ជាតិ
×![]()
ដោយ: គី ចំណា
កន្លងមក វាមានការយល់ឃើញថា កាលណាសេដ្ឋកិច្ចរីកចម្រើនឡើង អារម្មណ៍ និងចិត្តរបស់មនុស្សនឹងមានភាពសប្បាយរីករាយតាមនោះដែរ។ ប៉ុន្តែផ្ទុយទៅវិញ ពេលសន្ទុះសេដ្ឋកិច្ចកើន និងមានការអភិវឌ្ឍខ្លាំងនោះ បរិស្ថានធម្មជាតិ ខ្យល់អាកាសបរិសុទ្ធ និងភាពស្ងប់ស្ងាត់ ក៏ចាប់ផ្តើមប្រែប្រួលបន្តិចម្តងៗ។ ក្នុងនោះមានការបំពុលបរិយាកាស។
ការផ្លាស់ប្តូរក្នុងបរិយាកាសជាពិសេសរស់នៅក៏អាចជាកត្តាមួយដែលមានឥទ្ធិពលលើអារម្មណ៍រស់នៅប្រចាំថ្ងៃរបស់មនុស្សផងដែរ។ បើយោងតាមទិន្នន័យរបស់អង្កការសុខភាពពិភពលោក (WHO) ជាមធ្យមមានប្រជាជនប្រមាណ៧លានក្នុងពិភពលោកបានស្លាប់ដោយសារផលប៉ះពាល់ពីការបំពុលខ្យល់ជារៀងរាល់ឆ្នាំ។
នៅក្នុងនោះ ប្រជាជនដែលរស់នៅក្នុងតំបន់អាស៊ីអាគ្នេយ៍ទទួលការរងគ្រោះខ្លាំងជាងគេ ដែលក្នុងមួយឆ្នាំៗមានអ្នកស្លាប់ប្រមាណ ២លាននាក់។ ជំងឺភាគច្រើនដែលកើតឡើងដោយសារការបំពុលខ្យល់មានដូចជា ជំងឺដាច់សរសៃឈាមខួរក្បាល ជំងឺបេះដូង និងជំងឺជាច្រើនទៀតដែលទាក់ទងទៅនឹងប្រព័ន្ធផ្លូវដង្ហើម។
ការសិក្សាជាច្រើនបានធ្វើឡើងក្នុងគោលដៅពិនិត្យមើលអារម្មណ៍របស់មនុស្ស ជាមួយនឹងការបំពុលខ្យល់អាកាស។ នៅក្នុងប្រទេសអាល្លឺម៉ង់ គេបានសិក្សាលើប្រជាជនប្រមាណជា៣ម៉ឺននាក់ដែលរស់នៅក្បែស្ថានីយ៍ផលិតអគ្គីសនីមួយ។
នៅពេលដែលស្ថានីយផលិតអគ្គីសនីនោះបានផ្លាស់ប្តូរ និងកាត់បន្ថយការបញ្ចេញឧស្ម័នបំពុលដោយការប្រើប្រាស់បច្ចេកទេសពិសេស គេសង្កេតឃើញថា អារម្មណ៍រស់នៅរបស់ប្រជាជនក្នុងតំបន់នោះមានសភាពប្រសើរឡើងវិញគួរឲ្យកត់សម្គាល់។
ការសិក្សាមួយទៀតនៅក្នុងប្រទេសចិន ក៏បានឲ្យដឹងដែរថា ប្រជាជនមានអារម្មណ៍មិនសូវល្អក្នុងពេលថ្ងៃ ជាពិសេសនៅពេលដែលការបំពុលខ្យល់អាកាសដោយយានយន្តមានកម្រិតខ្លាំង។ ការសិក្សាមួយនេះត្រូវបានគេធ្វើឡើងដោយប្រើប្រាស់បណ្តាញសង្គម Weibo ស្រដៀងគ្នានឹង Twitter ដែរ ក្នុងការចាប់យកទិន្នន័យបង្ហោះដោយប្រជាជនដែលរស់នៅក្នុង១៤៤ ទីក្រុង ក្នុងប្រទេសចិនទាំងមូលផង៕
Tag:
ការបំពុលខ្យល់
សុខភាព
© រក្សាសិទ្ធិដោយ thmeythmey.com
