កីឡាជាតិ
ជាតិ
លីគបើករដូវកាលថ្មី៖ ភ្នំពេញក្រោនស្វាគមន៍បឹងកេត ក្រោយជំនួបនៅដី EDC និងគិរីវង់ លោក Leonardo Vitorino ដឹកនាំការប្រកួតលីគដំបូងរបស់ភ្នំពេញក្រោន ដោយត្រូវស្វាគមន៍បឹងកេតដែលដឹកនាំដោយលោក ហៅ សុជាតិ។ រូបថត CNCC
× ក្របខណ្ឌមិត្តហ្វូនខេមបូឌានលីគចាប់ផ្តើមបើករដូវកាលថ្មី នាថ្ងៃសៅរ៍ ទី១៦ ខែមីនា នេះ ដោយការប្រកួតមានបីគូ និងនៅកីឡដ្ឋានចំនួន៣ផ្សេងៗគ្នា។ អគ្គិសនីកម្ពុជា និងគិរីវង់សុខសែនជ័យ ត្រូវបើកកីឡដ្ឋានរៀងៗខ្លួនដើម្បីស្វាគមន៍ក្រុមចំណូលថ្មី ខេត្តកំពង់ចាម និងយុវជនបាទីអាយុក្រោម១៨ឆ្នាំ មុនពេលដែលបឹងកេត ត្រូវតទល់ជាមួយម្ចាស់ផ្ទះភ្នំពេញក្រោន នៅកីឡដ្ឋាន អ អេស អិន។
អគ្គិសនីកម្ពុជា ដែលបានបញ្ចប់ចំណាត់ថ្នាក់លេខ១១កាលពីរដូវកាលមុន ប្រើប្រាស់កីឡដ្ឋានរបស់ខ្លួនដើម្បីក្រុមចំណូលថ្មី ខេត្តកំពង់ចាម នាវេលាម៉ោង៣ និង៣០នាទី។ នៅម៉ោងដដែល គិរីវង់សុខសែនជ័យ បើកការប្រកួតក្របខណ្ឌកំពូលសារជាថ្មី ក្រោយអវត្តមានអស់មួយរដូវកាល ដោយពួកគេប្រើប្រាស់កីឡដ្ឋានខ្លួនដែលស្ថិតនៅស្រុកគិរីវង់ ខេត្តតាកែវ ដើម្បីស្វាគមន៍ក្រុមយុវជនសាលាបាល់ទាត់ជាតិបាទីអាយុក្រោម១៨ឆ្នាំ។
គិរីវង់ ខេត្តកំពង់ចាម និងយុវជនបាល់ទាត់ជាតិបាទី សុទ្ធតែក្រុមចំណូលថ្មីនារដូវកាលនេះ ដែលធ្វើឲ្យក្រុមដែលចូលរួមប្រជែងពានមានរហូតដល់ទៅ១៤ក្រុមជាលើកដំបូងបំផុតក្នុងប្រវត្តិនៃព្រឹត្តិការណ៍ប្រកួតក្របខណ្ឌបាល់ទាត់កម្ពុជា។
នៅកីឡដ្ឋាន RSN នាវេលាម៉ោង៦ល្ងាច ភ្នំពេញក្រោនដែលដឹកនាំដោយអតីតគ្រូបង្វឹកជម្រើសជាតិកម្ពុជា លោក Leonardo Vitorino ត្រូវស្វាគមន៍ជើងឯករង បឹងកេតដែលដឹកនាំដោយលោក ហៅ សុជាតិ។ ជំនួបរវាងក្រុមទាំងពីរត្រូវបានចាត់ទុកជាជំនួបដ៏ទាក់ទាញនាការបើករដូវកាល។ កាលពីរដូវកាលមុន បឹងកេតបានយកឈ្នះ ៣-២ នៅជំនួបដំបូង ហើយភ្នំពេញក្រោនយកឈ្នះ ២-១ នៅជំនួបបន្ទាប់៕
© រក្សាសិទ្ធិដោយ thmeythmey.com