ការស្នាក់នៅបែបធម្មជាតិ ពេញនិយមសម្រាប់អ្នកទីក្រុង!

កោះកុង(ជីផាត)៖ កន្លែងស្នាក់នៅ ឬកន្លែងសម្រាកលម្ហែកាយបែបធម្មជាតិ កំពុងពេញនិយមសម្រាប់អ្នករស់នៅទីក្រុង។ នៅក្នុងសហគមន៍អេកូទេសចរណ៍ជីផាត ក្រៅពីមានតំបន់ទេសចរណ៍សក្ដានុពលស្អាតៗ ក៏មានផ្ទះស្នាក់ និងបឹងកាឡូប្រណិតៗ ដែលក្របដណ្ដប់ដោយធម្មជាតិស្រស់បំព្រងផងដែរ។ បឹងកាឡូ និងផ្ទះស្នាក់ ធ្វើពីដើមឫស្សីប្រក់ស្បូវ បានទាក់ទាញចិត្តអ្នកទេសចរដែលទៅលេងក្នុងសហគមន៍អេកូទេសចរណ៍ជីផាត។

សហគមន៍អេកូទេសចរណ៍ជីផាត ដែលស្ថិតក្នុងឃុំជីផាត ស្រុកថ្មបាំង ខេត្តកោះកុង មានផ្ទះស្នាក់, ផ្ទះសំណាក់ និងបឹងកាឡូ ស្រស់ស្អាត និងតម្លៃសមរម្យ។ បន្ទាប់ពីកម្សាន្តអារម្មណ៍ជាមួយធម្មជាតិក្នុងព្រៃនិងតាមព្រែកសមុទ្រជីផាត ភ្ញៀវទេសចរ នឹងទទួលបានការស្នាក់នៅដែលមានផាសុកភាពផងដែរ។ ក្នុងសហគមន៍អេកូទេសចរណ៍ជីផាត មានបឹងកាឡូស្រស់ស្អាតចំនួន ៧, ផ្ទះស្នាក់ចំនួន ១៤ និងផ្ទះសំណាក់ចំនួន ៦។ បើតាមលោក សូ លី ហៀង តំណាងសហគមន៍អេកូទេសចរណ៍ជីផាត ការស្នាក់នៅបឹងកាឡូ ក្នុង១យប់តម្លៃត្រឹម ១៥ដុល្លារ, ផ្ទះស្នាក់ តម្លៃ ៥ដុល្លារ និងផ្ទះសំណាក់ តម្លៃ ៧ដុល្លារ។

សូមបញ្ជាក់ថា កម្មវិធី «Mercedes-Benz និងកំណប់អាថ៌កំបាំង» ផ្តួចផ្តើមឡើងដោយក្រុមហ៊ុន Star Auto Cambodia សហការជាមួយសារព័ត៌មានអេឡិចត្រូនិក Thmeythmey.com និង Fresh News និងគាំទ្រដោយក្រសួងទេចរណ៍ ដើម្បីចូលរួមលើកកម្ពស់វិស័យទេសចរណ៍នៅទូទាំងកម្ពុជា ស្វែងរក និងគាស់កកាយតំបន់ទេសចរណ៍ ដែលគេមិនសូវស្គាល់តំបន់ទេសចរណ៍សក្តានុពល ដែលត្រូវគេមើលរំលង, ពង្រីកសក្តានុពលតំបន់ទេសចរណ៍ដែលមានស្រាប់ឲ្យកាន់តែមានសកម្មភាពរស់រវើក និងផ្សព្វផ្សាយតំបន់ទេសចរណ៍ទាំងនោះឲ្យកាត់តែល្បីល្បាញមួយកម្រិតទៀត៕