សម្ដេច ហ៊ុន សែន ឲ្យមេធាវីត្រៀមប្ដឹងលោក សម រង្ស៊ី ដោយទារសំណងចិត្ត២លានដុល្លារ

ជាតិ

សម្ដេច ហ៊ុន សែន ឲ្យមេធាវីត្រៀមប្ដឹងលោក សម រង្ស៊ី ដោយទារសំណងចិត្ត២លានដុល្លារ

13, Mar 2019 , 11:42 am

រូបភាព

ដោយ: ថ្មីៗ

ភ្នំពេញ៖ ពិពីធីជួបសំណេះសំណាលជាមួយកម្មកររោងចក្រ នៅខេត្តកោះកុង នាព្រឹកថ្ងៃទី១៣ មីនា សម្ដេចនាយករដ្ឋមន្ត្រី ហ៊ុន សែន បានបញ្ជាឲ្យមេធាវីត្រៀមប្ដឹងអ្នកជេរប្រមាថខ្លួននៅក្រៅប្រទេស ដែលគេដឹងថាសំដៅលើលោក សម រង្ស៊ី អតីតប្រធានគណបក្សសង្គ្រោះជាតិ។ សម្ដេចគ្រោងប្ដឹងទារសំណងចិត្ត២លានដុល្លារ ក្រោមហេតុផលជេរប្រមាថខ្លួន។

សម្ដេច ហ៊ុន សែន បានសង្កត់ធ្ងន់ថា អតីតមេដឹកនាំបក្សប្រឆាំងរូបនេះ បានប្រើប្រាស់ពាក្យសម្តីបែបឌឺដង លាយនឹងការប្រមាថមកលើខ្លួនឥតសាកស្រាន្ត ដែលជារឿងមួយមិនអាចទទួលយកបានឡើយ។ សម្រាប់សម្ដេច ហ៊ុន សែន ការប្រើប្រាស់ពាក្យសម្តីបែបប្រមាថលើហ្វេសប៊ុករបស់នេះ មិនមែនជាទស្សននយោបាយបង្រួបបង្រួមជាតិទេ ប៉ុន្តែវាជាពាក្យសម្តីនយោបាយបែបអុចអាល និងបញ្ឆេះកំហឹងជាតិប៉ុណ្ណោះ។

ដោយសារតែមិនអាចទទួលយកទង្វើបែបនេះហើយ ទើបប្រមុខរដ្ឋាភិបាល បញ្ជាឲ្យក្រុមមេធាវីផ្ទាល់ខ្លួន សិក្សាផ្លូវច្បាប់លើករណីបង្ហោះរូបភាព និងពាក្យសម្តីរបស់លោក សម រង្ស៊ី អតីតប្រធានគណបក្សសង្គ្រោះជាតិ ដែលបានបង្ហោះលើហ្វេសប៊ុក ក្នុងរយៈពេលចុងក្រោយនេះ។

ថ្លែងចំពោះមុខកម្មករោងចក្រ និងថ្នាក់ដឹកនាំគ្រប់ជាន់ថ្នាក់ លោកនាយករដ្ឋមន្ត្រី បាននិយាយដូច្នេះថា៖«ជូនសារទៅប្រាប់មុន (សម រង្ស៊ី) និងថ្នាកខេត្តឲ្យមើលថា ទ្រព្យសម្បត្តិវា (សម រង្ស៊ី) នៅកន្លែងណា។ ឲ្យតែតុលាការកាត់ក្តីរួចហើយ អញរឹបយក រួចហើយបានទ្រព្យហ្នឹង អញយកទៅចែកកុមារកំព្រា កុំឲ្យវាប្រហើន អាងរត់ទៅនៅក្រៅស្រុកបាន»។

កន្លងមកសម្ដេច ហ៊ុន សែន ក៏ធ្លាប់ប្ដឹងលោក សម រង្ស៊ី អតីតប្រធានគណបក្សសង្គ្រោះជាតិរូបនេះ ពាក់ព័ន្ធនឹងការចោទប្រកាន់សម្ដេច នៅពីក្រោយការសម្លាប់លោកបណ្ឌិត កែម ឡី អ្នកវិភាគល្បីល្បាញនៅកម្ពុជាផងដែរ។ ដោយកាលនោះសម្ដេច ហ៊ុន សែន ដែលត្រូវបានតុលាការកាត់ឲ្យឈ្នះក្តីលើលោក សម រង្ស៊ី បានទារសំណងជំងឺចិត្តតែ១០០រៀលប៉ុណ្ណោះ។គួរបញ្ជាក់ថា លោក សម រង្ស៊ី ដែលកំពុងរស់នៅក្រៅប្រទេសកំពុងជាប់រឿងក្តីក្តាំនៅក្នុងស្រុក មិនក្រោម១០ពាក្យបណ្ដឹងឡើយ ដោយពាក្យបណ្ដឹងទាំងនោះ ភាគច្រើនប្ដឹងដោយមន្ត្រីធំៗក្នុងជួររដ្ឋាភិបាល៕