អន្តរជាតិ
លោក ត្រាំ ស្នើលុយ១ពាន់លានដុល្លារពីសភាដើម្បីពន្លឿនយុទ្ធសាស្ត្រឥណ្ឌូ-ប៉ាស៊ីហ្វិក
× ប្រធានាធិបតីអាមេរិក លោក ដូណាល់ ត្រាំ បានស្នើជំនួយជាលុយ១ពាន់លានដុល្លារ ដើម្បីផ្តល់សន្ទុះដល់យុទ្ធសាស្ត្រ «ឥណ្ឌូ-ប៉ាស៊ីហ្វិកដែលសេរីនិងបើកចំហ» ។ សំណើនេះ គឺធ្វើឡើងខណៈពេលលោកបានបញ្ជូនគម្រោងកញ្ចប់ថវិកាជាតិ ៤,៧ទ្រីលានដុល្លារទៅកាន់សភា។
សម្រាប់កញ្ចប់ថវិកាជាតិប្រចាំឆ្នាំ២០២០ ដែលចាប់ផ្តើមពិភាក្សានាដើមខែតុលាខាងមុខនេះ សេតវិមានអាមេរិក បានឲ្យដឹងថា សន្តិសុខ វឌ្ឍនភាព និងភាពជាអ្នកដឹកនាំរបស់អាមេរិកគឺពឹងផ្អែកលើការរក្សាតំបន់ឥណ្ឌូ-ប៉ាស៊ីហ្វិកឲ្យមានភាពសេរី និងបើកចំហ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP នៅថ្ងៃ១២ ខែមីនា។
«ព្រោះតែកត្តានេះហើយ កញ្ចប់ថវិកាជាតិនឹងផ្តល់លុយ១ពាន់លានដុល្លារសម្រាប់តំបន់ឥណ្ឌូ-ប៉ាស៊ីហ្វិក ដែលឆ្លុះបញ្ចាំងពីឆន្ទៈរបស់រដ្ឋបាលអាមេរិកទៅលើតំបន់នេះ»។ នេះបើតាមការបញ្ជាក់របស់សេតវិមានអាមេរិក ដោយបន្ថែមថា ការផ្តល់លុយដ៏ច្រើននេះ នឹងជួយគាំទ្រដល់លទ្ធិប្រជាធិបតេយ្យ និងអភិបាលកិច្ចសេដ្ឋកិច្ចល្អ, ភាពប្រកួតប្រជែង និងកំណែទម្រង់ក្នុងវិស័យឯកជន, ស្តង់ដារហេដ្ឋរចនាសម្ព័ន្ធដែលចាំបាច់ ព្រមទាំងកិច្ចសហប្រតិបត្តិការផ្នែកសន្តិសុខ និងហិរញ្ញវត្ថុផងដែរ។
ក្នុងគម្រោងថវិកាជាតិឆ្នាំក្រោយ លោកប្រធានាធិបតីអាមេរិក បានស្នើកាត់បន្ថយការចំណាយក្នុងស្រុកចំនួន៥ភាគរយ ប៉ុន្តែចង់បង្កើនការចំណាយលើវិស័យការពារជាតិដល់ទៅ៧៥០ពាន់លានដុល្លារ គឺកើនប្រមាណ ៣៤ពាន់លានដុល្លារ បើប្រៀបធៀបកញ្ចប់លុយឆ្នាំ២០១៩ ដែលមានចំនួន ៧១៦ពាន់លានដុល្លារ។
គម្រោងកញ្ចប់ថវិកាដែលដាក់ស្នើដោយរដ្ឋបាលលោកត្រាំដដែលនេះ ក៏បានកត់សម្គាល់ថា បំណុលជាតិដែលបច្ចុប្បន្នមានចំនួនច្រើនជាង២២ទ្រីលានដុល្លារហើយនោះ នៅតែជាការគំរាមកំហែងដ៏ធ្ងន់ធ្ងរមួយដល់វឌ្ឍនភាពសង្គម និងសេដ្ឋកិច្ចរបស់អាមេរិក។ ដោយលើកឡើងពីវិបត្តិបំណុលជាតិ រដ្ឋបាលអាមេរិកនៅតែវិនិយោគក្នុងវិស័យអាទិភាព ដែលនឹងអនុញ្ញាតឲ្យប្រទេសដើរឆ្ពោះទៅមុខកាន់តែឆ្ងាយនាពេលអនាគត។
សូមបញ្ជាក់ថា សហរដ្ឋអាមេរិកបានសម្រេចកំណត់តំបន់ «ឥណ្ឌូ-ប៉ាស៊ីហ្វិក» ដែលសំដៅទៅលើតំបន់ ដែលលាតសន្ធឹងរវាងមហាសមុទ្រពីរ គឺចាប់ពីមហាសមុទ្រឥណ្ឌា ទៅដល់មហាសមុទ្រប៉ាស៊ីហ្វិក ជាយុទ្ធសាស្ត្ររបស់ខ្លួនជាផ្លូវការ កាលពីខែវិច្ឆិកា ឆ្នាំ២០១៧កន្លងទៅ ។ ការប្រកាសនេះ បានធ្វើឡើងតាមរយៈសុន្ទរកថារបស់លោកដូណាល់ ត្រាំ នៅដាណាង ប្រទេសវៀតណាម ក្នុងឱកាសជំនួបកំពូលនៃវេទិកាសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក ហៅកាត់ថា APEC។ នៅពេលនោះ លោកដូណាល់ ត្រាំ បានហៅយុទ្ធសាស្ត្រថ្មីនេះថា “ឥណ្ឌូ-ប៉ាស៊ីហ្វិកសេរីនិងបើកចំហ” (Free and Open Indo-Pacific)៕
Tag:
សហរដ្ឋអាមេរិក
យុទ្ធសាស្ត្រសេរីនិងបើកចំហឥណ្ឌូ-ប៉ាស៊ីហ្វិក
© រក្សាសិទ្ធិដោយ thmeythmey.com