រដ្ឋាភិបាល កំពុងតភ្ជាប់ប្រព័ន្ធទឹកពីថៃ មកផ្គត់ផ្គង់ក្នុងខេត្តកោះកុង

ជាតិ

រដ្ឋាភិបាល កំពុងតភ្ជាប់ប្រព័ន្ធទឹកពីថៃ មកផ្គត់ផ្គង់ក្នុងខេត្តកោះកុង

13, Mar 2019 , 9:39 pm

រូបភាព

ដោយ: ឡាយ សុភាវតី

ភ្នំពេញ៖ ដើម្បីដោះស្រាយបញ្ហាទឹកប្រើប្រាស់នៅក្នុងខេត្តកោះកុង រដ្ឋាភិបាល កំពុងរៀបចំតភ្ជាប់ប្រព័ន្ធទឹកពីប្រទេសថៃ មកផ្គត់ផ្គង់ដល់ប្រជាពលរដ្ឋនៅក្នុងតំបន់នោះ។

ថ្លែងក្នុងពិធីជួបសំណេះសំណាលជាមួយកម្មករោងចក្រនៅខេត្តកោះកុង នាថ្ងៃទី១៣ មីនានេះ សម្ដេចនាយករដ្ឋមន្ត្រី ហ៊ុន សែន បានប្រាប់ឲ្យក្រុមហ៊ុន លី យ៉ុងផាត់ សាងសងប្រព័ន្ធទឹក ដើម្បីជាដំណោះស្រាយក្នុងរយៈពេលវែង ទម្រាំតែដល់រដូវភ្លៀងធ្លាក់វិញ។

«ទឹកសម្បូរហើយតែទឹកសមុទ្រ ទឹកប្រៃ ផឹកមិនបាន ដូច្នេះត្រូវរកវិធីបញ្ចូនទឹកចេញពីប្រទេសថៃ ហើយយកមកចូលក្នុងប្រទេសយើង»។ នេះជាការបញ្ជាក់របស់សម្ដេច ហ៊ុន សែន។

សូមស្ដាប់ប្រសាសន៍ប្រមុខរដ្ឋាភិបាល៖

រយៈពេលប៉ុន្មានខែនេះ ពលរដ្ឋនៅតំបន់មួយចំនួន ក្នុងខេត្តកោះកុង ប្រឈមបញ្ហាខ្វះទឹកប្រើប្រាស់។ ដើម្បីដោះស្រាយបញ្ហានេះ អាជ្ញាធរក្នុងតំបន់ បានដឹកទឹកពីតំបន់ផ្សេងយកទៅចែកជូនពលរដ្ឋដែលខ្វះទឹកប្រើទាំងនោះ។ ក្រៅពីខេត្តកោះកុង ក៏មានតំបន់នៅក្នុងខេត្តដទៃ ជួបបញ្ហាខ្វះខាតទឹកប្រើប្រាស់ដែរ។

កម្ពុជានឹងមានបាតុភូត «អែលនីណូ» នៅរដូវប្រាំងចាប់ពីខែមេសា ដល់ខែឧសភា ឆ្នាំ២០១៩ ដែលបណ្តាលឲ្យអាកាសធាតុក្តៅហួតហែង។ អាកាសធាតុក្តៅនោះ នឹងធ្វើឲ្យសីតុណ្ហភាពកម្ពុជា អាចនឹងហក់ឡើងដល់៤០ ទៅ៤២អង្សា ហើយមានភ្លៀងកក់ខែ លាយឡំនឹងផ្គររន្ទះ និងខ្យល់កន្ត្រាក់ច្រើន ដែលជាមូលហេតុនាំឲ្យប្រជាកសិករប្រមូលផលដំណាំបានតិចជាងរាល់ឆ្នាំផងដែរ។ ករណីនេះ រាជរដ្ឋាភិបាល បានណែនាំឲ្យពលរដ្ឋទាំងអស់ ជាពិសេសកសិករ គួរគប្បីរក្សាទឹកសម្រាប់ប្រើប្រាស់ជាប្រចាំថ្ងៃ និងសម្រាប់ដាំដំណាំផ្សេងៗក្រៅពីដំណាំស្រូវ៕