ជាតិ
រដ្ឋបាលក្រុងសៀមរាប រៀបចំផែនការប្រមូលសំរាមថ្មីឱ្យមានប្រសិទ្ធភាពខ្ពស់
×![]()
សៀមរាប៖ សំរាមនៅតែជាបញ្ហាសម្រាប់ក្រុងសៀមរាប ដ្បិតថាការប្រមូលមិនសមាមាត្រទៅនឹងចំនួនសំរាម ដែលកើនឡើងក្នុងក្រុងទេសចរណ៍មួយនេះ។ អភិបាលក្រុងសៀមរាបានប្រាប់ពីមូលហេតុទាំងនេះ និងថាក្រុងកំពុងដាក់ចេញផែនការប្រមូលសំរាមថ្មីឱ្យមានប្រសិទ្ធភាពខ្ពស់ ធានាយ៉ាងណាការប្រមូលសំរាមមិនឱ្យកកស្ទះយូរឡើយ។
លោក នួន ពុទ្ធារ៉ា អភិបាលក្រុងសៀមរាប បានប្រាប់អ្នកសារព័ត៌មានកាលពីថ្មីៗនេះថា រដ្ឋបាលក្រុងបានរៀបចំផែនការថ្មី គឺបានជ្រើសរើសក្រុមប្រមូលសំរាមមួយបន្ថែមទៀត ដែលពេលមុនមានត្រឹមមួយក្រុមហ៊ុន ដើម្បីចែកគោលដៅប្រមូលសំរាមឱ្យមានប្រសិទ្ធភាព។ តាមការបញ្ជាក់របស់លោកអភិបាលក្រុង បច្ចុប្បន្នក្រុងសៀមរាបមានក្រុមហ៊ុនប្រមូលសំរាម២ ដោយទី១ប្រមូលនៅខាងកើតស្ទឹងសៀមរាប និងទី២ ប្រមូលនៅប៉ែកខាងលិចស្ទឹង។
តាមការពន្យល់របស់លោកអភិបាលក្រុង មូលហេតុចម្បងដែលការប្រមូលសំរាមកន្លងមកមិនសូវល្អប្រសើរ ព្រោះថា ក្រុមហ៊ុននៅអនុវត្តន៍តាមកិច្ចសន្យាចាស់ ដែលបានព្រមព្រៀងតាំងពីច្រើនឆ្នាំមុន ហើយដែលកាលណោះក្រុងសៀមរាបនៅតូច សំរាមក៏មិនសូវមានច្រើនដូចសព្វថ្ងៃនេះដែរ។ «យើងមានកិច្ចសន្យាជាមួយក្រុមហ៊ុនថ្មី ប្រព័ន្ធថ្មី ពេលវេលាថ្មី ពង្រីកផ្លូវប្រមូលថ្មី គឺយើងធ្វើបច្ចុប្បន្នថ្មីទាំងអស់»។ នេះជាការបញ្ជាក់បន្ថែមរបស់លោក នួន ពុទ្ធារ៉ា។
បច្ចុប្បន្ននេះ ក្រុមហ៊ុនប្រមូលសំរាមចំនួន២ ដែលកំពុងប្រតិបត្តិការក្នុងក្រុងសៀមរាប ក្នុងនោះក្រុមហ៊ុនចាស់ គឺ GAEA និងក្រុមហ៊ុន ស៊ិនទ្រី ដែលទើបចូលមកអនុវត្តន៍សាកល្បងរយៈពេល៥ខែមកហើយ។ ជាមួយនឹងការរៀបចំផែនការថ្មីនេះ លោក នួន ពុទ្ធារ៉ា ពន្យល់ទៀតថា រដ្ឋបាលក្រុងសៀមរាបបានធ្វើកិច្ចសន្យាសាកល្បងជាមួយក្រុមហ៊ុនរយៈពេលមួយឆ្នាំ ហើយប្រសិនណាការប្រមូលសំរាមមានប្រសិទ្ធភាព រដ្ឋបាលក្រុងនឹងបន្តកិច្ចសន្យារយៈពេល១០ឆ្នាំដល់ក្រុមហ៊ុនទាំងនោះ។
ក្នុងផែនការខាងលើនេះ រដ្ឋបាលក្រុងសៀមរាបក៏កំពុងពិចារណាធ្វើប្រតិភូកម្មថវិកាដល់សង្កាត់នីមួយៗដើម្បីម្ចាស់ការគ្រប់គ្រងសំរាមតាមសង្កាត់រៀងៗខ្លួន។ តាមលោក នួន ពុទ្ធារ៉ា នៅឆ្នាំនេះក្រុងបានសាកល្បងធ្វើនៅសង្កាត់សាលាកំរើក ដើម្បីឱ្យសង្កាត់មានជំហ មានសមត្ថភាពខ្លួនឯងក្នុងការរៀបចំគិតគូរបញ្ហាបរិស្ថានរបស់ខ្លួន។ លោកបន្តថា ប្រសិនបើជោគជ័យ ក្រុងនឹងស្នើសុំដល់ថ្នាក់ដឹកនាំ ដើម្បីធ្វើប្រតិភូកម្មជូនសង្កាត់ទាំងអស់តែម្ដង។
ជាមួយនឹងផែនការខាងលើ លោក នួន ពុទ្ធារ៉ា មានសុទិដ្ឋិនិយមថា បរិស្ថានក្នុងក្រុងសៀមរាបនឹងល្អប្រសើរឡើង។ លោកលើកឡើងថា ផែនការបន្ទាប់នោះ គឺក្រុងនឹងពិចារណាដល់ការកែច្នៃទីលានចាក់សំរាមសព្វថ្ងៃ ទៅជាកន្លែងផលិតថាមពល ឬជី ដែលមានការវិនិយោគដោយក្រុមហ៊ុនពីបរទេសផងដែរ៕
© រក្សាសិទ្ធិដោយ thmeythmey.com
