តើ​រូបថត​បែប​សិល្បៈ និង​បែប​សារព័ត៌មាន ខុសគ្នា​ដូចម្ដេច​?
ជាតិ
វីដេអូ
តើ​រូបថត​បែប​សិល្បៈ និង​បែប​សារព័ត៌មាន ខុសគ្នា​ដូចម្ដេច​?
15, Mar 2019 , 9:19 pm        
រូបភាព
​ភ្នំពេញ​៖ បច្ចុប្បន្ន ការថតរូប​មានការ​ពេញនិយម​សម្រាប់​យុវជន និង​មនុស្ស​ទូទៅ ហើយ​ការថតរូប​ត្រូវបាន​គេ​បែងចែក​ជាច្រើន​ផ្នែក​។ តួយ៉ាង រូបថត​បែប​សិល្បៈ និង​រូបថត​បែប​សារព័ត៌មាន  មាន​លក្ខណៈ​ខុសគ្នា ដោយ​រូបថត​នីមួយៗ​បាន​ព្យាយាម​បង្ហាញ​ខ្លឹមសារ​ផ្សេងៗ​គ្នា​។ បើតាម​លោក ម៉ក់ រ៉េមី​ស្សា អ្នក​ថតរូប​អាជីព រូបថត​បែប​សិល្បៈ កើតចេញពី​គំនិត​ច្នៃប្រឌិត​របស់​អ្នក​ថត  រីឯ​រូបថត​បែប​សារព័ត៌មាន​វិញ ជា​រូបថត​ដែល​កើតឡើង​តាមរយៈ​ព្រឹត្តិការណ៍​តែប៉ុណ្ណោះ​។


 
​លោក ម៉ក់ រ៉េមី​ស្សា ជា​អ្នក​ថតរូប​បែប​សិល្បៈ និង​បែប​សារព័ត៌​មាននៃ​ទីភ្នាក់ងារសារព័ត៌មាន European Pressphoto Agency​។ សិល្បករ​ថតរូប​ដ៏​ឆ្នើម ម៉ក់ រ៉េមី​ស្សា មាន​បទពិសោធ​ក្នុង​វិស័យ​ថតរូប​ជាង​២០​ឆ្នាំ​មកហើយ ហើយ​បាន​ជាប់​ជ័យលាភី​ជាច្រើន​ហូរហែ តាមរយៈ​ស្នាដៃ​ថតរូប​ដែល​ពោរពេញ​ទៅដោយ​ភាព​ច្នៃប្រឌិត​។ 
 
​ក្នុង​បទ​សម្ភាស​ជាមួយ​សារព័ត៌មាន​ថ្មីៗ សិល្បករ​ថតរូប​ដ៏​ឆ្នើម​រូបនេះ បាន​ពន្យល់​ពី​ភាពខុសគ្នា រវាង​រូបថត​បែប​សិល្បៈ និង​បែប​សារព័ត៌មាន​យ៉ាង​ដូច្នេះ​៖ «​រូបថត​បែប​សារព័ត៌មាន ជា​រូបថត​បង្ហាញ​ពី​ដំណឹង ដែល​កើតឡើង​តាម​ព្រឹត្តិការណ៍​នានា​។ ចំណែក​រូបថត​បែប​សិល្បៈ​វិញ គឺ​កើតចេញពី​ការគិត និង​ភាព​ច្នៃប្រឌិត​របស់​អ្នក​ថត​»​។​
 
​ដើម្បី​ជ្រាប​ច្បាស់ សូម​អញ្ជើញ​ទស្សនា​បទ​សម្ភាស​រវាង​លោក គី សុខ​លីម អ្នកសារព័ត៌មាន ThmeyThmey ជា​លោក ម៉ក់ រ៉េមី​ស្សា អ្នក​ថតរូប​អាជីព​ដូចតទៅ​៖ 
 
 
​បើតាម​លោក រ៉េមី​ស្សា រូបថត​បែប​សិល្បៈ ត្រូវ​ការប្រើ​ពេលវេលា​ច្រើន និង​មាន​ផល​លំបាក​ខ្លាំង​ជាង​រូបថត​បែប​សារព័ត៌មាន​។ រូបថត​បែប​សិល្បៈ ទាមទារ​ឲ្យ​អ្នក​ថតរូប មាន​ភាព​ច្នៃប្រឌិត​ខ្ពស់​ក្នុងការ​រិះរក​គំនិត​ថ្មីៗ ដើម្បី​បង្ហាញ​ពី​ទិដ្ឋភាព​និង​ខ្លឹមសារ​នៃ​ប្រធានបទ​នីមួយៗ​។ ដោយឡែក​រូបថត​បែប​សារព័ត៌មាន​វិញ មាន​ភាពងាយស្រួល​ក្នុង​ការផលិត ដោយ​រូបភាព​នេះ បានបង្ហាញ​ពី​ខ្លឹមសារ និង​ព្រឹត្តិការណ៍​ដែល​បាន​កើតឡើង​។​
 
​ក្នុង​វិស័យ​ថតរូប លោក ម៉ក់ រ៉េមី​ស្សា បានចាប់ផ្ដើម​ប្រឡូក​លើ​ការថតរូប​បែប​សិល្បៈ ដែល​រូបថត​ប្រភេទ​នេះ អាចធ្វើ​ឲ្យ​លោក មានគំនិត​ច្នៃប្រឌិត​ច្រើន ក្នុង​ការផលិត​រូបភាព​ឲ្យ​បានល្អ​។ ក្រោយ​មាន​ជំនាញ​លើ​ការថតរូប​បែប​សិល្បៈ លោក រ៉េមី​ស្សា ក៏បាន​ចាប់យក​ការថតរូប​បែប​សារព័ត៌មាន​មកដល់​ស​ព្វ​ថ្ងៃ​៕

Tag:
 រូបថត​បែប​សិល្បៈ​
  រូបថត​បែប​សារព័ត៌មាន​
  ម៉ក់ រ៉េមី​ស្សា​
© រក្សាសិទ្ធិដោយ thmeythmey.com