទូតស៊ុយអែត និងក្រសួង បរិស្ថាន នៅថ្ងៃទី១១ ខែកុម្ភ:។ លោក ទិន ពន្លក អគ្គលេខាធិការក្រុមប្រឹក្សាជាតិអភិវឌ្ឍន៍ដោយចីរភាពថ្លែងដូច្នេះថា៖«ដោយមានការឧបត្ថម្ភពីប្រទេសស៊ុយអែត និងមានការគាំទ្រផ្នែកបច្ចេកទេស និងហិរញ្ញវត្ថុពី UNDP គម្រោងថ្មីនេះនឹងសាកល្បងអនុវត្តគំនិតច្នៃប្រឌិតថ្មីដើម្បីការពារធនធានធម្មជាតិ និងបរិស្ថាន កាត់បន្ថយកាកសំណល់ និងផ្ដល់ថាមពលស្អាតតម្លៃសមរម្យ»។
សេចក្ដីប្រកាសព័ត៌មានបានឲ្យដឹងថា រដ្ឋាភិបាលបានពង្រីកផ្ទៃដីការពារធម្មជាតិដែលគ្របដណ្ដប់រហូតដល់ ៤០ភាគរយនៃផ្ទៃដីប្រទេសសរុប។ គម្រោងនេះមានបំណងផ្តល់សិទ្ធិអំណាចសហគមន៍ជនបទ ដើម្បីឲ្យពួកគេអាចចូលរួមកាន់តែសកម្មនៅក្នុងការគ្រប់គ្រងធនធានប្រកបដោយនិរន្តរភាព និងខិតខំកៀងគរប្រភពហិរញ្ញវត្ថុនានា សម្រាប់ជួយគាំទ្រកិច្ចការអភិរក្ស និងការពារធនធានធម្មជាតិទាំងនោះ។
ម្យ៉ាងវិញទៀត ការកើនឡើងសំណល់រឹង បានក្លាយជាបញ្ហាគួរឲ្យព្រួយបារម្ភនៅទីក្រុងធំៗ។ នៅភ្នំពេញមានសំណល់ជាង ២៣០០តោនក្នុងមួយថ្ងៃ។ ហើយសំណល់ ៨០ភាគរយ មានវត្ថុធាតុដែលអាចកែច្នៃឡើងវិញបាន។ ការគ្រប់គ្រងសំណល់នាពេលបច្ចុប្បន្នផ្ដោតសំខាន់លើការប្រមូល និងការបោះចោលសំណល់តែប៉ុណ្ណោះ ពោលគឺពុំមានការបែងចែកសំណល់ កែច្នៃ និងការប្រើឡើងវិញ។
តាមរយៈការដាក់ឲ្យអនុវត្តទស្សនទានសេដ្ឋកិច្ចចក្រា (Circular Economy) គម្រោងនេះនឹងផ្សព្វផ្សាយអំពីអភិក្រមថ្មីៗសម្រាប់អ្នកផលិត និងអ្នកប្រើប្រាស់ក្នុងការបដិសេធ កាត់បន្ថយ ប្រើឡើងវិញ និងកែច្នៃសំណល់ដើម្បីកាត់បន្ថយផលប៉ះពាល់បរិស្ថាន និងបង្កើតឱកាសសេដ្ឋកិច្ចថ្មីៗ។ អភិក្រមទាំងនោះរួមមានការលើកកម្ពស់បច្ចេកវិទ្យាថ្មីៗ និងជម្រើសបំលែងសំណល់ទៅជាថាមពល បទបញ្ញត្តិថ្មីៗលើកកម្ពស់ការច្នៃឡើងវិញ និងការប្រាស្រ័យទាក់ទងជាយុទ្ធសាស្ត្រប្រឆាំងការប្រើផ្លាស្ទីក។
មួយវិញទៀត គម្រោងនេះនឹងជួយកម្ពុជាកាត់បន្ថយគម្លាតនៃការទទួលបានអគ្គិសនីប្រើប្រាស់ និងខិតខំពង្រីកបណ្ដាញអគ្គសនីទៅដល់ប្រជាពលរដ្ឋតាមជនបទដាច់ស្រយ៉ាល។ រដ្ឋាភិបាលបានប្ដេជ្ញាពង្រីកបណ្ដាញអគ្គិសនីឲ្យបានទូទាំងប្រទេសត្រឹមឆ្នាំ២០២០ និងតភ្ជាប់ចរន្តអគ្គិសនីដល់ផ្ទះពលរដ្ឋឲ្យបាន ៧០ភាគរយពីបណ្ដាញអគ្គិសនីរដ្ឋត្រឹមឆ្នាំ២០៣០។ គម្រោងនេះនឹងបង្ហាញឲ្យឃើញពីសក្ដានុពលថាមពលពន្លឺព្រះអាទិត្យ តាមរយៈការលុបបំបាត់របាំងគោលនយោបាយ របាំងបច្ចេកទេស និងរបាំងហិរញ្ញវត្ថុ ក្នុងគោលដៅផ្ដល់ឲ្យពលរដ្ឋគ្រប់រូបនូវអគ្គិសនីប្រើប្រាស់ ដែលជឿទុកចិត្តបាន តម្លៃសមរម្យ ជាពិសេសសហគមន៍ដាច់ស្រយ៉ាល ដែលពុំអាចភ្ជាប់ជាមួយបណ្ដាញអគ្គិសនីរដ្ឋបាន។
តំណាង UNDP លោក Nick Beresford ថ្លែងដូច្នេះថា៖«សេដ្ឋកិច្ចចក្រា ជាមួយការប្រើប្រាស់ថាមពលពន្លឺព្រះអាទិត្យកាន់តែច្រើនជាងមុន និងការពារកាន់តែប្រសើរឡើងដល់ធនធានធម្មជាតិ គឺជាវិធីមួយដែលកម្ពុជាអាចបន្តសម្រេចនូវវឌ្ឍន៍ឆាប់រហ័ស ដើម្បីក្លាយទៅជាប្រទេសចំណូលមធ្យមកម្រិតខ្ពស់ ប៉ុន្តែត្រូវសម្រេចគោលដៅនេះតាមផែនការប្រកបដោយនិរន្តរភាព និងមានសមិទ្ធផលកាន់តែប្រសើរខាងផ្នែកសុខុមាលភាព និងសង្គម»។
លោកស្រី Maria Sargren អគ្គរដ្ឋទូតស៊ុយអែតប្រចាំកម្ពុជា មានប្រសាសន៍ដូច្នេះថា៖«រដ្ឋាភិបាលស៊ុយអែត ពិតជារីករាយក្នុងការគាំទ្រគម្រោងនេះ ខណៈដែលយើងខិតខំជំរុញឲ្យមានការប្រើប្រាស់អភិក្រមដែលមានលក្ខណៈនវានុវត្តន៍ ដើម្បីធានានិរន្តរភាពធនធានធម្មជាតិ អភិវឌ្ឍសេដ្ឋកិច្ចចក្រា និងពង្រីកលទ្ធភាពទទួលបានថាមពល ដើម្បីជួយកម្ពុជាបោះជំហ៊ានព្រោះទៅរកការសម្រេចបាននិរន្តភាពបរិស្ថាន»។
បើតាមមន្ត្រី UNDP គម្រោងនេះនឹងចំណាយប្រមាណជាង ១,៨ លានដុល្លារអាមេរិក៕