អត្ថបទពាណិជ្ជកម្ម
ក្រុមហ៊ុន ខ្មែរ ប៊ែវើរីជីស ប្រកាសគម្រោង«សាលាស្អាត»តម្លៃសរុប៧០ម៉ឺនដុល្លារ សម្រាប់ឆ្នាំ២០១៩
×![]()
ដោយ: ថ្មីៗ
ក្រុមហ៊ុនខ្មែរ ប៊ែវើរីជីស បានប្រកាសគម្រោង «សាលាស្អាត» ថ្មីនៅខេត្តសៀមរាប និងបន្ទាយមានជ័យសម្រាប់ឆ្នាំ ២០១៩ ដែលចំណាយថវិកាសរុបជិត ៧០ម៉ឺនដុល្លារអាមេរិក នៅព្រឹកថ្ងៃទី១២ ខែមីនានេះ។ កន្លងមកក្រុមហ៊ុនខ្មែរ ប៊ែវើរីជីស ក៏បានសម្រេចគម្រោង «សាលាស្អាត» នៅតាមសាលារៀនចំនួន ១០ ទាំងក្នុងរាជធានី និងខេត្តបាត់ដំបងក្នុងឆ្នាំ ២០១៨ ផងដែរ។
ក្នុងឆ្នាំ២០១៩នេះ ក្រុមហ៊ុនខ្មែរ ប៊ែវើរីជីស នឹងបន្តកសាង និងជួសជុលហេដ្ឋារចនាសម្ព័ន្ធដែលខូចខាតនៅតាមសាលារៀនចំនួន ៥ក្នុងខេត្តបន្ទាយមានជ័យ និង៥ទៀតក្នុងខេត្តសៀមរាប ដែលគ្រោងចំណាយទឹកប្រាក់សរុប ៣០ ម៉ឺនដុល្លារសហរដ្ឋអាមេរិក។
ថ្លែងក្នុងសន្និសីទសារព័ត៌មាន លោក លាង ឃុន អគ្គនាយកក្រុមហ៊ុនខ្មែរ ប៊ែវើរីជីស បានឲ្យដឹងថា៖ «ជានិច្ចកាលក្រុមហ៊ុនតែងតែយកចិត្តទុកដាក់ លើការបណ្ដុះបណ្ដាលធនធានមនុស្សតាមរយៈការលើកស្ទួយវិស័យអប់រំ ហើយគម្រោង «សាលាស្អាត» គឺជាការចូលរួមមួយផ្នែកក្នុងវិស័យអប់រំ តាមរយៈការអភិវឌ្ឍហេដ្ឋារចនាសម្ព័នក្នុងសាលារៀន ដើម្បីផ្ដល់នូវកន្លែងអប់រំ ដែលមានបរិយាកាសល្អប្រសើរ សម្រាប់សិស្សានុសិស្ស»។
បើតាមលោក លាង ឃុន គម្រោងសាលាស្អាតនេះ នឹងចូលរួមចំណែកជួយសិស្សានុសិស្សនៅតំបន់ទាំងនោះ ឲ្យមានសាលារៀនសមរម្យ មានចំណេះដឹង និងសម្រេចបាននូវក្ដីសុបិននាថ្ងៃអនាគត ព្រមទាំងក្លាយជាធនធានមនុស្សដ៏ល្អ ដើម្បីរួមចំណែកជួយដល់សង្គម និងប្រទេសជាតិយើងទាំងមូល។
គួរបញ្ជាក់ថា គម្រោង «សាលាស្អាត» គឺជាគម្រោងអភិវឌ្ឍន៍ហេដ្ឋារចនាសម្ព័ន្ធនៅតាមសាលារៀនទូទាំងប្រទេស ដែលត្រូវបានផ្ដួចផ្ដើមចាប់ពីឆ្នាំ២០១៦ ដោយក្រុមហ៊ុន ខ្មែរ ប៊ែវើរីជីស ក្នុងគោលបំណងលើកកម្ពស់សោភ័ណភាពសាលារៀននៅទូទាំងប្រទេស ឲ្យកាន់តែស្រស់ស្អាតមួយកម្រិតទៀត និងបង្កើនបរិយាកាសសិក្សាឲ្យល្អប្រសើរជាងមុនសម្រាប់សិស្សានុសិស្ស។
ក្នុងឆ្នាំ ២០១៨ ក្រុមហ៊ុនខ្មែរ ប៊ែវើរីជីស បានចំណាយប្រាក់សរុបជិត ៤០ ម៉ឺនដុល្លារសហរដ្ឋអាមេរិក សម្រាប់គម្រោង «សាលាស្អាត» នៅតាមសាលារៀនចំនួន ៤ ក្នុងរាជធានីភ្នំពេញ និង ៦ នៅខេត្តបាត់ដំបង៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
