រដ្ឋបាលរាជធានីត្រូវការធ្វើជំរឿនលើសពី១០ថ្ងៃ ទើបអាចបញ្ចប់ការងារជំរឿននៅរាជធានីភ្នំពេញ

ជាតិ

សង្គមជាតិ

រដ្ឋបាលរាជធានីត្រូវការធ្វើជំរឿនលើសពី១០ថ្ងៃ ទើបអាចបញ្ចប់ការងារជំរឿននៅរាជធានីភ្នំពេញ

15, Mar 2019 , 10:20 am

រូបភាព

ដោយ:

ភ្នំពេញ៖ រដ្ឋបាលរាជធានីភ្នំពេញ បានកំណត់រយៈពេល១០ថ្ងៃនៃការធ្វើជំរឿន ប៉ុន្តែមិនគ្រប់គ្រាន់ឡើយ គឺត្រូវពន្យារពេលដល់ត្រឹម១៥ថ្ងៃ ពោលគឺត្រឹមថ្ងៃនេះ ទើបអាចបញ្ចប់កិច្ចការងារជំរឿនឲ្យប្រព្រឹត្តទៅយ៉ាងរលូន។

សម្រាប់ការកំណត់ធ្វើជំរឿនរយៈពេល១០ថ្ងៃចាប់ពីថ្ងៃទី០៣ ដល់ថ្ងៃទី១៣ ខែមីនា គឺមិនអាចបញ្ចប់តាមការគ្រោងទុក ដោយជោគជ័យនៅឡើយទេ។ គណៈកម្មាធិការជំរឿនទូទៅប្រជាជននៅរាជធានីភ្នំពេញ បានបញ្ជាក់នៅក្នុងសេចក្តីជូនដំណឹងថ្ងៃទី១៤ ខែមីនា ថា នៅតាមមណ្ឌលមួយចំនួនធំត្រូវបានបញ្ចប់រួចរាល់ហើយ លើកលែងតែនៅតាមណ្ឌលជំរឿនខ្លះដែលមានគ្រួសារកើនឡើងច្រើនគឺត្រូវសម្ភាស និងសាកសួរព័ត៌មានដល់ថ្ងៃទី១៥ ទើបអាចបញ្ចប់ការងារនេះដោយរលូន។

រូបភាពពីរដ្ឋបាលរាជធានីភ្នំពេញ

អភិបាលរាជធានីភ្នំពេញ និងជាប្រធានគណៈកម្មាធិការជំរឿនទូទៅប្រជាជននៅរាជធានីភ្នំពេញ លោក ឃួង ស្រេង បានអំពាវនាវដល់ប្រជាពលរដ្ឋ ដែលមិនទាន់ត្រូវបានមន្ត្រីជំរឿនសម្ភាសនោះ ត្រូវទាក់ទងទៅមន្ត្រីជំរឿន នៅតាមរដ្ឋបាលសង្កាត់ ខណ្ឌ ឲ្យទាន់ពេលវេលា។

សូមបញ្ជាក់ថា ការធ្វើជំរឿនលើកទី៣នេះ បានចាប់ផ្តើមពីថ្ងៃទី៣ ដល់ថ្ងៃទី១៣ ខែមីនា ដោយគ្រោងចំណាយថវិការដ្ឋជាង៨លានដុល្លារ។ ការងារជំរឿនប្រជាជនកម្ពុជា បានធ្វើរួច២ដងហើយគឺនៅឆ្នាំ១៩៩៨ និងឆ្នាំ២០០៨។ ជំរឿននៅឆ្នាំ១៩៩៨ មានប្រជាជនចំនួន១១,៤៣៧,៦៥៦នាក់ ហើយឡើងដល់ ១៣,៣៩៥,៦៨២នាក់ នៅឆ្នាំ២០០៨។ នៅឆ្នាំ២០១៥ អង្គការសហប្រជាជាតិ បានប៉ាន់ប្រមាណថា ចំនួនប្រជាជនកម្ពុជាកើនដល់១៥,៥៨លាននាក់៕