ជាតិ
ទ័ពកម្ពុជា-ចិន ចាប់ផ្តើមធ្វើសមយុទ្ធជាផ្លូវការហើយ រូបពីនាយឧត្តមសេនីយ៍ ឈុំ សុជាត
× «លំហាត់នាគមាសឆ្នាំ២០១៩» រវាងកងកម្ពុជា និងកងទ័ពរំដោះប្រជាជនចិន បានចាប់ផ្តើមបើកជាផ្លូវការ នៅព្រឹកថ្ងៃទី១៣ ខែមីនា ឆ្នាំ២០១៩នេះ នៅទីលានបាញ់គ្រាប់ពិតសាលាហ្វឹកហ្វឺនតេជោសែនជុំគីរី ដែលស្ថិតក្នុងស្រុកជុំគីរី ខេត្តកំពត។
នាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ បានសរសេរលើទំព័រហ្វេសប៊ុកថា សមយុទ្ធនេះ មិនមានការគំរាមគំហែងអ្នកណាទាំងអស់ តែផ្ទុយទៅវិញ សមយុទ្ធនេះ បង្ហាញពីការចូលរួមថែរក្សាសន្តិសុខក្នុងតំបន់ តាមរយៈការផ្លាស់ប្តូរបទពិសោធគ្នាតែប៉ុណ្ណោះ ជាពិសេសបទពិសោធប្រយុទ្ធប្រឆាំងអំពើភេវរកម្ម និងជួយសង្គ្រោះប្រជាពលរដ្ន ពេលមានគ្រោះមហន្តរាយធម្មជាតិ ជាដើម។
រូបពីនាយឧត្តមសេនីយ៍ ឈុំ សុជាត
លោក សរសេរទៀតថា សមយុទ្ធនេះ ផ្តោតសំខាន់លើប្រធានបទកិច្ចការមនុស្សធម៌ និងការប្រឆាំងភេរវកម្ម ដែលជាឱកាស សម្រាប់កងទ័ពប្រទេសទាំងពីរ ត្រូវសិក្សារៀនសូត្រទៅវិញទៅមក ដើម្បីបង្កើនសមត្ថភាពវិជ្ជាជីវៈ សម្រាប់បំពេញភារកិច្ចការពារប្រទេសជាតិ ឲ្យកាន់តែមានប្រសិទ្ធភាព និងខ្លាំងក្លា។ លោក បន្តថា សមយុទ្ធនេះ ក៏អាចធ្វើឲ្យទំនាក់ទំនងកម្ពុជា-ចិនកាន់តែរឹងមាំផងដែរ ជាពិសេសកិច្ចសហប្រតិបត្តិការរវាងកងទ័ពនៃប្រទេសទាំងពីរ។
រូបពីនាយឧត្តមសេនីយ៍ ឈុំ សុជាត
លោកនាយឧត្តមសេនីយ៍ បញ្ជាក់បែបនេះថា៖«លំហាត់នាគមាសឆ្នាំ២០១៩ ត្រូវបានគេមើលឃើញថា មានលក្ខណៈទ្រង់ទ្រាយធំ ដោយមានកម្លាំងទ័ព និងសព្វាវុធចូលរួមច្រើនជាងមុន»។
អាវុធយុទ្ធភ័ណ្ឌសំខាន់ៗ ដែលប្រើប្រាស់នៅក្នុងលំហាត់នាគមាសឆ្នាំនេះ រួមមាន រថពាសដែក រថក្រោះ កាំភ្លើងធំ កាំភ្លើងត្បាល់ ឧទ្ធម្ភាចក្រ អាវុធគាំទ្រពីលើអាកាស ជាដើម។
រូបពីនាយឧត្តមសេនីយ៍ ឈុំ សុជាត
ក្នុងការធ្វើលំហាត់ហ្វឹកហ្វឺននេះ កងទ័ពចិន មាន២៥២នាក់ និងកងទ័ពកម្ពុជា មាន២៥៤២នាក់ ដោយក្នុងនោះមាន កម្លាំងធ្វើលំហាត់៣៨២នាក់ កម្លាំងបម្រើការក្នុងលំហាត់៤៤៨នាក់ កម្លាំងចូលរួមក្នុងពិធីបើក-បិទ១៦៨៥នាក់។
រូបពីនាយឧត្តមសេនីយ៍ ឈុំ សុជាត
សមយុទ្ធនេះ នឹងត្រូវបញ្ចប់នៅថ្ងៃ២៧ ខែមីនា ឆ្នាំ២០១៩។ នេះជាសមយុទ្ធលើកទីបីហើយ រវាងកងទ័ពប្រទេសទាំងពីរ។ សមយុទ្ធនេះ ចាប់ផ្តើមធ្វើឡើងតាំងពីឆ្នាំ២០១៦មក តែឆ្នាំ២០១៧ ពុំបានធ្វើនោះទេ៕
Tag:
កម្ពុជា-ចិន
សមយុទ្ធ
© រក្សាសិទ្ធិដោយ thmeythmey.com