អន្តរជាតិ
បុរសអូស្ត្រាលីម្នាក់យកទូរសព្ទដៃធ្វើជាខែល បញ្ឈប់ព្រួញដែលបាញ់សំដៅមករកលោក
× បុរសជនជាតិអូស្ត្រាលីម្នាក់ បានរួចផុតពីគ្រោះថ្នាក់ អំឡុងប្រឈមមុខនឹងបុរសម្នាក់ទៀតដែលដៃប្រដាប់ដោយធ្នូរ និងព្រួញនៅក្រៅផ្ទះរបស់លោក។ ព្រួញដែលបានបាញ់ចេញមកនោះ បានទម្លុះទូរសព្ទលោកពីម្ខាងទៅម្ខាង ខណៈបុរសជនជាតិអូស្ត្រាលីនេះលើកទូរសព្ទឡើង ក្នុងគោលបំណងថតសកម្មភាពបុរសកាន់ធ្នូនោះ។
ហេតុការណ៍នេះ បានកើតឡើងកាលពីព្រឹកថ្ងៃពុធទី១៣ ខែមីនា ក្នុងភូមិ Nimbin ក្នុងតំបន់ដៃទន្លេខាងជើងនៃរដ្ឋ New South Wales ដែលចម្ងាយប្រហែល ៧៥០គីឡូម៉ែត្រ ពីរដ្ឋធានី Sydney ប្រទេសអូស្ត្រាលី។
បើតាមការចុះផ្សាយរបស់ទីភ្នាក់ងារព័ត៌មាន Reuters សមត្ថកិច្ចអូស្ត្រាលី បានឲ្យដឹងថា បុរសដែលជាជនរងគ្រោះ មានវ័យ៤៣ឆ្នាំ ទទួលរងការប្រហារដោយព្រួញពីបុរសម្នាក់ទៀត ដែលជាមនុស្សស្គាល់គ្នា។ យ៉ាងណាមិញ សមត្ថកិច្ចពុំបានបញ្ជាក់ទេថា អ្នកទាំងពីរធ្លាប់មានបញ្ហាអ្វីនឹងគ្នាពីមុនឬយ៉ាងណានោះទេ។
សមត្ថកិច្ចដដែល បន្តថា បុរសដែលជាអ្នកបាញ់ព្រួញនោះ មានវ័យ ៣៩ ត្រូវបានឃាត់ខ្លួននៅកន្លែងកើតហេតុ និងត្រូវបានបញ្ជូនទៅកាន់ស្ថានីយ៍ប៉ូលិសនៅក្បែរនោះ។ ទាក់ទិននឹងការបាញ់ព្រួញតម្រង់ទៅមនុស្សបែបនេះ បុរសជាជនដៃដល់រូបនេះ ត្រូវបានសមត្ថកិច្ចចោទប្រកាន់ពីបទប៉ុនប៉ង់មនុស្សឃាតដោយចេតនា និងបង្កជារបួសស្នាម។
សូមបញ្ជាក់ថា ក្រោយមក ជនល្មើសជាអ្នកបាញ់ព្រួញរូបនេះ ត្រូវបានដោះលែងឲ្យនៅក្រៅឃុំបណ្តោះអាសន្ន និងរង់ចាំឡើងតុលាការនៅខែមេសាខាងមុខ៕
Tag:
អូស្ត្រាលី
ប្លែកៗ
ព្រួញ
© រក្សាសិទ្ធិដោយ thmeythmey.com