កីឡាអន្តរជាតិ
អន្តរជាតិ
ដើម្បីភរិយា អតីតគ្រូ Man Utd លោក Van Gaal សម្រេចបញ្ចប់អាជីពគ្រូបង្វឹក
× អតីតអ្នកចាត់ការទូទៅក្រុម Manchester United លោក Louis van Gaal បានប្រកាសពីបំណងចូលនិវត្តន៍របស់ខ្លួនក្នុងអាជីពកីឡាបាល់ទាត់។ ក្រោយការប្រកាសនេះ Marcus Rashford បានចូលរួមសម្តែងការគោរព និងដឹងគុណចំពោះអតីតគ្រូរបស់គេផងដែរ។
អ្នកចាត់ការសញ្ជាតិហូឡង់វ័យ ៦៧ ឆ្នាំដែលបានឈ្នះពាន FA Cup ក្នុងអំឡុងស្នាក់នៅទឹកដី Old Trafford ពីររដូវកាលចាប់ពីឆ្នាំ២០១៤ បានរៀបរាប់ពីបំណងក្នុងការចាកចេញពីអាជីពជាអ្នកដឹកនាំក្រុមកីឡាបាល់ទាត់របស់លោកទៅកាន់ទូរទស្សន៍ហូឡង់ VTBL។
ក្នុងអាជីពដឹកនាំរបស់ Van Gaal ជាង២០ឆ្នាំ លោកធ្លាប់ដឹកនាំ Ajax ឈ្នះជើងឯកលីគកំពូលហូឡង់ឆ្នាំ១៩៩៥ ជាលើកដំបូងក៏ដូចជាពានរង្វាន់ La Liga ពីរលើកជាមួយ Barcelona រួមទាំងពានរង្វាន់ Bundesliga របស់អាល្លឺម៉ង់ជាមួយ Bayern Munich។ ក្រៅពីនោះលោកធ្លាប់ដឹកនាំក្រុមជម្រើសជាតិហូឡង់ទទួលបានចំណាត់ថ្នាក់ទី៣សម្រាប់ពាន World Cup ឆ្នាំ២០១៤ទៀតផង។
«ឥឡូវនេះខ្ញុំជានិវត្តន៏ជនម្នាក់។ ខ្ញុំគ្មានមហិច្ឆតាចង់ក្លាយជានាយកបច្ចេកទេសរបស់ក្លិបណា ឬក៏អ្នកវិភាគឲ្យទូរទស្សន៍ណានោះទេ»។ លោក Van Gaal បានប្រាប់ទូរទស្សន៍ហូឡង់ VTBL ដូច្នេះ។
លោកបន្ថែមថា៖«ភរិយារបស់ខ្ញុំ Truus បានបោះបង់ការងាររបស់គាត់សម្រាប់ខ្ញុំអស់រយៈពេល២២ឆ្នាំមកហើយដើម្បីតែដើរតាមខ្ញុំទៅកាន់ប្រទេសផ្សេងៗ។ ខ្ញុំធ្លាប់ប្រាប់នាងថាខ្ញុំនឹងលាឈប់ពីអាជីពគ្រូបង្វឹកនៅអាយុ៥៥ឆ្នាំ ប៉ុន្តែខ្ញុំនៅតែបន្តរហូតដល់អាយុ ៦៥ឆ្នាំ។ វាដល់ពេលហើយសម្រាប់ខ្ញុំដើម្បីចូលនិវត្តន៍»។
បន្ទាប់ពីប្រកាសចូលនិវត្តន៍នេះ អតីតកូនសិស្សលោក Van Gaal កីឡាករ Marcus Rashford បានបង្ហាញពីការដឹងគុណគ្រូរបស់ខ្លួនដែលជាអ្នកផ្តល់ឱកាសឲ្យរូបគេកើនភាពលេចធ្លោរហូតមកដល់ថ្ងៃនេះ។
បុរសសញ្ជាតិហូឡង់រូបនេះជាអ្នកិផ្តល់ឱកាសឲ្យយុវជន Rashford បង្ហាញខ្លួនលើកដំបូងសម្រាប់ក្រុម Man Utd កាលពីខែកុម្ភៈ ឆ្នាំ២០១៦ ជាមួយនឹងទម្រង់លេងដ៏អស្ចារ្យ។
ខ្សែប្រយុទ្ធសញ្ជាតិអង់គ្លេស វ័យ២១ឆ្នាំរូបនេះបានសរសេរលើបណ្តាញសង្គម Twitter ផ្ទាល់របស់គេដោយបង្ហាញការគោរពទៅកាន់ Van Gaal ថា៖«អរគុណចំពោះការផ្តល់ឱកាស និងការទុកចិត្តលើខ្ញុំ។ សូមរីករាយជាមួយការចូលនិវត្តន៍របស់លោក»។
ក្រៅពី Rashford មិត្តរួមក្រុមរបស់គេម្នាក់ទៀត Anthony Martial ក៏បានរៀបរាប់ពីការដឹងគុណចំពោះ លោក Van Gaal ផងដែរ។ Martial ដែល Van Gaal ទិញពី Monaco កាលពីឆ្នាំ២០១៥ សរសេលើ Twitter ថា៖«សូមអរគុណសម្រាប់អ្វីគ្រប់យ៉ាងលោកគ្រូ។ ជាកិត្តិយសបំផុតដែលខ្ញុំបានរៀនសូត្រពីលោកគ្រូកន្លងមក»៕
Tag:
បាល់ទាត់
Manchester United
Louis van Gaal
ចូលនិវត្តន៍
© រក្សាសិទ្ធិដោយ thmeythmey.com